雪梨乾甘草雪耳瘦肉湯

雪梨乾甘草雪耳瘦肉湯

小朋友最鍾意食熱氣嘢,真係唔熱氣嗰啲都唔多食,攪到喉嚨都成日痕痕癢癢咁,所以就煲返個 雪梨乾甘草雪耳瘦肉湯 等佢哋同自己都可以滋一滋啦!

 

 

撰文:小小豬的成長日誌
圖片:小小豬的成長日誌

 

雪梨乾同埋雪耳都係可以滋陰潤肺、乾咳痰嗽,而甘草就可以清熱解毒,祛痰止咳,所以好啱我依家喉嚨唔舒服時飲呀!

材料:
雪梨乾一兩(約有十二片)、甘草半兩(約五片)、雪耳一個、蜜棗三至四粒及瘦肉$40~

IMG_0273

其實甘草原食譜係落一兩,不過當我去藥材店執藥材時,店員話如果落太多甘草的話,整煲湯就會甘味比較重,小朋友應該唔鐘意嗰一陣味。

我鐘意煲湯唔多唔少都係為左小小豬,佢平身因為濕疹關係,好多嘢都唔食得,所以要多啲煲湯等佢吸收唔同營養。為左令小小豬開開心心咁飲湯,我就聽店員建議啦!

做法:
雪耳浸發洗淨切件,瘦肉切件出水,其他材料浸洗乾淨~

IMG_0275

將1L清水燒熱,然後放入所有材料~
IMG_0282

由於雪耳唔可以隔夜,所以我都係煲夠一餐嘅份量,用1L水可以煲出六碗湯,夠我地三口子飲啦!

待水再滾後轉低火煲一個半小時~

IMG_0309

最後加少少鹽作調味之後(真係少少就夠啦),就可以飲得啦~
IMG_0320

其實初時都俾店員嚇一嚇,好驚個湯唔好飲。但飲落又真係唔錯,入口第一啖就覺得清清地又甜甜地,當入到喉嚨時又感受到嗰一份甘甜味,連老公都讚有驚喜,飲完喉嚨又真係幾舒服哦!
哈哈哈….就連小小豬都話好飲,飲完兩碗之後仲要追住添飲。不過湯就真係每人兩碗冇得多,小小豬唯有向食左會靚仔嘅雪耳埋手,整煲湯嘅雪耳都俾小小豬食晒呀~

IMG_0322

難得佢地兩父子都咁鐘意,真係勁有成功感,等我過多兩日再煲多次,等三口子滋潤下之餘,又等我添多啲自豪感啦….哈哈哈!

更多精選內容