私と生活

私と生活 北角店 精選20件$12 日式雜貨

熱話

廣告

$12蚊店愈開愈多,好似梗有一間喺左近,北角就有間「 私と生活 Watashi to Seikatsu」,屬於UNY旗下的第四間$12分店,面積為所有分店之中最大,超過5,000平方呎,家居用品及廚房用品佔大多數,仲有文具、食品、化妝品小物等等,而寵物區屬於日本寵物店This one,要留意寵物用品價錢唔係十二蚊。$12貨除咗made in China外,仲有產自日本及韓國,細心搵會發現好多性價高筍貨。今次,記者為各位爸媽巡舖,睇睇有咩啱小朋友嘅$12用品。

 

撰文︰Esther
攝影:Esther

1. 兒童膠餐具

有黑貓、獅子款,雙耳碗最啱小朋友用來食糊仔用,另有同卡通系列餐盆、杯、飯碗、正方碟仔、圓碟等等。

2. 卡通膠杯

杯,全部都係杯!半透明、白色任你揀。

3. 兒童叉匙

餐具區當然有叉匙,設計適合幼兒使用。

4. 有蓋叉匙

呢款小朋友叉匙跟個盒仔,方便外帶使用,日本製。

5. 兒童用安全刀

各位父母想跟小朋友安全咁一齊入廚,可以考慮使用兒童專用刀。

6. 咖哩包

啱小朋友口味嘅咖哩,粉紅色包裝「公主咖哩」係吞拿魚,藍色包裝「王子咖哩」係碎豬肉,每包70g細細包。

7. 食物圍巾

幼兒食嘢最好戴上食物圍巾,避免食到成身都係,另有透明膠質款選擇。

8. 卡通白襪

小朋友白襪仔低調但不失可愛,腳眼位有卡通繡花,有巴斯光年、mo仔、多莉、蜘蛛俠、marvel英雄系列任揀。

9. 男童卡通襪

店內有大量韓國製造卡通襪,幼兒襪仔有男孩最愛嘅英雄系列。

10. Hello Kitty兒童襪

Hello Kitty都有唔少款,又係Made in Korea,質量幾好。

11. 橡筋褲帶

小朋友大得快,有家長會買大少少衫褲俾仔仔女女,一於花$12入手一條伸縮橡筋褲帶。

12. 髮箍

有唔少兒童髮飾,特別推介格仔頭箍,有藍、紅選擇。

13. 兒童橡皮筋

橡筋買幾多都好易唔見,一於買一包多條夠抵用,左邊橡皮筋係日本100yen店「Seria」系列, made in Korea,據說無咁易斷,幾耐用,除咗圖中粉色系列,另有黑、啡、鮮彩顏色等等。

14.顏色筆

水筆、木顏色、粉彩盒盒都係十二蚊雞!

15. 畫簿

買咗上圖顏色筆,當然唔少得買埋畫簿,大大本畫簿內頁全部都係白紙。

16. 動物紙膠帶

記者私心推介,動物紙膠帶!記者曾經在日本「CAN DO」 100yen店購入粗身貓款,依家唔使飛去日本就買到!

17. 動物Book Stand

羊仔同小松鼠book stand都好可愛!

18. 巴士圖案雜物桶

當垃圾桶、玩具收納桶都得,巴士圖案帶有英倫feel。

19. 巴士紙箱

除咗膠桶外,仲有日本製紙箱揀,有黃巴士、紅巴士及藍巴士三款。

20. 毛巾仔

30cm x 30cm毛巾仔備有多色及唔同卡通繡花圖案選擇。

私と生活
地址:北角和富道21-53號和富薈地庫B10-B17
營業時間:星期一至日( 10am-9pm)