新花樣 三棗 茶 紓緩氣管敏感
廣告
我之前都有間中煲 三棗 茶俾小小豬飲,不過因為個顏色關係,小小豬次次都唔會十分願意飲。
早幾日見有朋友仔教話可以加埋蘋果及雪梨一齊煲,個顏色靚啲之餘(即係冇咁黑卒卒),味道可以更加清甜,所以我又嚟試下依個蘋果雪梨 三棗 茶啦!
編輯:sunday kiss
三棗 茶有咩好?
原來將紅棗、南棗同埋蜜棗 三棗 一齊煲,除左對補氣血更有效用之外,因為棗類都有抗過敏作用,所以對氣管敏感而引致容易咳嗽都會有調理作用。補益得來又唔會太燥火,所以對好啱小朋友飲用。
今次加埋蘋果同雪梨,除左味道更加甜之外,仲非常滋潤,可以有滋陰潤燥之作用,所以就更加啱小朋友依家嘅轉季時飲用呀!
材料超簡單,只需要蘋果3個、雪梨4個、雪梨乾3-4片、蜜棗5粒、雞心紅棗10粒及藍棗5粒~