【母乳餵哺】在職媽媽為 泵奶 不惜遊的士河

【母乳餵哺】在職媽媽為 泵奶 不惜遊的士河

早前,一位的士司機在FB專頁「我的你的紅的」撰文,講述一位在職媽媽為了 泵奶 ,要求「遊的士河」由中環去柴灣再返回中環,爭取在半小時的車程上,在的士上 泵奶 。文章一出,立即引來瘋傳,網友紛紛留言表示這是母親的悲歌!而撰文的司機非常慨嘆,在文末表示:無論的士點乾淨,都唔應該係母親嘅好選擇,如果有得選擇。

 

撰文:Fiona Fong

以下文字轉至FB專頁「我的你的紅的

【母親打的抉擇】

揸的士,自自然然就會將光怪陸離習以為常,但久唔久,仍然會有令人愕然嘅乘客。

過左晚飯時間喺中環某商業大廈,一個平常OL,抽住一大個prada紙袋截車。一開門,先伸個頭入黎索,真係用力聞到索索聲咁,然後問:「師傅,你有無唔舒服?有無食煙?部車乾唔乾淨?」我心諗:乜料呀,人口普查員定捉鬼敢死隊呀?係就上唔係就走啦。

虛偽如我,硬擠個笑容出黎答:「我無食煙,全家都好健康wo,部車乾唔乾淨見仁見智啦,你想去邊呀?」

佢再瞪眼驗一驗個乘客位,終於上車。「師傅,唔該你行東區走廊去柴灣迴旋處,然後返返黎呢度。」「吓,小姐你想去邊架?」雖然係好舒服嘅旗,但難免覺得太奇怪,忍唔住要問。

「得架喇,你開車啦。唔該。」講完,佢拎左枝消毒噴霧出黎噴!「小姐,後面好污糟咩?」我儘量笑住講,其實躁躁地,因為今日開工部車真係幾乾淨。「唔係,不過我想乾淨D啫,開頭儘量唔好望倒後鏡丫,唔該。」吓,唔好望鏡?咩嘢事唔可以望鏡,唔通⋯⋯算,開車再講。

由於唔望得鏡,所以,無所以。我當然踩佢都傻,最多唔望佢啦,順住行東廊,係幾爽皮嘅一件事。忽然,又有要求。「師傅,唔該唔好揸太快,我想啱啱好半個鐘返到上車果度。」「好呀,無問題。」痴線咩,啱啱好半個鐘來回中環柴灣?點啱啱好法?高橋涼介的計時賽練習呀?去同回程嘅時間,絕對唔係一半一半wo。

不過,都係照行啦。行到回程,經過銅鑼灣嘅時候,又講嘢。「得喇師傅,我泵完喇,你儘快車我返去丫唔該。」泵完?泵乜?

「你⋯⋯頭先係泵奶?」
「係呀,公司又無位,廁所又唔衛生。我都係話落黎食飯咋,所以唔可以去太耐。」
「咁使唔使喺附近餐廳放低你?」
「唔使喇,我有包。」

呢枝旗,我賺得好輕鬆,但希望唔使再接到佢,唔需要習慣呢個現象。無論的士點乾淨,都唔應該係母親嘅好選擇,如果有得選擇。

 

文章出街後,很多人都大讚母乳媽媽的偉大,更批評政府一味口講支持母乳餵哺,但卻沒有實際行動!

網民批評政府得把口!

1

母乳媽媽都留言支持,表示:為咗BB,媽媽真係可以去到好盡!

2

有網民就話,咁遊一次車河,其實已經夠買半罐奶粉!

3

原來有唔少媽媽都試過喺交通工具上泵奶。

4a

更有媽媽表示台灣好多地方都有相關配套,隨時都可以泵奶。

5

 

更多精選內容