清熱 消滯 山楂桔餅薏米茶

清熱 消滯 山楂桔餅薏米茶

中秋節都一定食唔少月餅,食到都真係有少少滯滯地。見有朋友仔教煮依個既 清熱 消滯又可以化痰潤喉嘅涼茶,見咁多好處就當然又跟埋一份,煲嚟俾兩位老細試下啦!

 

我好耐之前都曾經煲過山楂茶俾小小豬飲,不過當時佢就唔太鐘意,話個味太酸唔多肯飲。今次其實我都考慮左好耐,都係有啲怕小小豬唔飲,始終我煲湯同涼茶都係為左小小豬嘛!

不過我見今次除左山楂之外,仲有生薏米同桔餅,都係啲清熱同化痰潤喉嘅材料,所以就放膽一試,就算小小豬唔飲,我自己飲都唔錯,因為山楂可以消滯之外,仲可以燒脂去水腫,飲左仲唔即刻瘦啲啲!

材料就需要以下幾樣:山楂四両、生薏米一両、桔餅兩個、甘草4片同片糖(一兩相等於37.5g)~
Picture

所有材料浸洗一陣;桔餅就切開細細粒,咁就會易啲出味~

Picture

煲內放入4公升水,待水滾後加入所有材料(片糖除外)~
Picture

待再滾水後,先用大火加蓋煲約15分鐘~
Picture

然後轉慢火加蓋煲多45分鐘~
Picture

最後可以因應個人口味加入片糖,再用中火煲15分鐘就得~
Picture

熄火後就要即刻夾起啲材料,因為如果浸得耐,個山楂味就會更加出,咁就會好酸啦~
Picture

其實煲起嚟又真係唔多錯,入口唔會太酸但又有少少桔味,我覺得雪凍左個味就好更加好飲,所以小小豬都唔多抗拒,都肯乖乖咁飲一杯啦~
Picture

自己煲當然要嘗面,所以我自己都有飲,飲完喉嚨又真係幾舒服,有少少甘甘地嘅感覺呀!

 

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,睇下呢個湯水啱唔啱自己呀!

 

BY 小小豬的成長日誌
Picture

更多精選內容