鍾嘉欣 :生B後才真正明白母愛是什麼

鍾嘉欣 :生B後才真正明白母愛是什麼

鍾嘉欣 (Linda)與老公(Jeremy)結婚不久後便誕下女兒Kelly,Linda形容現在自己擁有一個Wonderful Family!現在就讓她分享甜到漏婚姻生活、8個月大女兒Kelly的性格及與她的相處吧!

 

撰文:Sunday Kiss
相片:新傳媒資料室

投入賢妻生活

Linda婚後是位好媽媽好老婆,令老公有舒適的居所:「我老公話我係好好嘅太太,我好為屋企嘅,我會準備好晒啲嘢,我老公返到屋企,好舒適㗎,有飯食啦,乾淨啦,又好錫佢啦,都細聲細氣嘅,我覺得OK㗎!」

JO9A0322拷貝

為女兒老虎都可打死幾隻

Linda當媽媽後成長了不少,從前她比較自私,不會為人設想。但有了女兒後,她變得有責任感,不再只顧自己,會為屋企人著想。「我覺得係一個快速嘅成長,因為我結完婚即刻有小朋友,所以突然成長得好快,以前廿幾歲,我比較盲舂舂唔識諗,結婚之後,唔再淨係為自己,要為屋企人諗,成熟咗好多,真真正正明白到母愛係乜嘢,以前我以為我知,同埋我演戲,以為我可以想像做媽媽係點,直至自己親身生BB、湊BB,我先明白到嗰種母愛係大到用言語係形容唔到。」

L2 17267893_1140282159414001_7294164661266546688_n

JO9A0344拷貝
拍照時邊擺pose邊笑言當上媽咪後已久未有扮靚。

生BB沒有想像般辛苦

Linda表示生BB過程沒想像中辛苦,當初她擔心順產會唔會十級痛,但到要進入產房、陣痛的時候已經開到十度快要生,卻覺得時間過得很快:「我十幾個鐘陣痛、生個半鐘,但成個過程感覺似三個鐘,眨下眼就完咗,同埋我發覺好得意,神就係創造女人生BB,所以入到產房唔會驚,只會諗要個女健康、安全生出嚟,嗰種母愛同勇敢已經蓋過咗痛。」

囡囡未改中文名

8個月大的囡囡未有中文名,Linda表示有很多選擇,但還在考慮當中,還揚言不會跟風水學改名但:「我咪慢慢諗囉,都唔急,我諗佢5歲我先會俾佢讀中文學校,每個禮拜讀一次嗰啲呢,因為我細個都係咁。」至於囡囡像誰,Linda則表示一半一半:「鼻以上似我,鼻以下似爹哋。」

L3 15802164_711244925697783_6395451138354708480_n

有計劃生多個

閒時老公亦會幫忙照顧女兒,一家人喜歡留在家休息。「我哋兩個都好鍾意留喺屋企,冇去遊山玩水,商場都少去,我哋最多都係附近行下,好少有咩活動。」 他們更希望將來可以有多一個小朋友: 「我哋有計劃嘅,希望將來可以有多一個小朋友。唔知幾時,但希望Kelly起碼一歲半後先開始試。」

17438447_272900093168958_5573537828333158400_n
直言生B後記性比前差,訪問中,會突然忘記想說甚麼,「真係失憶,我成日喺屋企擺埋啲嘢唔記得。」

女兒超級乖

Linda表示女兒超級、超級乖,唔扭計、唔喊:「囡囡除咗夜晚臨瞓前會喊三、四分鐘,跟住自己就瞓,瞓八個、十個鐘就起身,同埋我覺得佢係思想型嘅,點解呢?因為佢唔介意冇人陪,我要煮飯、處理家頭細務,唔得閒下下抱住佢,我亦都唔想縱壞佢,我每朝起身,幫佢換完尿片,擺佢喺play mat,俾啲公仔佢,佢就自己玩一餐,所以我覺得佢鍾意喺自己世界、鍾意自己諗嘢。」

Linda會做個relax和casual的媽媽,不會一開始就計劃要讀什麼學校,希望女兒能夠自己玩、在自己世界create一啲嘢,不要太依賴:「依家佢太細,我想觀察佢多啲,唔想咁早要佢學嘢,我諗番我細個屋企環境唔係咁好,冇得學任何嘢,依家我覺得我哋性格、工作任何嘢都OK吖,好似我細個原來已經鍾意演戲,爸爸媽媽返工,我會摷曬我阿媽啲絲巾綁喺個頭扮女俠,又扮拍拖、分手、唱歌,所以我哋想留意佢、觀察佢,發掘佢嘅喜好,到時先慢慢俾佢學, 唔會一嚟乜都學曬,我覺得會over咗。 」

待女兒長大後,Linda亦會讓女兒看自己的劇集:「可能俾《搜神傳》佢睇,係我入行第三部劇,訊息好好,可以教佢點孝順父母同樂觀面對人生。 」

16229051_586990001502964_5300011259834400768_n 16122727_162896514204288_3515561109803237376_n

餵人奶好處多

Linda鼓勵所有嘅媽咪餵人奶,因為好處實在太多:「每日可以減到五百個卡路里,唔使做運動,我餵咗將近8個月,已經修曬身嘞!」各位新手媽媽不防試試!

JO9A0284拷貝
產後極速修身,「因為餵人奶,Kelly五個月大我已經回復產前身形。」

與老公Coffee Shop邂逅

Linda和老公在香港一間coffee shop認識,Jeremy認識Linda家姐,剛巧來港旅行探親,便認識了Linda:「我去見佢都唔係諗拍拖,係諗住識下新朋友,見到面,佢滿口英文、加拿大人,我見咗佢半個鐘,好舒服,傾傾傾,傾到停唔到,之後我夠鐘要走,行出coffee shop,佢問我地鐵站點去,我突然醒起:『死嘞,呢度中環嚟㗎,好多記者㗎!』嗰排我好多新聞,費事影到相會被炒作,就跑走咗,冇教到佢點搭地鐵,因為咁我覺得自己好衰,專登搵佢say sorry,之後開始聯絡。」其後他們拍拖9個月便結婚了。

L1
脊醫丈夫Jeremy。

Linda認為自己不是閃婚,因為她和老公年紀都是適婚年齡,大家都比較成熟,而且大家的性格好配合,所以都認定了彼此,加上已認識了一段時間認識才結婚:「傾偈傾咗幾日,已經有感覺,當然冇同佢講『我覺得你係我將來老公』,但心裏面已經keep住呢個感覺。」

喜劇形式的求婚過程

Linda表示求婚過程不浪漫,但她已經感動到喊了:「因為佢唔係浪漫嘅人,佢用誠意,中間有好多蝦碌嘅嘢,佢又好緊張,又跪地,跟住有人嚟,驚有人影到,起番身,好多蝦碌、好好笑,反而我覺得呢個求婚嘅片段係喜劇形式。」

JO9A0291
熱愛唱歌,直言甚或比演戲更甚:「之前結婚我作咗歌俾老公,其實依家我都作咗啲歌俾Kelly,希望可以錄嚟送俾佢。」

 

讚老公靚仔穩重

Linda表示欣賞老公整個人,而且是她心目中最靚仔的:「佢喺我心目中係最靚仔,佢唔係情緒型,我係情緒化啲,佢係好穩重,穩到令到我都穩埋一份,佢永遠無論發生咩突發事件或者開心唔開心嘅事,佢唔會俾佢嘅情緒帶動到,佢會好清晰地解決或者做事,呢方面嘅淡定我覺得係好吸引。」

更多精選內容