被指五億駙馬 黎諾懿 :我唔靠外家

被指五億駙馬 黎諾懿 :我唔靠外家

黎諾懿 榮升新手爸爸,仲經常大晒同囝囝的影片,他接受訪問時,大談事業高低潮之餘,仲分享娶了出身富裕的太太而被指「五億駙馬」的看法!

(節錄至1016期東方新地)

攝影:Clay Lam

14年前拍《四葉草》 發展有高有低

黎諾懿 14年前拍《當四葉草碰上劍尖時》,這14年來,發展得有高有低,佢話呢五年過得非常舒服同順利,自從《舞動奇蹟》僥倖攞咗冠軍開始,跟住《愛.回家》,之後一直嘅角色都好舒服、好順利。

freelance0505jay13046

相信自己係劉德華

被問到由被力捧到調去做兒童節目,眼見其餘奧運五星林峯、吳卓羲、黃宗澤、馬國明和陳鍵鋒被力捧,當時心情點, 黎諾懿 就話:「冇唔開心就假,人與人之間點會冇比較,但有啲嘢真係冇得撒賴,點解觀眾鍾意林峯、吳卓羲,而唔係鍾意你?依家資訊年代,觀眾會好多評論,唔得真係要接受,要諗方法追趕失去嘅嘢。每個人都有所謂嘅開竅,以前年少氣盛,覺得係人哋唔識欣賞啫,仲要堅持自己嗰套,依家當然識諗,會覺得成長得比其他人慢啲啫,唔緊要嘅,呢行都係鬥長命啫,最緊要做到自己鍾意做嘅嘢,最後能夠去到終點,我覺得OK 啦。」但係佢冇諗過放棄,一方面覺得洗濕咗個頭不如洗埋落去,劉德華都捱過自己都得;另一方面心知演員轉行好難,所以每次有想走嘅念頭,好快都打消咗。

 

freelance0505jay13077
常被跟其餘奧運五星林峯、吳卓羲、黃宗澤、馬國明和陳鍵鋒作比較,笑言:「六個之中得我結咗婚誕下一子,呢樣我叻仔啲!」

經歷過唔同低潮 亦試過捱窮

黎諾懿喺唔同時間經歷過唔同低潮,《舞動奇蹟》之前,覺得嗰八、九年做極都好似冇乜起色,主角又唔到你,第二又唔到自己,好想放棄,佢有諗過不如走啦,算啦,都十年咯,不如出去做啲正經嘢,但當佢想放棄之際,《舞動奇蹟》就出現,一個唔識跳舞嘅人,覺得橫豎都係,不如就做啲唔識嘅嘢,同埋嗰時主要因為錢點而做依個節目。

freelance0505jay13057
被指跟陳百強、陳曉東及鄭伊健相像,「我唯一見過陳百強88年演唱會一張poster,覺得側面有啲似,陳曉東、鄭伊健我就覺得唔似。」

「你都明白國內畀到嘅錢同香港畀嘅錢係天壤之別,我覺得不如臨走賺埋啲錢就走啦,因為四集嘅酬勞我覺得都幾OK,去跳識到金晨(《無心法師》女主角),佢當時都冇人識,兩個由零跳到攞到冠軍,呢個經歷到依家都覺得刻骨銘心,亦係喺娛樂圈其中最開心一個階段,如果冇贏到,我相信我已經唔知去咗邊。《舞》之後到《愛.回家》,亦都冇諗過《愛》一路拍咗996集,足足四年半,好多時大家都唔覺得 黎諾懿 係 黎諾懿 ,覺得 黎諾懿 係馬壯,出街食飯,啲人叫我馬生,做一個角色做到咁,覺得係成功嘅,但係當馬壯咁犀利,另一個問題出現,無論做咩角色,人哋都覺得你係馬壯,又係另一個樽頸嘅時候,演員好得意,做得成功,又要抹甩佢,去做第二樣嘢,好慶幸天時地利人和配合,有《不懂撒嬌的女人》可以畀人抹走馬壯。」

感激有「馬壯」這個角色

無論業界或者外間都會覺得八點檔嘅演員好似低咗檔,但黎諾懿 入過兒童組、又入過處境劇、正劇,一般人覺得做處境劇朝九晚六好舒服、講吓對白口水戲好簡單,黎諾懿就話,做處境劇演員一至日都要開工,今個禮拜要拍定兩個禮拜後出街嘅嘢,要不斷改,要緊貼出街時候嘅話題,拍正劇可以病,拍處境劇係唔可以,一日拍十場、廿場,正劇一日先拍兩、三場,workload 係大好多,同埋節奏係好難控制,所以唔好睇小覺得容易嘅嘢。

始終 黎諾懿 有四年幾做緊馬壯,當馬壯喺香港市民心目中有個形象,無論跟住嘅角色幾衰都好,觀眾都會覺得馬壯扮緊一個壞人,覺得佢好曳、有一點可愛,而唔係覺得討厭。「所以真係好多謝《愛•回家》呢四年幾將馬壯打咗入觀眾嘅心。」

我太太垂涎我嘅美色、追我,哈哈!

係拍《讀心神探》嗰陣,周美欣介紹太太比 黎諾懿 識,「有幾次約出嚟食飯,我太太垂涎我嘅美色、追我,哈哈!我太太係非常之好
嘅女仔,單純、好,咁啱我同佢都單身,好自然行埋一齊。」

freelance0505jay13120
問到妻子可有興趣再任幕前,「我係唔容許,唔係佢想唔想,係我唔畀,因為呢行比較辛苦啲,一個家族入面一個做就夠,太太留喺屋企享吓福OK㗎啦,辛苦嘢留番畀我做啦!」

有人話 黎諾懿 係五億駙馬,連婚禮開支都係外家比,仲送樓畀佢哋,黎諾懿就話 當初並唔知太太家境,第一次去佢屋企,都覺得有啲嘩然,但時間可以證明一切,「如果我識咗佢,我唔做嘢就話啫,但當然依家好多人都覺得我孭住五億駙馬嘅身份,但我成日都話我太太嘅身家、歷史我改變唔到,我係鍾意我太太個人,其他人點講我都冇乜所謂,亦唔介意,我太太、我爹哋媽咪、佢爹哋媽咪理解就夠,我亦都唔需要同任何人交代。留畀時間證明,我有做嘢,我又唔係靠外家,有幾多億都分唔到畀我,駙馬係名稱嚟嘅啫!」

new
因為老婆一句想要,就操出六嚿腹肌拍婚照。

黎諾懿 亦強調外家並無送樓畀佢哋,但明白娛樂圈就係咁。「係嘅我就唔使咁辛苦啦,最緊要屋企人知就夠,其實樓嘅嘢一check 已經知唔係,但我都明呢行係寫呢啲,唔通寫我好畀心機睇劇本咩?冇人會想睇啦!」

信風水 求婚唔浪漫

「我本身篤信玄學,有日,風水師同我講要結婚,唔係就要三年後,太太嗰時瞓喺我側邊,我就叫醒太太話結婚嘞,佢話哦,咁結囉!冇求婚!太太叫我買求婚戒指,幾個鐘後,太太話:『都係唔好,戴一世㗎,我信唔過你啲taste,我去揀完,你去畀錢啦!』之後仲要去餐廳扮求婚,我同太太講:『你都知嚟做咩,戒指你又見過,你覺得有咩驚喜呢?』佢話:『我唔理,你要做番。』求完,佢話:『都唔浪漫嘅!』我話你都知道晒,係唔會浪漫嘅。到生B,我同太太講:『老婆,我想生猴B!生咯!』佢話:『你可唔可以浪漫啲?」我話:「唔係呀,剩番半年,唔係想生就生到。』雖然最終生唔到猴B 生咗雞仔,但我就係咁唔浪漫。」

Lai2

兒子縮短我生命

黎諾懿 為囝囝改名做黎峰睿,佢話一開始有兩個名揀,柏睿或者峯睿,問十個人,十個都覺得柏字親民啲、舒服啲,但佢就揀咗峰,「阿囝聽住嘞,因為作為我嘅兒子,係唔使太過平凡嘅,改個勁抽啲嘅,到你大個懂事唔鍾意,先再改啦!」

黎諾懿 笑言囝囝將我生命縮短,因為真係唔夠瞓,佢兩個鐘起一次身,「我諗所有新手爸爸媽媽都試過一齊起身、做同樣嘅嘢,依家我哋精嘞,求其一個起身,另一個休息,有一日我湊仔湊到頭暈、攰到好似開咗十幾個鐘通宵,我叫外母幫我睇一陣,一瞓昏迷咗八個鐘,依家開始識放手,就算佢喊都扮聽唔到。」

佢仲話諗住生夠一仔一女,最好係豬女,因為太太屬豬,太太話豬年嘅人比較好運啲。

Lai4 Lai3

對煮嘢食有興趣

「我對煮嘢係好有興趣,同埋對味道有獨特嘅烹調方法,我煮海鮮非常好食,我相信我呃到太太返嚟某程度上都係因為煮嘢食,佢話我嘅胡椒蟹同埋清酒蜆係冧得住佢嘅,可能自細窮,鍾意煮吓嘢食,同埋煮嘢食係平啲㗎嘛,我係唔鍾意洗嘢,所以洗碗都係交畀老婆啦!」 黎諾懿 就補充,太太曾幾何時煮過餐飯畀我食,佢比較鍾意健康啲,佢煮過秋葵炒毛茄,兩樣都滑潺潺。

不過佢就強調,太太冇公主病,「我老婆係非常之緊貼我嘅新聞,其實真係冇嘅,雖然啲人成日都話我太太比較富裕啲,但我真係未見過佢買名牌,就算有都係off-season 嘅,我太太又冇買手袋嘅癮,慶幸啦!」

更多精選內容