岑潔儀懷孕救膚秘方

岑潔儀懷孕救膚秘方

曾與陶傳緋聞的港視藝人岑潔儀(Zoey),表明與陶再沒聯絡,各行各路,陶三個月前成功娶妻,Zoey更行先一步,前年下嫁馬來西亞華僑陳田興(Dixon),今年宣布造人成功,懷有B仔八個月,預產期明年一月,趕得切做馬B。

Zoey有丈夫錫到燶,生日收豪宅、陀B去旅行坐私人飛機、閒時去high tea、買衫、做facial,生活富泰,恨死一班港女。但貪靚的她不甘hea住陀B,積極保持靚媽狀態,每晚按摩推油、勤敷面膜做facial,連Dixon都為她每晚按腳,讓愛妻keep住最佳狀態。

s2
Zoey與Dixon前年在峇里島結婚,邀請了30位親友見證,Zoey笑說婚禮豪使超過10億,不過是印尼盾,即約百萬港元。

新婚生日收豪宅
「女人最大的驕傲不是她的長相有多出眾,而是她的男人有多疼她。」岑潔儀在微博的一番話,說明女人不必做最靚最強,最緊要嫁個好老公。她嫁人後變得富貴,但她否認是泊到好碼頭,只是嫁得好,「我嫁咗一個錫我,肯為我付出嘅老公,照顧到我生活,有啲人嫁咗個幾億富豪,但佢唔肯花錢喺你身上,都係冇用㗎。相反你嫁個得幾千萬身家,但佢好肯使錢喺你身上,係睇個男人為唔為你付出。」

Dixon當然肯為老婆付出,前年老婆生日,闊綽購入千萬豪宅天晉,送給老婆做生日禮物,近月才正式收樓,「我哋冇住嗰度,係用來投資,嗰度配套交通設施好,租金可以高達兩萬幾三萬,好多金融人士搬入,依家都傾緊出租。」兩夫婦覺得有BB後,居住環境較重要,所以改住將軍澳日出康城千呎單位,「嗰度風景好靚,望住個山,仲見到天然瀑布。之前仲搵咗兩個風水師傅睇過,唔使擺陣都有85分。」

Dixon從事鐵礦石生意,總公司在英國,每星期都要飛往各地工作,每周有兩三日留港陪太太。

一年認定Mr. Right
Zoey與Dixon經朋友介紹認識,相識三個月閃電訂婚,一年後結婚,很快便認定Dixon就是Mr. Right,「我唔介意有冇錢,我同前男友一齊七年都冇結婚,前男友係好窮,我哋一齊捱麵包,我仲買埋飯盒俾佢食,我從來都唔介意,但唔係佢就唔係佢,所以唔係時間問題,係遇唔遇到Mr. Right嘅問題,係自己感覺,一個男人係咪真心錫你,同錢冇關係。」Zoey強調與Dixon講心不講金,相比豪宅,她更愛老公的細心,「我懷孕之後,佢好細心照顧我,每晚都幫我按腳,會煲湯我飲,燉花膠我食,呢啲唔係錢買得到。」

她更感動的是,老公帶她放眼看世界,「佢帶我見識咗好多,我以前唔係去好多旅行,同咗佢一齊之後,帶咗我去好多地方見識。佢只係34歲,唔係好大個,但佢好成熟,好有責任心,我覺得一個男人最重要係責任心同顧家,我喺佢身上學到好多嘢。」

s5s6

「哎呀,我哋講到邊?我又孕傻!」訪問期間Zoey常忘記講到那裏,要筆者提點,她笑言可能出現「孕傻」情況,即懷孕後出現記憶力衰退現象。

首重防曬抗孕斑
很多女人結婚生仔後, 恃住有老公錫,甘於做個黃面婆,生活只有煮飯湊仔。Zoey拒做黃面婆,懷孕後勤加保養,無時無刻以最靚狀態示人,「你照鏡見到自己,嘩!仲好靚喎!你自己開心,BB又會開心,我覺得咁先係最重要。」

世界上沒有醜女人,只有懶女人。懷孕期間荷爾蒙改變,刺激黑色素分泌,令皮膚因黑色素沉澱而長色斑,Zoey首要任務是做好防曬,「一曬到出斑就好大鑊,唔係普通雀斑,係孕斑,之後搽幾多美白產品、做幾多機都退唔到,出街一定要搽防曬。」

孕婦最好遠離有化學成分的護膚品,改用有機產品,Zoey一擲8,000元,購入某皇牌有機品牌一套護膚及化妝品,「一套六件有洗面膏、爽膚水、精華素、暗瘡膏、濕粉同乾粉,貴喺支精華素,成3,000元好貴!啱啱懷孕時候,因為荷爾蒙令我皮膚差咗好多,爆晒瘡,見到自己咁樣衰,朋友又推介下,就算啦照買!用完真係好番好多,產後都會keep住用。」

此外,懷孕後皮膚變得乾燥,Zoey特別注重保濕,每星期到美容院做facial,例如雪花秀人參調理療程,以韓方草藥護膚,或到小店進行簡單針清、清潔、保濕等療程,重點要全人手,絕不能做機。在家也不能偷懶,她每晚必敷全天然保濕美白面膜,「我敷玫瑰同牛奶mask,都係organic,玫瑰比較溫和,有紓緩作用;而牛奶mask真係牛奶,敷完好舒服,冇副作用,喺美容院先有得賣。懷孕前我有敷大陸好hit嘅『俏十歲』,敷完皮膚好好,仲有試好多其他mask,但大肚後用番organic產品比較好。」

Zoey懷孕後去美容院不能做機,必須全人手護膚,或選擇一些含草藥精華及金箔等療程滋養肌膚。

老公取笑大籮肥婆
大肚婆要靚又要命,做完facial還要keep fit,Zoey懷孕至今重了20磅,上圍估計升了兩級至D級,但Dixon竟笑老婆是肥婆,臀部可以「擺十圍」!激發了Zoey要勤力keepfit,「我有唔開心㗎,其他人話我肥,我都唔介意,但佢話我就好介意,我肥都係為佢生兒育女,你竟然話我肥婆?」Dixon解釋只是想給予老婆推動力減肥,距離生仔加坐月,起碼多半年才可實行減肥大計,她仍有排被戲稱「肥婆」。

已懷孕八月的Zoey,開始有水腫,胃口增加,「我一向少食多餐,依家都keep住一日食五六餐,每餐食少少,可能因為咁唔算重得太快。」Zoey的keep fit之道好簡單,主要是按摩推油,自己每晚先作簡單推油,每星期再由專業按摩師推多次,「我朋友之前做推油,佢教我推淋巴、去水腫手法,所以我懷孕前推到依家。」她採用可供食用的檸檬橄欖油,主要推大髀內外位置、腰及手臂內側,自己認為較肥胖的位置,她教路每個部分只需推約20秒,非常簡易。」

s9

想囝囝做歐陸公子

距離明年一月預產期愈來愈近,Zoey開始緊張,已準備為他做形象設計,塑造他成為小公子。「我一懷孕就狂買BB衫,做父母永遠想俾最好嘅小朋友,所以一定唔會吝嗇。我為囝囝揀多啲恤衫,想佢官仔骨骨一點,唔會行潮童路線好似Jordan、Baby Ape嗰啲。我鍾意歐陸風,戴賊仔帽,着件恤衫,加對Converse已經好型,歐陸風比較有氣質,文化氣息重啲,衣着反映到性格,我希望小朋友將來文質彬彬。」

長遠來說,Zoey希望發展時裝生意,創立孕婦時裝品牌,「好多孕婦冇返工,鍾意出去行街買衫,同埋孕婦衫幾難搵,成日都鬆身衫配leggings好悶,所以我覺得有得做,自己做埋design。」更重要是,Zoey希望做個成功在職媽媽,「依家呢個年代,淨係湊仔會被淘汰,唔只係社會,甚至老公都有機會淘汰你,所以女人要有自己事業,先會有信心,自己點睇自己好緊要,如果你只係湊仔,冇再睇呢個世界都會唔開心,慢慢就唔打扮、懶惰,咁就大鑊喇,所以我會填滿自己時間表,做個有事業,又照顧到家庭嘅女人。」

 

撰文:Ling 攝影:黃大立(部分相片由受訪者提供)
化妝及髮型:Hazi Leung 服裝:Lason Group
場地:海港城Sulwhasoo SPA(tel: 2314 3288)

更多精選內容