零食一樣有療效!上班族必睇 6招 抗壓 抗疲勞

零食一樣有療效!上班族必睇 6招 抗壓 抗疲勞

香港人生活忙碌,打工仔由朝做到晚,食無定時,收工一刻攰到得番半條人命時… 可能仲要OT!所以唔少人都會選擇在辦公室準備大量零食或飲品,閒時抖擻精神,不過長此以往唔肥就奇啦!但以下六種食物及飲品不單健康,而且更有助對抗工作疲勞及壓力,上班族一定要知!

 

撰文︰Sunday Kiss

圖片︰互聯網

(1) 果仁

合桃、南瓜籽、杏仁及開心果等果仁含有豐富奧米加3脂肪酸,可以令腦細胞功能變得有效率,有助解決壓力問題。果仁含可減低壓力皮質醇的分泌的鎂,以及有助安撫焦慮情緒的維他命E。不過果仁也含有脂肪及熱量,建議每次唔可以食太多,例如四粒合桃、一個掌心大份量的南瓜籽或12粒杏仁就已經足夠。

 

(2)麥包、麥片、麥皮及藜麥


麥包、麥片、麥皮及藜麥等都屬於複合性碳水化合物,進食後可以提供能量之餘,又可增加體內血清素的釋放,令人心情開朗,對抗工作疲勞。肚餓時食一片麥包、沖一個掌心份量的麥皮都係唔錯的選擇。另外藜麥被視為超級食物(Superfood) ,擁有卓越的營養特性,其中酪氨酸具有重要的 抗壓 功能,有虔減輕抑鬱和焦慮。大家可以預先在家中蒸半杯藜麥,回到公司後加入沙律菜中一同進食。

(3) 多喝水

唔少人在工作忙碌時往往忽略要飲水,因為水份是細胞所需,若細胞缺乏水就會影響運作,令人容易疲勞,工作效率自然降低。其實飲水不但可預防水腫,更可幫助身體排毒。若每日在辦公室工作8小時,至少要飲夠6杯水(成人每日要飲8杯水)。若果要開OT,更加要飲多啲。其實飲水都有所謂正確方法︰首先濕潤一下口腔和咽喉,然後飲一陣停一陣,令身體可以慢慢吸收。

 

(4) 歎綠茶

綠茶甜品係唔少女士的至愛,不過可能較少會就咁飲一杯綠茶。其實綠茶、烏龍茶等都含有不少抗氧化物,當中的茶胺酸,可以令腦部發放更多令人可以放鬆的腦電波,並減少令人緊張的腦電波,有對抗大腦疲勞的功效。另外茶中亦含有咖啡因,能增強呼吸的頻率和深度,促進腎上腺素的分泌達至抗疲勞。打工仔們做到死氣沉沉時,不妨歎杯綠茶鬆一鬆!

(5) 黑朱古力

OL們聽到朱古力就怕,一來擔心味道好甜,二來擔心食完會增磅。但其實黑朱古力與別不同,尤其係可可濃度達85%或以上的黑朱古力,可以降低皮質醇水平,有助減輕壓力和焦慮,令人抖擻精神。不過食得太多當然都會肥,所以建議每次只食一份拇指大的黑朱古力(濃度為85%或以上)。

(6) 食水果


進食繽紛顏色的水果,有助攝取不同抗氧化物,可踢走疲勞,令人好心情好。建議成人每日吃兩份水果,一份相等於半隻香蕉、一個橙、蘋果、布冧,或半碗切粒西瓜、藍莓或士多啤梨。另外最好每日都食唔同顏色,如橙色食物含大量維他命C、黃色食物則含豐富纖維及鎂等。下午茶時間「發牙痕」時,不妨食個生果!

全文完

更多精選內容