飛機 設兒童靜音區 你支唔支持?

飛機 設兒童靜音區 你支唔支持?

不時都有人話搭長途 飛機 最怕遇到BB!如果遇上BB在飛機哭鬧不止,對乘客來說簡直係折磨!雖然大多數人都會默默忍受,但難免會覺得煩躁。有見及此,近日印度廉航IndiGo就率先推出「兒童靜音區 」,機上第1至4行、第11至14行列為禁止12歲以下幼童乘坐。唔少網民都讚成呢個措施嘅實行,但亦有家長希望其他乘客可以包容小朋友,大家又支唔支持?

 

原文︰GOTRIP編輯部

支持禁細路:我都係想靜靜地去到目的地啫

有網民表示,短途機都算,但長途機或者凌晨機,大家都希望可以好好休息下,遇到 BB喊/細路嘈真係慘絕人環!

・都好,有時D細路真係煩死人。

・而家又唔係唔比bb搭 飛機,只係為咗提升乘客嘅服務質素。我比錢搭 飛機 要包埋聽bb聲十幾個鐘?

・BB 坐 飛機 升降耳仔唔舒服一定喊,BB狂喊唔停媽媽都會覺得嘈住人唔好意思,所以如果我有bb我都會讚成

・好好吖⋯⋯有時上機攰又頭痛想瞓但細路喊聲⋯⋯真係考自己忍耐力

・你有自由哭鬧,我有追求寧靜的權利,若父母已盡力只能怨運氣欠佳

 

網民指家長要求人地體諒自己仔女時,亦要體諒番需要休息嘅乘客。

 

只要見到父母有努力令小朋友安靜,都會表示諒解,最怕懶懶閒的父母!
闊佬懶理家長!圖片來源:機上10大惡頂乘客 – Cuson LO & Expedia

跟進留言狙擊 -「問題其實出於部份家長太自私」!

・我都勁憎啲人用細路仔係咁㗎啦嚟推卸責任!細路仔係咁,咁就由得佢?唔使教㗎喇?

・bb或小朋友喺公眾場合放聲哭鬧就大家都唔想,但每對父母係有責任事前去搵應對方法,而唔係由佢喊

・有好多家長覺得細路控制唔到係無問題,完全覺得自己無責任

・大人不是冇方法令小朋友靜下來,只是大人冇家教,老奉人地應該包容佢d小朋友

・其實最需要被管嘅人係父母……

・啲人咁憎小朋友坐附近咪就係因為啲怪獸家長唔約束啲細路尖叫踢椅背狂喊,人地忍無可忍就話人地唔包容囉,請你都包容下啲唔鍾意小朋友既乘客囉唔該

網民認為有時大人仲嘈,應該公平啲,大人細路都唔准講嘢

反對一方 - 為小朋友平反!「嘈住乘客嘅另有其人」:

・大人都有份嘈啦!唔止小朋友喎!

・上次嘈住我阿仔瞓覺嗰幾個大人又如何?

・果日去泰國,後面個呀叔大聲講野講足成程,反而隔離個小朋友成程都訓左,應該禁邊個

・我覺得BB嘈都冇法, 但有d成年人…咪仲嘈

・有時大人都可以好嘈⋯⋯⋯大開嗓門傾計,小小事吵吵鬧鬧果D又點計?!

 

理性質疑:靜音區真係有用?

・其實佢飛A320… 個細路要喊起上嚟基本上成機都聽到…

・無小朋友不等於静音…. 一班人講野大聲, 訓覺鼻鼾聲,呢D一樣嘈,但你坐静音區就會無??

・静音區=禁煙區,個細路喺第7行喊,第4行同第11行聽唔到㗎咩

・你坐第4行靜音區,但如果個B坐第5行,一樣嘈到拆天

・其實隔幾行唔會好得好多應該分機頭機尾

・成架機得八行係靜音區,太少啦,有作用咩,不如唔好搞

仲有其他訴求!網民提出創新建議:

・凌晨機應該全機靜音囉唔該

・最好有一區比人較椅背,咁全部一齊較就唔洗比前面個人迫住

・整埋個「不能拉後椅背」嘅廉航就好啦

・最好有個「喜歡講嘢人」區

・其實整個嬰兒專區咪仲好!我相信我地呢啲做媽媽抱住個仔都想坐得闊落啲 自在啲

・不如推出瘦人區

其實大家都只喺想舒舒服服搭程飛機姐,分開坐都未必喺壞事。始終無小朋友嘅未必明白家長嘅難處,而家長又唔洗因為自己個BB失控而尷尬。至於成效方面,就要實行咗先知啦!

 

全文完

更多精選內容