最懂撒嬌的女人 王菀之

最懂撒嬌的女人 王菀之

王菀之 (Ivana)同張敬軒早前為演唱會DVD舉行完簽唱會後,Ivana終於有時間同「Figure王」老公蘇卓航(Eric)去旅行放吓假喇,仲分享咗一條兩公婆喺泰國坐Tuk-Tuk嘅片,雞仔聲嘅Ivana仲同老公撒嬌,隔住個mon都覺得甜到漏呀!

撰文:Sunday Kiss

圖片:Facebook、Instagram、新傳媒圖片庫

孖住老公放假去旅行

Ivana喺2015年同拍拖兩年半嘅Eric喺光棍節11月11日結婚,眨吓眼都就快兩年喇,近日Ivana就襯忙完有少少時間,就同老公Eric一齊去泰國旅行,齊齊relax吓!Ivana仲喺facebook share咗一段兩公婆坐Tuk-Tuk嘅絕密片段添,留言話:「考慮咗一陣,決定都係post,因為我自己都睇得好開心⋯ 同埋唔好意思,語氣係過份嗲咗少少,畢竟條片原本只屬私人珍藏!」

最懂撒嬌的女人

片段中,Ivana同Eric排排坐,不過車速就快咗啲,勁過香港啲紅VAN,嚇到Ivana不斷同老公講嘢分散注意力。佢一開頭就用把嬌嗲嘅聲同Eric講:「好似好危險咁嘅啲Tuk-Tuk,好快喎!」Eric就話係呀,Ivana就扁嘴話唔中意呀,想叫司機開慢啲喎!不過,期間Ivana聽到Tuk-Tuk引擎發出嘅聲音,轉個頭仲扮埋嗰啲引擎聲,頑皮得嚟非常可愛!Eric仲叫佢拍片要小心啲,全程捉到Ivana實一實,極之體貼。一分鐘都唔使就返到酒店,Ivana最後仲話好好玩!成個過程留意到Eric對Ivana嘅「撒嬌」非常受落,網民都紛紛留言大讚Ivana好cute,仲話佢係「最懂撒嬌的女人」呀!

兩公婆最夾係眼細?

有網民仲讚埋老公Eric話佢係世界上最好嘅老公,難得有男人不強求妻子扮成熟,反而欣賞佢嘅傻氣,羨慕Ivana係一個好幸福嘅女人。Ivana同Eric結婚兩年,仲keep住咁sweet,全因佢哋兩個其實有好多好夾嘅地方,Ivana笑言最似係大家都眼細:「大家都好聚焦,佢就聚落figure度,我就聚落啲音符度,所以好夾,哈哈!大家都好鍾意藝術,由買書到去旅行至到平 時做嘢花嘅時間都係喺創作度,佢創作佢嘅藝術品,我做我自己creative嘅project,到分享嘅時候就有好多嘢傾,價值觀就會好相同。」

難以忘記的求婚

好多情侶無論價值觀幾相似、相處幾夾,都未必會會進入人生另一個階段,問到Ivana當初點解會結婚,佢話:「佢(Eric)求婚我咪結囉!」唔好以為係個係一個好hea嘅答案,Ivana憶起當時求婚嘅過程仲好感動:「(當年)4月18號佢喺韓國有展覽,第二日係金像獎我要返香港先,好唔捨得,我去機場嗰陣,佢突然求婚,我攞住隻戒指好驚,猛問點解會咁,成程機個人空白咁,未process到件事,係咁喊,個激動到依家都好深刻。」

簡單的婚禮 由心而發的快樂

提到Ivana整個婚禮都一切從簡,問佢點解唔大排筵席擺酒,佢就話:「第一,我自己個人唔做嘢嘅時候都係有啲怕醜同低調,第二,做artist呢行好多去event、 function同飲宴嘅機會,到自己嘅大日子冇咁fancy將佢變為好多嘢嘅一個節目,反而好想簡簡單單,譬如着婚紗平時做嘢都着過,對呢啲 fantasy會減低咗。朋友會個別再BBQ、飲嘢或者旅行慶祝。」就算沒有豪華布置或筵開百多席,婚紗禮服也來得平易近人,原來所有的開心也是從心自發出來,快樂可以來得簡單和直接。

 

更多精選內容