【跟住肥媽食平D】黃瓜薏米 螺頭瘦肉湯

【跟住肥媽食平D】黃瓜薏米 螺頭瘦肉湯

實不相瞞… 實我依個師奶仔真係好鍾意睇肥媽煮食個節目,因為日日諗煮乜真係好頭痕,依家跟住肥媽煮就得下,仲唔係十個正!睇左一個星期,都計劃跟煮幾個餸,不過上星期見到依個黃瓜薏米 螺頭瘦肉湯 ,有我鍾意嘅黃瓜,冇辦法就決定打尖煲依個先。

 

我鐘意食黃瓜係其中一個原因,另一個原因就係屋企現成有材料,只係買瘦肉就煲得,咁仲唔即刻快手煲呀!

基本上我都係跟住肥媽食譜嚟煲,唯一唔同就係肥媽係用急凍螺頭,我就改用乾螺頭,因為我之前買左乾螺頭仲有幾粒係度,我諗大家都係螺頭,功效都應該差唔多,所以試下啦。(用晒屋企現有嘅就唔洗去買…可以慳DD嘛)

材料包括有黃瓜一個、薏米半碗、乾螺頭6粒仔(肥媽用急凍螺頭2個)、瘦肉及薑幾片~

Picture

乾螺頭及薏米先浸水,最好就要浸起碼一小時~Picture

瘦肉洗淨汆水備用,薑去皮切片~
Picture

黃瓜去籽切塊,切大舊啲都唔怕,因為太細煲完湯就冇得食啦~
Picture

煲內放約3L水,水滾後放入所有材料(黃瓜除外),待再次滾起時,用大火煲約15分鐘~
Picture

然後加入黃瓜~
Picture

用大火煲約15分鐘~
Picture

再轉慢火加蓋煲1.5小時~
Picture

最後加入少少鹽調味,就可以飲啦~
Picture

千其唔好漏左啲我至愛黃瓜,啲湯料又可以當一個餸,真係啱晒我依個師奶仔呀~
Picture

其實真係有啲估唔到啖湯係咁好飲,完全冇加蜜棗/無花果依啲調味材料,都係非常清甜呀,肥媽真係冇介紹錯呀~
Picture

今次老公大讚話好飲,仲叫我跟住肥媽再煮多啲新款,俾多啲新意佢哦。真係俾佢激C。不過….肥媽啲菜式簡單又易煮,所以我都唔介意跟住煮呀….哈哈哈!

 

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

 

BY 小小豬的成長日誌

Picture

 

更多精選內容