邊玩邊學習 去睇舞麒麟試著大戲衫@Parent婷

article

廣告

康樂及文化事務署主辦 Presented by the Leisure and Cultural Services Department

非物質文化遺產辦事處籌劃 Organised by the Intangible Cultural Heritage Office

暑假當然要日日去玩dayday玩樂至開心,如果有得一邊玩一邊體驗一下香港嘅傳統文化,等小朋友可以邊學習邊玩樂,就更perfect!Parent婷就有個好介紹,嚟緊呢個星期日,康樂及文化事務署轄下嘅非物質文化遺產辦事處就喺荃灣三棟屋搞咗個「非遺樂在夏令時」同樂日,節目超豐富,有得試食客家傳統食物茶粿、飛機欖同埋一嚐港式奶茶,又可以試下著粵劇服飾同化妝,睇埋手托木偶表演同舞麒麟,各位媽咪,到時見啦!

媽咪留意表演時間:

14:45-15:15—必睇麒麟

小朋友最鍾意舞龍舞獅,佢哋又知唔知道其實香港仲有客家族群嘅舞麒麟呢?話說客家人認為麒麟係瑞獸,可以驅除煞氣同帶來好運,所以喺節慶及重要儀式上都會舞麒麟。以往我哋多數只可以係過時過節先至睇到,但今次呢個活動就請嚟香港西貢坑口區傳統客家麒麟協會兩代傳承人輪流為大家表演舞麒麟,做足參拜祠堂、採青等傳統儀式,小朋友可以知道舞麒麟其實唔係表演項目咁簡單,仲係一個好有意義嘅文化傳承呀!

15:20-17:10——有趣手偶

木偶表演多會於「打醮」、酬神祭祀中出現,而手托木偶粵劇就係最古老木偶品種之一,師傅會操縱支撐木偶頭和上肢的長竹進行表演。經驗老到嘅師傅,靈活控制木偶,令木偶的功架做手都非常像真,配合樂器和唱腔演出,遠看就如真人一樣,栩栩如生。華山傳統木偶粵劇團係香港少數傳統木偶表演團體之一,今次會同大家表演《一把傳忠劍》第一、第三及第四幕選段,表演後觀眾仲可以入後台參觀,認識操控木偶嘅技巧,媽咪們真係要帶埋小朋友去睇,機會難逢呀!

必試!粵劇「妝」飾

Parent婷成日陪公公、婆婆去睇粵劇,覺得佢哋啲戲服好靚好華麗,好想試下摸下穿下。今次大家就有機會試穿粵劇服飾,仲有機會即場化番個「大戲妝」,喺粵劇場景影番張靚相,一嘗做粵劇名伶嘅滋味!現場仲會介紹不同行當嘅粵劇服飾和妝容,講解道具嘅運用和戲曲嘅虛擬動作,記住要去玩呀!

識食要去試茶粿港式奶茶

記住要入去三棟屋博物館演講廳,事關嗰度會有茶粿同港式奶茶嘅製作示範,你咃仲可以試食同試飲!講番茶粿,原來呢款客家傳統小食有分咸、甜,口感有點像糯米糍,當中加入了茶葉粉底艾草,所以帶點茶香,可以包豆沙、花生、芝麻,又可以包豬肉、蝦乾,風味各有不同呀!

仲有乜嘢玩?

尋寶.非遺:入場後,記住先去攤位攞尋寶地圖,按住設計路線玩勻三棟屋內各個「檢查點」,答埋有關問題,答中問題就可以獲得蓋印,集齊所有蓋印,就可以到攤位領取獎品呀!

潮人學堂:雖然parent婷唔係「ga ki nang家己儂」,但都想學下潮州話呀!現場就有工作人員教你潮州方言,仲可以玩埋潮州用語與圖片配對,識讀所配對嘅潮州用語,仲有禮物呢!

盂蘭盆供堆疊賽:適逢盂蘭盛會,今年就預備了一個盂蘭盆供堆疊賽,參加者須於指定時間内將各種供品米包有技巧咁堆疊係饌盒上面,堆疊得愈多愈高,就有機會贏啦!

飛機欖:想試下食飛機欖,記得去博物館外搵戴住個欖形鐵箱嘅「小販」。

「小小非遺大使」:十個「小小非遺大使」分布喺三棟屋唔同嘅地方,找出他們的踪影,便可認識香港十個國家級非物質文化遺產項目,喺他們手上揀啱十個國家級項目嘅圖片,更可以得到獎品呢!

「非遺樂在夏令時」同樂日

日期:2016年8月20日(星期六)

時間:下午2時30分至下午5時 30分

地點:香港非物質文化遺產中心(新界荃灣古屋里二號三棟屋博物館)

價錢:免費

*詳情可click入 http://www.lcsd.gov.hk/CE/Museum/ICHO/ 細閱。