愛煮媽媽 陳彥琳 食療養生之道

愛煮媽媽 陳彥琳 食療養生之道

做人如果無夢想,同條鹹魚有咩分別?曾任職投資銀行七年,年賺幾百萬的 陳彥琳 (琳琳Alvina),遇上一名上市公司主席的大客,他說出一句:「我身家只有10億美金。」只有10億美金?還嫌不夠多?他指別家上市公司主席的身家有100億美金,這才是有錢人。琳琳聞言感到驚訝,開始思考賺錢的意義,甚麼才是生命的重點。琳琳為了尋找答案,熱愛下廚的她決定放自己一個無薪大假休息,去法國巴黎藍帶學廚,更以第一名畢業,上台攞獎一刻感覺有鼓推動力:對,這就是我應走的路。

從金融走入廚房,已婚的琳琳在事業上找到理想,下一步就渴望生小孩組織家庭,從懷孕前的助孕療程、生BB後的坐月調理,到後來湊仔壓力大生濕疹,琳琳都經歷了多次的飲食調理,令她學識到一套飲食之道,她希望慢慢傳授予一對仔女,齊齊建立健康的飲食生活。

●撰文:Ling
●攝影:Simpson Chiu(部分相片由受訪者提供)
●場地:Something Wild the Farm 野玩田店 (tel: 3755 4899)

女廚神陳彥琳在烹飪工作以外, 另有家族生意的工作,主要協助社企、醫院、農場等提升效率及永續性,發揮社會的影響力,與自己的理念不謀而合。
女廚神陳彥琳在烹飪工作以外, 另有家族生意的工作,主要協助社企、醫院、農場等提升效率及永續性,發揮社會的影響力,與自己的理念不謀而合。

進食太寒 難有BB

白領階級日日朝九晚五坐office,午飯時間一小時,經常匆匆忙忙扒飯,OL怕肥就會買沙律當正餐,甚至咬個包就算,仍在投資銀行工作的琳琳都一樣。「當時我怕肥成日食沙律等生冷嘢,食到個人好寒,加上捱更抵夜令身體好虛,面色較差,成日喉嚨唔舒服,又鼻敏感。」

2
自小熱愛入廚的琳琳,大學畢業後遇上金融風暴難搵工,難得有投資銀行聘請,惟有先放下學廚的夢想投身工作,一做七年,並開始思考賺錢的意義,決定放下工作追求未圓的夢想,到法國巴黎藍帶學廚,更奪得第一名,找到自己的人生方向。

婚後琳琳與丈夫想生小孩,只有廿多歲的她努力了半年仍未有聲氣,要找中醫求助,接受艾灸療法調理身體,艾灸即點燃艾草時發出的藥力,去薰灼穴位以達功效。「療程主要暖子宮及肺部,配合改善飲食習慣,朝早用薑粉沖水,或者切幾片薑浸水飲,仲多咗出去曬太陽,成日留喺冷氣房會令到個人好凍。」琳琳的身體慢慢暖和,持續九個月左右就成功懷孕,2012年誕下女兒,兩年後再誕下兒子,湊成一對「好」字。

琳琳放棄高薪厚職轉行做廚師的故事,被銀行睇中拍成廣告,現周不時在街上見到琳琳的廣告。
琳琳放棄高薪厚職轉行做廚師的故事,被銀行睇中拍成廣告,現周不時在街上見到琳琳的廣告。

坐月100日 改善體質

琳琳的第一胎就如很多媽媽只坐一個月,期間跟足傳統坐月食療,包括食五更飯、炒米茶、湯水等等,但六月誕女的琳琳,坐月後在夏天大解放,雪糕、凍飲統統放入口,身體很快又發出警號。「過咗一段時間後,身體好易感冒,我以為自己坐月坐得好,原來都麻麻哋。」

4
琳琳教小朋友要識種惜食, 明白食物從何來,就會學懂珍惜食物。

有了首次經驗,琳琳誕第二胎後,決定坐月坐足100日,果真有明顯分別。「嗰100日我完全唔掂凍嘢,坐月食療跟到足,體質真係好咗好多,好少病。間唔中食吓凍嘢OK,但自己已經唔係18、22,為養生都盡量少食凍嘢,做完運動都要飲室溫水。」

琳琳形容現年4歲大的囡囡性格好動,邏輯性強,會自己發明小玩具去玩; 而2歲囝囝比較斯文,擅於表達自己。

紅菜頭寒涼 不宜多吃

對於小朋友的飲食,有段時間琳琳較崇尚西餐,常煮紅菜頭等菜式給囡囡,後來她發覺囡囡常流鼻水、感冒,從飲食中了解下,才發覺紅菜頭十分寒涼,不宜吃得過多。「食所有嘢都要取個平衡,好似天氣乾燥,我會煲蘋果雪耳南北杏畀小朋友飲,食生果就食室溫,唔會喺雪櫃拎出嚟凍食。」

琳琳強調不能讓小朋友食太多冰凍食物,尤其天氣炎熱下,小朋友玩到身水身汗,更不能把凍飲一喝而下去衝擊發熱的身體。「即刻飲凍嘢對個肺好傷,對身體衝擊好大,應該等身體cool down咗先飲,啱啱玩完就先飲溫水。」不過小朋友都渴望淺嘗凍飲及雪糕,究竟幾時先可以食呢?「喺小朋友玩之前,大約12點1點午飯後正值陽氣最盛之時,可以畀小朋友食雪糕,之後再飲番啲暖水。」

6
琳琳受媽媽影響,自小教導仔女相親相愛,「我媽咪自小同我講:妹妹係我最好嘅朋友。依家我都同仔女講同一番說話,同家姐講要照顧細佬,同細佬就話家姐係女仔,你身為男仔都要照顧家姐呀。」

無麩質無糖無奶 根治濕疹

飲食均勻是琳琳安排家庭餐單的大原則,即使小朋友喜歡食麵,都不能餐餐食,可以每日一餐麵、一餐飯。「米飯係好重要,好似一條輸送帶將營養送到身體不同地方,好有米氣,所以我要確保小朋友每日要最少食一餐飯。」

7
在港台節目《窮富翁大作戰III》中,琳琳跟一個低收入家庭住板間房,照顧兩個小朋友的起居飲食。

曾受濕疹問題困擾的琳琳,現希望在家推行gluten free即無麩質的家庭餐單,減少進食容易致敏的食物。自細仔出世後,琳琳要湊兩個小朋友感到好大壓力,導致身體機能失衡。「我塊面突然起咗好勁嘅濕疹,有三個月我無論睇中醫、西醫都無用,之後我食一個gluten free、sugar free、dairy free(無麩質、無糖、無奶)嘅餐單,加上一星期五日跑步流汗,卒之我完全戒甩咗濕疹,身體仲精神咗好多,提高埋工作效率。」

琳琳指進食該餐單三個月後已大大改善,為了徹底戒甩她再堅持多三個月, 總共花了半年勁減17磅,濕疹拜拜,即使恢復進食少量gluten食物,都沒有翻發。「我依家有限度食番,好似以前食雲吞麵,依家會叫雲吞米;去西餐廳以前食意粉,依家叫risotto。」琳琳親身體驗過這種餐單後,相信身體毋須吸收太多容易致敏的物質,所以她希望家人可以少食一點,飲奶則以羊奶、米奶取代。

8
琳琳不時上TVB 的飲食節目做嘉實,交流飲食心得。

9

囡囡10個月展廚房教育

上一代父母覺得廚房「機關重重」好危險,不讓仔女入廚房,隨着時代觀念變遷,新一代父母皆樂於親子入廚。身為藍帶名廚的琳琳亦以廚房作身教,早於囡囡10個月大就展開廚房教育,讓她洗米接觸食材,刺激其感官,訓練小肌肉。不過,琳琳定下了一條廚房規條,全家須嚴格遵守:當小朋友要入廚房,必須先收起所有刀;如果把刀未洗,就要先放昇盤,絕不能放枱面!

10
琳琳早於仔女10個月大就讓他們入廚房幫手,進行廚房教育,不過她笑稱未覺得仔女有廚藝天份,但女兒對下廚有自己創新的想法。

現已4歲半的囡囡儼如媽媽的廚房小幫手,懂得炒菜、炒豬頸肉。「佢會擔張凳仔企高幫我炒菜,我切好晒材料畀佢放入去炒,我都有教佢簡單嘅烹飪技巧,好似發蛋,畀佢打爛隻蛋發兩發,拎去蒸水蛋,呢啲都係好簡單嘅嘢。」還有包雲吞、包春卷、焗蛋糕等,都是簡單有趣的親子廚房之選。

營養與價錢不成正比

想小朋友食得開心有營養,根本毋須付出昂貴金錢,琳琳強調「營養與價錢不成正比」,曾見過有家長認為小朋友要有肉食才夠營養,琳琳反指肉類應少食為妙。「其實世衞報告指出,食肉太多會增加致癌風險,加工肉仲係一級致癌物。肉類含有豐富蛋白質,其實好多食物都可以吸收到,好似豆腐、蛋都有。」鮑魚、龍蝦、魚翅、黑松露的營養價值有多高?石斑魚是否比紅衫魚有營養?家長可以從中反思。

11
琳琳去年再為港台節目《早辰‧早晨》探訪住劏房的家庭,為他們炮製既便宜,營養價值又高的早餐。

小朋友飲食貼士

•每天最少食一餐飯,要夠米氣。
•飲食均衡,少食寒涼食物如紅菜頭。
• 少喝凍飲,尤其玩樂後身體太熱,不應即喝凍飲衝擊身體。

•午飯後陽氣盛可淺嘗雪糕,之後再飲暖水。
• 少食加工食品如午餐肉,應多吃新鮮食材,有機食品更佳。

13
只要肯花心思,廚餘都可以變美食!

食譜分享︰啤啤熊豆腐米餅

12

材料:
(7個啤啤熊,每個約40g和7朵小耳)
200克已煮熟飯(可把隔夜飯蒸熱)
30克紅蘿蔔
2-3棵菜心
200克硬豆腐(菜市場有售)
2湯匙生粉

做法:
1. 硬豆腐隔水蒸20-30分鐘。紅蘿蔔和菜心切碎。
2. 用手或叉壓碎豆腐,加入飯、紅蘿蔔和菜心拌勻,並加鹽調味。
3. 用手把材料塑成7 個大餅和7 個小餅。
4. 在不黏鍋加入油,每邊煎2-3分鐘。
5. 把小餅切一半放在大餅兩邊做「耳朵」,啤啤熊便形成了!

小貼士: 如沒有剛煮熟的米飯,也可使用隔夜飯,只需將隔夜飯蒸熱便可與豆腐混合。

更多精選內容