G.E.M.接班人  7歲小巨肺譚芷昀

G.E.M.接班人 7歲小巨肺譚芷昀

上年初G.E.M.(鄧紫棋)在內地參加《我是歌手2》,集集唱爆咪令她爆紅全國,年中香港都有位小代表到內地參賽,平地一聲雷!年僅7歲的譚芷昀(Celine)在《中國新聲代第二季》,一首〈You Raised Me Up〉震攝人心,在YouTube瀏覽次數超過350萬,其巨肺高音及爆炸力令網友封她為「新小巨肺」、「小鄧紫棋」,自此頻頻中港兩地獻唱,上埋TVB台慶表演。

「台上三分鐘,台下十年功。」Celine三歲學唱歌,爸爸兼歌唱老師譚順生(Dr.Steve)親自教導,三年多來父女無止境為音樂付出,但他不想女兒與G.E.M.比較,兩人實力仍相差甚遠,不過Celine也希望有機會與G.E.M.合作,好好學習一番。

c2
譚芷昀去年一共唱了約50場show,不覺得辛苦,因為每次能踏上舞台唱歌,就覺得很滿足,希望2015年繼續唱更多好歌。

譚芷昀小檔案
英文名:Celine Tam
年齡:7歲
就讀學校:英基畢架山小學三年級
曾獲獎項及比賽:
中國新聲代第二季
中國達人秀香港區
廣州電視台少兒頻道「讓夢飛起來」歌唱比賽 金獎
新城電台「香港小童聲公開歌唱比賽」 冠軍
過往表演:TVB台慶、亞視台慶、香港管弦樂團音樂大匯演等
最愛歌曲: Let It Go、You Raised Me Up、My Heart Will Go On等

未學唱歌先震音
「唱歌要用丹田㗎,你用緊喉嚨唱歌。」筆者細細聲哼歌,Celine豎起耳朵偷聽,即時指正我!年紀小小的Celine對唱歌有份執着,對自己有要求,唱歌以外,她像其他小朋友一樣天真無邪,活潑跳脫,但一唱歌,就變得認真起來,希望把最喜歡的東西做到最好。

爸爸Dr. Steve開歌唱學校,耳濡目染下,原來Celine已靜悄悄自學,「我好少教小朋友,有日佢突然俾個virbrato震音我聽,震音係學唱歌最難嘅一點,可以慳好多工夫,就決定教佢。」

三年多來,Celine學唱歌和彈琴為主,可以自彈自唱,每星期最少練歌10小時,如果有表演,就加長練歌時間,試過一日練足3小時,Celine坦言覺得有點辛苦,但從沒想過放棄,「唔好give up,唔會放棄,同埋要keep going,就算有少少都要keep going……」她重申多次不能give up要keep going,是她唱歌的信念,爸爸自小灌輸做任何事都不能輕言放棄,尤其她最喜歡的唱歌,要集中、努力,才能向目標進發,「自己搵箇中樂趣,練歌係辛苦,做每一件事都辛苦,你要達到目標,就一定要經歷呢種辛苦。」

「我想拉咪唱歌!」好多巨肺歌手鍾意拉咪飆高音, 阿G.E.M.都有,Celine希望將來夠quali拉咪,而她的學習對象是加拿大殿堂級歌手CelineDion及馬來西亞國寶茜拉(Shila Amzah),「我鍾意Celine Dion啲歌,但佢冇拉咪,Shila會拉咪。」Shila是Celine在《中國新聲代》的導師,兩人相處了六星期,分享了很多唱歌經驗及愛心,兩人成為好朋友,賽後Shila更邀請她在其上海演唱會同台合唱。

四歲參賽 中港兩邊走

2012年,當時四歲多的她開始參加校內比賽,初試啼聲便奪冠,之後再贏得新城電台的香港小童聲公開歌唱比賽冠軍,踏上表演之路,唱過工展會、雜誌歌唱比賽、香港管弦樂團音樂匯演及多個慈善活動。前年她踏進神州大地,參加內地童聲比賽《讓夢飛起來》,擊敗三千人奪得金獎,Dr. Steve指從沒想過港人能勝出,「香港未試過有三千人比賽,最大都係二三百人,用咗七個月,過三關去到總決賽,點知真係攞到冠軍!節目總導演好賞識佢,中央電視台、湖南衛視選角人員後來見到佢啲片,邀請佢參加《中國新聲代》。」

舞台愈唱愈大,困難更大,他指此節目出名好tough,「學生要喺暑假唱十五首歌,要上去六次,每次唱兩三首,每次之間只有兩日練一首歌,對我都好大挑戰,佢又啱啱先開始學國語,對佢嚟講好難。」Celine順利完成13期節目,近15個電視台爭相邀請她,不過爸爸推掉了很多,「佢始終係細路仔,唔可以當佢機器,會揀啲大型電視台同有意義嘅節目先去。」

c3
Celine在港奪得無數歌唱比賽獎項,但香港比賽規模細,去年開始踏上內地大舞台比賽。

讀國際學校 彈性出show

返回香港,Celine暫不會再參賽,爸爸笑說:「我應承咗我啲學生,呢兩三年都唔會俾佢參賽,佢個歲數係幼兒組,我啲學生會覺得佢攞晒獎啦,所以淨係俾佢出慈善show,同埋管弦樂團嘅show, 過程要學到嘢。」

細細個就做風頭躉,有時要請假出show,幸好就讀的英基畢架山小學持開放態度,同學也非常支持她,爸爸解釋道:「學校由得佢請假,好多同學都係咁,校長、老師、學生會上堂聽佢唱歌,播佢YouTube啲片出來聽,當做一個上堂氣氛,師生會同佢影相拍video,一齊嗌支持佢,好開心嘅。」要栽培孩子長處,必須家校配合,Dr. Steve覺得本地學校功課多,校長亦不容許她經常請假,相反國際學校時間彈性高,功課少,能好好享受唱歌。「唔係個個老師都識我,有啲好似未見過我唱歌……」Celine怕醜道。

c4
充滿音樂細胞的她,對不同樂器都感到很好奇。

只愛Let It Go 不愛Elsa
在台上表現成熟的Celine,台下回復小朋友真我,要做運動放電,嚷着父母帶她去迪士尼玩,不過去玩都不忘音樂,好似hit爆的迪士尼動畫電影《冰雪奇緣》(Frozen),睇完電影個個爭相扮Elsa之時,她卻留意片中soundtrack,「我最鍾意唱〈Let It Go 〉。」Celine不單止識唱成首,更唱夠五種語言!「有法文、菲律賓文、韓文,仲有國語同英文,我好鍾意啲歌,但我唔鍾意Elsa,佢有少少babylish,不過我好鍾意Olaf(雪人小白),因為佢好funny。」

Celine即場清唱〈Let It Go〉,整個房間也震動,面對我們一班陌生人,她毫不怯場,是過去兩年密密表演和比賽的訓練成果。「穩定性對大人嚟講已經好大挑戰,對一個七歲小朋友嚟講,係極大挑戰,過程離不開練習,同一首歌起碼唱100次,小朋友可能會覺得悶,但呢個就係考驗,如何唱同一首歌都搵到趣味呢?呢樣考我工夫喇,要氹到佢唱,又增加到佢興趣,令佢俾心機唱,唱到穩定。」Dr. Steve解釋。

Celine細細個就唱Celine Dion〈My Heart Will GoOn 〉、Josh Groban〈You Raised Me Up 〉及WhitneyHouston〈Power of Love〉等國際性大歌,Dr. Steve指這類大歌才能學到最多,兒歌太少,但為免她失去童真,交由學校教唱兒歌平衡一番,Celine聞言即搶答:「依家冇喇!」Dr. Steve笑她返屋企都會唱兒歌,不會覺得降呢,總之有歌唱就好好享受。Dr. Steve長遠目標想栽培女兒做專業歌手,但最重要是她每日享受唱歌,「我希望喺佢興趣中栽培佢,睇命運啦,命運可以由性格改變,暫時覺得佢性格都適合嘅。」

c5
爸爸Dr. Steve指女兒原本國語程度不高,但去完內地比賽後,國語大有進步,「小朋友吸收能力好強,佢溝通一兩日, 國語已經進步咗50%。」

中國新聲代重溫
《中國新聲代》是全國最大型童聲比賽,在湖南廣播電視台金鷹卡通衛視播出,第二季取消了名次賽,變成一個「歡唱夏令營」,21位參賽者分成三班,每班導師分別為台灣偶像歌手汪東城、內地唱作人尚雯婕和茜拉,Celine就加入了茜拉班,節目合共13星期。

4

撰文:Ling 攝影:黃大立(部分相片由受訪者提供)
化妝:Mimi [email protected] MAKEUP 髮型:[email protected] MAKEUP
場地:Art Rhapsody(tel: 3679 5365)

更多精選內容