BB版 足料粟米肉粒飯 簡易食譜

BB版 足料粟米肉粒飯 簡易食譜

孖寶都差不多16個月, 好多時同我地出街食飯,都有機會食到好多出面重味道同唔係咁健康嘅食物, 不過無辨法啦, 呢樣野真係好難避免.

但咁又唔代表我會乜都佢地食, 係屋企食嘅話我都希望盡量可以比佢地食得健康d.

咁岩星期六午餐係出面食, 孖爸竟然話想叫粟米肉粒飯呢D佬飯來食. 所有我靈機一觸就話不如夜晚係屋企煮哂比你地3父子食啦~


通常大家整粟米肉粒飯都會用罐頭粟米來做汁, 但係老老豆豆 要我親手比罐頭孖寶食, 我又真係過唔到自己個關, 因為睇過真係太多d唔知咩嘅食物添加劑係罐頭食品內~所以我決定自己刨新鮮粟米來整呢個碟頭佬飯比3仔爺食~

唔好聽到要自己刨票米再整個汁就以為好難, 其實真係好易, 不過功夫多小小, 但為咗BBs食得有營健康無所謂啦~

BB版 粟米肉粒飯食譜


材料:


粟米: 2條 (大的)

水: 1.5碗

瘦肉: 隨你們喜歡, 切粒

鹽: 極少

糖: 極少

粟粉: 1湯匙

白飯: 適量


做法:


1/ 粟米烚 15mins, 之後其中1.5條刨粒出來磨成蓉做汁, 餘下的半條刨粒, 就咁煮食來就更加有粟米粒嘅口感啦~

2/ 將粟米蓉及之前刨出來半條嘅粟米粒粒, 放入1.5碗滾水內煮,開頭係比較稀的.一路keep住用慢火慢慢煮’結’佢


3/ 將瘦肉粒加入, 好多時大家都會喜歡加少少鹽同生粉來撈瘦肉令肉質更入味. 但因為我比BBs的就無加到呢d調味料去撈. 如果係大人食or喜歡重口味d既都可以加入返調味料來撈下d瘦肉粒. 而我因為比BBs食, 所以仲有預先將d瘦肉先出水架~

4/ 煮到肉粒熟, 就可以用好少鹽同糖入個汁來提味

5/ 當煮到個汁開始’結’身同濃個陣就可以加生粉水,分2-3次小小咁落,一路邊煮一路攪下佢. 其實用生粉/太白粉同粟粉都得, 1湯匙粉加小小水就可以了~

呢個就係我煮好嘅粟米蓉汁, 唔止可以做粟米肉粒飯, 亦可以用個汁來煮魚都得架~

我呢度就已經一次過煮咗2個BBs, 加2個大人嘅份量啦~

孖寶真係好俾面呢, 兩個都清哂, 見到佢地食得開心, 我就最開心啦, 做多小小又有咩所謂呀~


孖爸話呢款碟頭粟米肉粒佬飯無得輸呀!

我和孖寶的Facebook Page:荔枝與孖寶

我和孖寶的 Instagram IG#:laichimama

 

If there is any question or you looking for me and the boys, please feel free to contact LaiChiMaMa via Email:[email protected]

更多精選內容