SKECHERS Outlet觀塘新店 百零蚊買童鞋

撰文及攝影︰Esther

SKECHERS 係美國鞋履品牌，以悠閒鞋履起家，童裝鞋大多Sharp醒搶眼，就好似閃耀奪目的童裝鞋Twinkle Toe和Luminator系列，另有簡約風，如布鞋、返學淨色鞋等等。入到outlet店內，已經見到一排架係斷碼鞋區，英文寫「Lucky Size」，又確實真係要睇你彩數先執到平靚正又啱size嘅鞋。

斷碼鞋區，其中有2個架分別係女童及男童。隨機揀幾對鞋，見到價錢由$119至$399不等，另有標明原價嘅四折，記者認為百零蚊先買得過！由於斷碼鞋，揀時記得睇真啲，如果帶埋小朋友去就試真啲，見有啲女童鞋閃石有瑕疵，例如有少量膠水跡。仲有，估計部分鞋係display，鞋底污糟，介意就自動剔走啦。另外店舖角位有區嬰幼兒鞋款，好多動物系列。提提大家，依家買兩對仲會全單9折，優惠詳情及限期記得問清楚店員。

心心閃片湖水藍便服布鞋 $199，綁帶蝴蝶結細節位做得好靚，可愛小女孩大愛。

魔術貼波鞋$159（原價$499），最啱活潑好動男仔跑跑跳跳，粗着唔心痛。

左邊七彩bling bling閃石魔術貼悠閒鞋$399，價格偏貴，而右邊的藍拼桃紅波鞋$159（原價$599），屬抵買之選，啱Size就入手啦！

牛仔布娃娃鞋百搭易襯款 $119，內裏襯碎花布，而鞋墊厚身舒服，性價高！

觀塘 SKECHERS Outlet
地址︰觀塘開源道60-62號駱駝漆大廈地下A1及A2舖
營業時間︰11am-8pm