林盛斌 Bob :冇刻意追仔 亦無意封肚

林盛斌 Bob :冇刻意追仔 亦無意封肚

近年瓣數超多的林盛斌( Bob ), 細訴事業低潮及抱負,又說到跟家人的相處種種,而近日宣布太太陀B的他,聲言並非刻意追仔。

 

編輯:Sunday Kiss
攝影:Issac

(內容節錄至1013期東方新地)

自言冇諗過入娛樂圈 機緣巧合入新城

林盛斌( Bob )最近超多瓣數,成日都見到佢。 Bob 係訪問入面就話14年開咗自己嘅工作室,做廣告、設計、marketing,自己一向有啲騷,TVB有啲節目要拍,又有啲廣告傾緊續約。雖然自己仲係娛樂圈打滾,但其實以前自己冇諗過會入娛樂圈,淨係希望有份工每個月有好好嘅收入。 Bob 大學係讀建築,成績好好,又因為我喺學校做好多歌唱比賽、跳舞、比賽司儀成為學校嘅風頭躉,阿Sir諗住推薦 Bob 入大行做,同時間新城電台請佢做Sales, Bob 又覺得做Sales可以搵多啲錢,咁就入咗新城。有啲人話 Bob 喺《玩嘢王》即場應變快, Bob 就話,其實因為過去十幾年做司儀都會遇到太多突發事件,所以一見到執生位,就可以發揮得到。

9515
林盛斌(Bob )近年超多瓣數,好容易係螢光幕上面見到佢。

試過差唔多九個月冇工開

看似星途順利,但係 Bob 都試過經歷低潮。「當然有一啲過程,都有低潮,但未去到戶口得幾十蚊,因為我始終有份正職,喺電影、電視任何範疇做得唔夠好,始終有份電台、有啲司儀job做,但唔暢順、被人拉住、set啲障礙當然會有,我啱啱入電視台第一年,過得好開心,因為所有嘢都好新,做《兄弟幫》網上點擊直情贏埋啲劇集,第二年開始有機會做翡翠台嘅嘢,更加感恩,」

但係突然之間電視台高層變動、自己負面新聞纏身,令到自己差唔多九個月冇工開。「但去到12年,(無綫)有啲高層變動,令到我差唔多九個月冇機會做其他嘢,連做嘉賓都冇機會,嗰時又有我買色情光碟、揼邪骨嘅負面新聞,我冇諗過呢啲地方好敏感,嗰次對我好大教訓,幾樣嘢加埋,令到我機會更加少,好彩嗰時咁啱王祖藍組隊拍《老表,你好嘢!》,播出嘅時候幾受歡迎,咁啱又有《玩嘢王》,幾樣嘢加埋,令到TVB一啲高層覺得可以再畀多啲機會我試。」

b1
對多次醉酒鬧事,深感懊悔,「我想 講我唔係好鍾意飲酒,我屋企一杯酒都冇,嗰幾次婚宴,我冇咗警覺,第一次見阿 Bob 飲醉可能覺得好笑啫,但第二次、第三次就唔係,呢方面我要再小心啲!」

寧願你覺得我假

被問到而家紅咗會唔會迷失同囂張, Bob 就話覺得自己處理得幾好。佢就話以前做司儀試過喺垃圾房嗰條後巷食飯、換衫等出場,到依家,對呢啲嘢有多少少要求,會要求可唔可以安排間房,過澳門做嘢,要求安排豪華位,坐得舒服啲、休息吓,但遠遠未去到囂呢一個字。「我老婆有講過,佢話:『你注意吓,你依家嘅氣場比以前唔同咗,有啲人會覺得你惡咗,因為你依家比以前嘅影響力大咗少少,你嘅知名度又高咗啲,你應該更加小心啲!』所以我會好小心,我寧願你覺得我假,我都唔想你話我寸。」

Bob 就表示唔覺得自己紅,只係機會多。佢話自己扮嘢無咩底線,覺得有時反串吓、扮吓騎呢,個客又會開心啲,觀眾又覺得好笑啲。而且身處娛樂圈目的係娛樂人,唔使有太多框,件事係善意,相信好多artist係唔介意你扮佢。但當然要尊重返個artist,好似扮家燕姐,唔會做啲色情嘅嘢,唔會做同佢個人好違背嘅嘢。「但如果你要我扮傷殘或者弱能人士出嚟引人笑,而唔係做緊戲,我會覺得有問題,我唔會做,喺唔好傷害到人嘅情況下,為我嘅底線。」

b3
多個搞鬼扮相令人印象深刻。

客戶因我個樣福相而搵我做嘢

試過有客同 Bob 講,本來搵開佢,但有年冇搵,搵咗第二個,唔係佢做得唔好,但跟住嗰年個客嘅生意好差。 Bob 雖然覺得誇張,但就希望自己嘅磁場真係同佢哋公司夾,令佢哋生意興隆。

9479
近年開始信佛,「可能因為宗教,同有家庭,我覺得我依家個樣比零幾年出道嗰陣係好啲!」

屋企人係底線

Bob 覺得自己係唔合格嘅老公同爸爸,因為自己忙,結婚十年都冇同老婆去過一次旅行,所以三月尾趁住要去日本出席朋友嘅婚禮,同老婆留多幾日玩吓。「作為老公、爸爸,畀到舒適安穩嘅生活,我覺得我都OK、優良,但時間付出,真係唔合格。」

因為自己陪佢哋嘅時間已經少,如果仲擺出一副訓導主任嘅嘴臉,小朋友會覺得個老竇好冇癮。所以 Bob 老婆係屬於訓導主任多啲、嚴厲啲, Bob 就屬於「康樂組」,阿媽唔畀食嗰啲違禁品,薯片、可樂、雪糕同爸爸出到去就喪食。

提及有網民留言話佢「生啲女都係個樣低低地⋯⋯無仔送終」, Bob 嘅回應被好多網民讚佢EQ高。 Bob 就話嗰次睇到呢個留言,覺得過分咗,呢個亦都係我嘅底線。「話『見到我想嘔,見到呢個肥仔想死,吔蕉啦!』我OK,但都唔使話我幾個女個樣有問題,話我冇仔送終,做乜嘢呀?傷害到我屋企人係我嘅底線,有啲朋友話已經起咗佢底,我話唔好呀,佢咁攻擊我,你又攻擊番佢,咁同佢咪一樣!」

b2
近日回應網民攻擊性留言,被指EQ高。

冇刻意追仔 亦無意封肚

Bob 近日宣佈太太懷B仔五個月,佢話收到多謝好多朋友、家人、網友好多祝福,覺得好開心。被問到點解懷孕五個月先講,係因為佢同太太都想穩定啲先講。「因為舊年十月都試過有BB,但陀咗兩、三個禮拜就小產咗。今次係囝囝,但真係冇刻意嘅心去追仔,所以冇特別話要封肚,可能生完遲啲覺得身體狀態、心理狀態許可,再生都未定,因為我同太太都非常鍾意小朋友。」

b6
育有三女的Bob,近日宣布太太懷B 仔五個月。

 

住加多利山 希望太太小孩住得開心

Bob 對加多利山呢個地方好有fantasy,「我同我太太搬出嚟住,住喺女人街,一個百零二百呎嘅單位,嗰時已經會睇吓樓,太平道、勝利道,如果再貴啲呢?加多利道,邊個住?劉德華、陳慧琳⋯⋯已經有fantasy,到我慢慢買啲物業,家庭成員又再多啲,要搬大啲,我同地產經紀講想要大啲嘅單位,唔介意租,佢問我睇唔睇加多利山,去到,一打開門,幾個女周圍走,『嘩,好大呀!』已經講晒邊個瞓邊間房、邊度可以擺滑梯,我老婆識少少風水,一望個廚房,直情係佢夢寐已求,因為女人喺間屋有冇地位就係睇個廚房,佢又鍾意煮嘢食,跟住問幾多錢,諗一諗,租啦,搵得番嘅!」 Bob 就表示唔係要攀附咩貴價地方,而係希望太太住得開心,幾個女多啲活動空間。作為老公有時返到去,屋企人已經瞓晒,打開房門,見到三個女瞓到好冧、老婆好歎咁,就覺得,作為老公、爸爸,令到佢哋有開心、舒適生活,自己都會感動。

b4
最近趁出席友人婚禮,跟太太順道遊日,「十年嚟,最遠同佢去過澳門,(太太)咁都忍到,認真唔話得!」

4女1仔大壓力 為屋企人捱落去

養小朋友係一個好大壓力嘅事,何況係5個小朋友。 Bob 就話,唔係計一個月要有幾多支出,要搵幾多錢嘅收入,而係呢行係,當你行得正企得正,唔知做錯咗咩或者講錯一句說話,可能半年或者幾個月冇嘢做,突然受傷,手停口停,呢個壓力係好大,所以自己好積穀防饑,儲錢又好、投資啲磚頭收租,都係想有穩定嘅收入,就算明知個job辛苦、好難做、唔多錢,但個機會係會令到自己再上一級、進步,佢都會做,呢樣嘅壓力係大,但係成個家庭真係好需要自己,所以要頂住,唔可以冧落嚟。

b5
1家5口就嚟變做1家6口

開娛樂公司係後着

Bob 除咗做藝人之外,仲有開娛樂公司時裝店。佢就話間娛樂公司係佢好重要嘅一個基地,只要佢好,呢間公司就會好,呢間公司只要再好啲,佢又會更好,所以Bob好全心去做,開始投資一啲騷、演唱會,慢慢有多啲event做,多啲大嘅客戶,兩年幾,都做咗成百幾個客。Bob 就表示好有發展嘅空間,呢個係我好重要嘅一個後着,因為有一日自己唔知衰乜,或者唔想做幕前,都有呢個基地畀佢繼續發揮,因為以前都係做sales,所以自己喺呢間公司可以做番sales,同埋自己嘅career path, 呢間公司都幫佢慢慢設計緊, 譬如Talk Show。「如果唔係呢間公司,我未必會開,因為我對自己唔夠信心,係我啲partner、手足鼓勵我,我至去做,結果兩場伊館full house、超多sponsor,贊助商開心、投資方賺錢,所以一定要有呢班人喺度。」

9533
由電台、電視主持、到拍劇、孭飛電影男一、擔正為夢工場動畫配音,阿Bob指依然在嘗試創造更多可能。

做婚禮司儀 代入感大

被問到做咁多司儀有冇咩好難忘嘅經驗, Bob 就話做婚禮司儀感受好大。「近呢兩、三年,唔知係咪人大咗,有時做婚禮司儀,我嘅感受好大,特別係新娘子講多謝爸爸,因為我自己三個女,每次啲新娘子多謝爸爸,我成個靈魂代入咗外父個位,試過有個新娘子講到我都喊,佢係老竇單親湊大,個女講:『我真係好多謝你,我好希望,如果可以下世再做你個女!』嘩,啲親戚喊到,我都好感動,我都諗如果有日我啲女結婚,講:『多謝爸爸, 你真係好好,Thank you!』我唔想佢哋咁hea走我,起碼講番分零鐘同我有關。」

另外, Bob 又提及好難忘自己做港姐決賽司儀嘅經驗,但嗰次覺得自己有能力不足。「嗰晚我同叻哥(陳百祥)夾,農夫同嘟姐(鄭裕玲)夾,我好明顯感覺到農夫同嘟姐個chemistry,完騷,我同農夫講覺得做得唔夠好,陸永話:『我哋同嘟姐夾咗咁耐,你自己已經可以獨當一面,你唔使partner都得!』我好多謝佢咁講,可能佢安慰我,但我亦諗,做司儀可能有個partner會好啲,未來我會努力搵吓有冇有火花嘅人喺我身邊出現。

更多精選內容