零用錢

小學生應否有零用錢 ?

專欄

廣告

Keicy 而家上咗小一, 小息時間可以去小食部買吓嘢食.

開咗學頭一兩個星期, 適應晒學校環境嘅 Keicy, 有日放學後返嚟問我攞 零用錢 .

Keicy:「可唔可以畀錢我?」

我: 「點解?」

Keicy: 「我想同同學一齊買嘢食. 我約咗同學星期一同星期三去買嘢食. 」

 

 

作為家長, 小朋友第一次問自己攞錢, 心情都有啲怪怪哋.

雖然佢哋只係想要十蚊八蚊, 買些少零食嘢飲, 同同學仔輕鬆吓 social 吓,

不過我發現, 其實唔係金錢數目多與少嘅問題,

而係唔想開壞咗個頭-小朋友一問我就畀.

背後更係理財, 同一連串與金錢相關嘅價值觀.

我整理咗【13 招教導子女理財】, 提醒返自己要從日常生活當中, 為 3 姊弟灌輸正確嘅金錢觀念:

1) 用現金

使用信用咭及八達通無疑更方便, 但小孩看不見交易. 使用現金能令他們看到銀貨兩訖, 並知道購物是要交出辛苦賺取的薪金.

2) 參觀銀行/櫃員機

解釋錢從何來, 讓小朋友知道銀行不只能拿錢, 更是儲存工資及借貸的地方. 由於本地銀行很少有導賞團, 所以家長須親自為子女講解.

3) 去超市

講解「格價」, 讓小朋友知道要「慳得一蚊得一蚊」, 更要教導運用 coupon 及折扣優惠, 財富才能積少成多. 結帳前, 可請小孩先計算總數, 刺激思維, 加深印象.

4) 名牌不一定好

不使用名牌生活用品能節省大量開支, 向小童講解名牌與普通品牌之差價, 鼓勵他們計算如何從差價中獲得一件心頭好.

5) 想要 vs 必需

食物是必需, 玩具不是, 大人要幫助小孩分清楚, 鼓勵他們儲錢買心頭好.

6) 製作預算表

向子女講解家庭每月必要開支, 計算能否購買額外用品, 進一步解釋何謂必需品.

雖然小孩開銷較少, 但家長可助其建立開支表, 訓練他們知道錢花在哪裡.

7) 展示賬單

讓小孩從昂貴的賬單, 知道如何節省金錢, 例如出房門關電燈、把洗衣機裝滿衣物才開動等等. 當他們知道能節流, 會做更明智的決定 .

8) 製作「心頭好」清單

鼓勵知道開銷情況的小孩列寫「心頭好」, 由家長助其計劃如何儲錢購買.

9) 透明樽錢罌

豬仔錢罌雖然可愛, 但透明樽更好, 因小孩看得見存款累積, 代表更接近儲蓄目標.

10) 施比受更有福

無論用豬仔錢罌或透明樽儲錢, 都應另設一個與他人分享, 並於儲滿時捐贈予慈善機構或有需要的朋友.

11) 做小本生意

家長協助孩子建立小本生意, 賺零用錢之餘, 更能傳授理財之道, 灌輸職業道德, 讓其長大後財政獨立.

12) 週薪家務助理

家長可「聘請」沒興趣做小本生意的小孩做家務, 讓他們開始管理小額金錢.

13) 遊戲教學

小孩玩「大富翁」遊戲能學習預算、支出及財務決策, 但家長要注意小孩是偏向溝通或讀來學習.  

可能有人話, 小朋友仲細, 唔使急, 大個啲先慢慢教啦.

我都以為係, 不過最近有件事發生咗, 就唔教唔得喇.

 

相信好多家長都同我一樣, 覺得散銀冇乜嘢周圍擺, 不過呢樣嘢真係要留意.

 

有日 Keicy 見到檯面有啲散銀, 就自己拎咗, 代落書包, 然後喺書包攞啲散銀嚟玩.

我就問: 「點解你有錢?」

Keicy: 「喺檯面度拎嘅」

我: 「吓?」

雖然只係好少錢, 係佢唔識而攞咗 不過都係偷嘅一種, 所以唔好令小朋友養成呢個習慣, 正所謂「小時偷針大時偷金」, 大個咗慣咗手勢, 就好難教返啱喇!

 

同一個星期, 又有一件事發生咗.

Keicy 攞咗個 5 毫子返嚟, 仲同我講:

「今日喺學校買嘢食嘅時候找咗5毫子返嚟呀, 我係咪好叻呀?」

我: 「點解嘅?」

Keicy: 「因為嗰樣嘢 $6.5 我畀咗7蚊佢, 佢找咗5毫子畀我囉. 」

我: 「你點解會有 7 蚊嘅?」

Keicy: 「XXX (同學) 畀咗7蚊我, 因為我想食雪條, 咁 XXX (同學) 就話請我食, 畀錢我.」

我: 「咁樣係唔得嘅, 因為嗰個小朋友嘅錢, 係佢家長畀佢, 可能係佢家長想畀錢佢買嘢食, 而唔係亂咁用. 要錢的話, 可以問屋企人攞, 或者自己勤力搵錢, 唔係人哋畀, 或者用唔啱嘅渠道攞倒啲錢. 」

 

因為 Keicy 唔識金錢嘅概念, 所以跟住我決定返學校搵老師, 同老師講返成件事, 以及畀返7蚊嗰位同學同佢家長.

然後老師就去搵返嗰位同學嘅家長, 不過原來嗰位家長, 亦都冇畀錢小朋友.

 

咁……啲錢係點嚟呢?

原來, 啲錢係小朋友趁家長將散銀放喺檯面,唔為意嗰陣時攞咗.

 

由 Keicy 找咗錢返嚟畀我發現, 我話畀老師知, 老師將啲錢畀返嗰個同學嘅家長, 先揭發咗呢件事.

 

原來, 唔係 Keicy 攞咗幾蚊畀我發現咁簡單. 而係可能有好多家長冇發現到, 小朋友會攞家長放喺檯面嘅散銀, 跟住返學校買零食.

雖然, 暫時唔係咩大件事, 但係咁細個就發生, 好容易養成一個習慣, 誤解咁樣做係冇問題.

親身經歷完, 反思返件事, 其實家長都有啲責任, 要有手尾, 啲錢要擺返好啲, 唔好誤導倒小朋友, 如果唔係就好難教.

 

呢件事之後, 相信應該要畀零用錢 Keicy, 不過, 點畀法好啲呢?

我諗到兩個方案, 請大家畀啲意見.

 

A)

要求小朋友免費做好掃地、抹檯、分食物等簡單家務後,

先畀佢哋間中透過幫手洗車 (或其他家務), 賺取少量零用錢,

優點: 令佢哋知道「賺錢唔容易」、「做家務唔係為咗錢」、「一家人合力完成項目」等正確價值觀.

缺點: 唔係成日洗車……

B)

小朋友做掃地、抹檯、洗碗、倒垃圾等簡單家務,逐次計費.

優點: 逐次計費, 簡單明確, 清晰易明.

缺點: 容易誤會「做家務係為咗錢」; 如同學屋企都用呢個模式, 會出現「薪水」比較.

 

講到薪水,又係另一樣煩惱.

邊種出糧方法好啲呢?

 

甲) 一個月$30, 1日 $1 畀佢儲起,自己決定點用.

VS

乙) 一星期$10, 一個月$40.

另一方面, 如果畀零用錢小朋友用,亦都要教埋儲錢.

每逢過年、生日,小朋友都有收到長輩嘅利是,各位家長係點樣 keep 啲利是錢?

我自己係幫佢哋開個戶口儲起.

 

當小朋友有咗零用錢, 我會教佢哋量入為出, 唔好全部洗晒、洗凸, 或者先洗未來錢.

 

透明樽錢罌係一個幾好嘅方法:

小朋友見到存款累積, 代表更接近儲蓄目標.

Keicy 慢慢大個, 開始接觸社會, 會知道乜嘢係「買嘢」, 尤其是而家好流行用八達通, 但係, 如果未識得金錢概念嘅小朋友用八達通畀錢, 一嘟就得, 會唔識得計數, 唔識得認清貨幣嘅面額, 所以, 我傾向畀啲現金佢哋, 試吓每人畀$10/$20, 畀佢哋揀自己鍾意嘅嘢食, 令佢哋會做觀察同留意價錢, 所以而家佢哋會問, 同自己計吓可以買到幾多樣嘢.

另外, 又試吓放假或者平時出街嘅時候, 畀少少責任佢哋, 試吓幫手畀錢, 令佢哋用腦計吓數, 又可以認識吓紙幣.

各位家長會畀幾多零用錢小朋友呢?

理財教育方面又有咩需要注意呢?

歡迎分享! ^^

 

 

FB: KeicyKK