另類眾籌 食玩買 變出 德望 新大樓

另類眾籌 食玩買 變出 德望 新大樓

而 Keicy 亦都趁考試最後一日早放學，去咗做小義工，為呢個「另類眾籌」出一分力。

到咁上下，仲接埋阿妹 Kassy 放學，帶埋 Kassy 同佢啲同學，一齊去參觀中學部添！

入到擺滿晒禮物嘅房，全部人都興奮大叫：

「好想攞返屋企呀！」

「全部都想帶返屋企呀！」

「幾時係 Funfair 呀？」

班小朋友都好期待 7月9日 Funfair 呢個大日子！

Keicy 攞住紀念品之一嘅靚靚筆，寫字都寫得靚啲、開心啲！^^

Kassy 都好鍾意呀!

趁 Keicy 幫手將禮物分好大、中、細獎嘅時候，

就由我嚟詳細介紹，點解要籌款起新大樓，

同大家最關心嘅「Funfair 食買玩指南」！

丨Delia’s Wing 使用超負荷 局限學生發展丨

原樓高兩層嘅 Delia’s Wing，二樓係美術室、家政室等 function room.

而地下就係學校現時唯一嘅大禮堂，由合唱團、管弦樂團、劇團、羽毛球隊以「爭崩頭式」使用。

除咗練習時間唔夠，亦都產生其他問題，

例如，每次管弦樂團練習，都要將樂器由 Our Lady’s Hall store room同四樓嘅音樂室，搬到 Delia’s Wing 地下嘅大禮堂，耗損頗大，

所以學校需要唔同嘅配套，嚟迎合返新世紀學生嘅需要，

從而產生籌款清拆原大樓，興建新大樓嘅構思。

丨新大樓有幾 pro? 丨

Delia’s Wing 重建之後，由兩層變成樓高九層，裡面全部都係 function room.

大禮堂翻新後，變成有 1400 個固定座位嘅演奏廳，

地板一路斜向舞台，而台、燈、聲亦都係專業級數，

令本校著名嘅合唱團、管弦樂團及劇團，有專業標準場地使用。

而頭先講嘅「搬樂器問題」，亦都得以解決。

因為新大樓演奏廳旁邊，有一間房專門存放樂器。

有咗呢個演奏廳，亦都方便與其他樂團或者團體合作演出，甚至可以借出予其他團體使用。

而家只有一個禮堂，所有活動都喺嗰度舉行，

不過將來就會視乎需要，分開喺演奏廳及 Multi-purpose Hall 進行，

而 Multi-purpose Hall 亦可以排 1400 張座椅，做大型集會；

將座椅收起後，立即變成室內羽毛球場，或一個籃球場。

其室內冷氣位係經過特別設計，冷氣唔會亂吹，

令打羽毛球嘅時候，個波唔會畀氣流改變方向。

當變身成為藍球場嗰陣，就係達到 NBA 水準(標準空間、專業地板、九米樓底)嘅專業比賽水平場地。

細心嘅安排同設計，令德望著名嘅田徑同各項運動項目，都有多啲空間練習同發揮。

【特別介紹】新大樓內有宿舍

德望學生住得，嚟 exchange 嘅同學仔都住得！

咁樣佢哋就可以直接住喺學校入面，唔使另外再租地方住咁麻煩。

宿舍有兩層，總共 80 張床位。

校內外人士、本校小學同幼稚園嘅同學，喺暑假進行活動時，都可以使用。

其餘地方，就係美術室、robotic room 同天台花園等多項設施，

學校官網有更多重建項目相關資料，歡迎瀏覽。

整個重建項目費用係 3 億港元 (嘩!)

不過學校需要更多新嘅優質設施，所以係使得值嘅。

三年籌款限期，現時籌募超過兩億港元，距離目標尚有九千幾萬港元，

所以 fund raising team 將會喺 7月9日 喺學校舉辦一個 Funfair，

誠邀各位，特別係舊生，返嚟母校食買玩 + reunion ^^

丨籌款之餘 找尋失聯校友丨

校方好想借呢個機會，同舊生重新建立關係，

因為我哋有好多畢業生都好叻，

喺唔同行業發光發亮，人脈廣，

但以前冇 email、社交媒體等通訊工具，

以致學生畢業後，同學校失聯，所以未能聯絡一眾舊生。

校方希望借今次籌款活動，更好咁向學生、家長及舊生，講解返學校而家嘅情況，

邀請大家參與學校活動，壯大 Good Hope，

唔止而家中學、小學、幼稚園，

係連同舊生一齊，成為一個 family.

丨Funfair 終極食買玩指南 – 玩丨

7月9日舉行嘅 Funfair，每班級會負責一個遊戲，

所以 30 個班級就有 30 個攤位，而且各有不同，

例如「逃出密室」、「有獎拋波仔」、估生字、大問答、砌圖、「倒彩沙入樽」、手繪、face painting……非常吸引。

另外，又有由各科老師心思滿載嘅興趣班。

例如：美術科老師嘅 Russian Doll Workshop，喺開放接受報名後唔夠兩個鐘頭已經爆滿，反應非常熱烈！

老師會教點樣喺木公仔上高油顏色，最後製成有中學、小學、幼稚園德望校服嘅俄羅斯娃娃！

除此之外，唔同時段亦都有唔同嘅免費表演，包括戲劇、合唱團同管弦樂團，就算完全唔消費，都可以喺學校欣賞精彩表演。

丨Funfair 終極食買玩指南 – 買丨

嘉年華當日入場費係 $100，包含十張 $10 代用券，所以呢 $100 係完全畀返晒你。

而唔同 game booth 會有唔同收費，

有啲係收一張代用券，有啲係收兩張，

大家可以自由參加，或者用嚟買嘢食。

大會呼籲各位當日帶個超大個袋嚟現場，

因為舊生同家長捐出咗超過 17,000 份超正禮物，畀大家免費攞走！

只要將入場時派發嘅小冊子背後格仔，

「給」滿 5 個印仔，就可以換領禮物 (分別有大、中、細獎)，

當中包括商務印書局 $100 書券、citi’super $100 現金券、精美文具及公仔等，

(心心眼) 我都好想要呀~~~

每玩一個遊戲，最少有一個印仔， 「給」得越多，換得越多獎品，所以好快就可以滿載而歸喇！

而且家長可以預訂紀念品，

包括公仔(限量100隻)，

同一套碗碟，

現場亦都有大約 14 款設計精美嘅 德望 特別版紀念品，

例如文件夾、筆記簿… 任君選擇。

而家有得網上預訂，方便舊生或當日未能出席嘅大家購買。

紀念品網上預訂網址：http://www.ghs.edu.hk/sec/dw/funfair2017.html

溫馨提示：

想買就要快手喇！

因為開賣咗約兩個星期，

近 7 成紀念品已經售罄，

反應非常踴躍，

部分熱門紀念品會接受新一輪預訂，

大家要密切留意 Facebook專頁 www.facebook.com/ghseduhk 喇！

【十大特賣必買推介】

1)軟熟小手巾 (20cm x 20cm)：有德望圖案，質地柔軟，呵護小童肌膚。

2)得意印水紙：有唔同德望元素，包括校徽、校訓、學生寫嘅書法、logo等，即買即貼，加倍開心！

3)趣緻膠紙：由德望學生設計，上高有中學、小學同幼稚園嘅公仔。

4)學校8隻貓肖像嘅萬字夾，超可愛！

5)德望中學校服背景圖案便利貼。

我細個好鍾意買文具，而家 Keicy 亦都好鍾意買文具，

所以如果用有學校特色嘅簿仔、筆等文具，會特別珍惜，

而且因為老師會見到，所以寫字都會更比心機，寫得靚啲！

除此之外，memo 紙同萬字夾都好得意，

係小朋友好鍾意儲，又好有用嘅物品，

對住佢哋溫書同做功課，心情都會好啲^^

6)社色布袋：

一面淨色，另一面係簡約德望 graphic，

內有海綿，可放laptop、A4紙、文具、書等等，

大人返工見客，細路返學出街都啱用。

更有 6 個顏色 (社色)，襯衫一流，舊生鍾意買返自己個社嘅顏色，以示支持。

溫馨提示：每隻色限量 200 個，宜快快入手！

7)竹製餐具：

小朋友安全設計，印有幼稚園學生以及校訓 Love、Hope 及 Faith，而碗就印有 prayer。呢款竹製餐具好受舊生歡迎，限量 800 套，而家已賣出超過 500 套，快啲買返屋企收藏啦，只會喺今次籌款活動有得賣咋！

8)可愛紙扇：

圓形硬咭紙夠挺身，底面有兩個唔同嘅德望中學生，撥住涼參加7月9日嘅炎夏 Funfair，夠晒 Good Hope Spirit!

9)100% silk scarf:

印有 Delia’s Dream 嘅馬賽克圖案，相信以前有去 Delia’s Wing assembly嘅舊生，一定記得呢幅馬賽克，因為技術原因，冇辦法將佢原幅搬到新大樓，所以出咗呢款咁有共鳴嘅圍巾，畀大家紀念。

首度推出 120 條好快售罄，現時第二輪訂購亦只剩餘少量，佢特別在唔係傳統嘅黃綠色為主，所以幾啱舊生平時出街，或者返工襯衫！

對我呢啲已經離開學校一段日子嘅人嚟講，平時可以用有學校特色嘅圍巾嚟襯衫，無論送阿囡返學，抑或一齊返學校出席活動、參加家長教師會，都感到好溫暖，亦都係舊生對母校嘅一種支持。

10)德望公仔：

專誠搵返製作呢個公仔嘅工廠去做，而喺呢間工廠工作嘅德望舊生嘅家長，非常有心，為公仔度身訂造可愛嘅德望中、小、幼稚園夏季及冬季校服(連校褸)，等小朋友可以幫公仔換衫。暫定唔再加單，每款只剩十幾套，售完即止。

我最鍾意呢款公仔，因為我兩個囡都好鍾意 Barbie，而家帶咗佢返屋企，等於佢哋有多一位「新同學仔」，有時我教 Keicy、Kassy 或者同佢哋講一啲嘢之後，可以叫佢哋即刻同呢位「新同學仔」講返，好似做老師咁。^^

另外，呢位可以換冬季同夏季校服嘅「新同學仔」，更係陪佢哋做功課、溫習嘅 buddy，陪住佢哋一齊成長。

而且，Keicy 同 Kassy 更可以放心同呢位「唔講嘢」嘅「新同學仔」講秘密，講心事，保證冇其他人知道，哈哈！:p

鍾意 limited edition 手製產品嘅你，可以留意 6 月中推出嘅手繪俄羅斯娃娃網上拍賣。

大會專誠搵咗十位攻讀美術及設計嘅舊生，設計以德望為主題嘅俄羅斯娃娃，

包括中小幼校服、運動服、合唱團、田徑隊等不同造型，

並且以精美木盒包裝，同設計嗰位舊生嘅簽名。

十位舊生，每人只製作一套俄羅斯娃娃，非常珍貴，值得擁有收藏。

如果你未能報名 Funfair 當日嘅俄羅斯娃娃工作坊，

記得留意 6 月中開始，一路 bid 到 Funfair 當日嘅網上拍賣，買一套返屋企喇！

我哋中學部有好多同學仔，都畫得一手好靚嘅 calligraphy。

Funfair 當日有一個好特別嘅攤位， 就係由呢班同學，為大家即席揮毫，

將各位心中嘅語錄，寫上 postcard 同油上特別顏料，成為獨一無二嘅作品，

而旁邊亦都有一啲印仔，畀大家 DIY 點綴吓。

除此之外，當日會有工作人員協助舊生填寫簡單問卷，同留低個人聯絡資料。

為表答謝，每位填妥問卷嘅舊生，都會得到限量非賣品小禮物乙份，

當中包括：德望公仔頭鎖匙扣、德望公仔嘅筆、有水晶粒粒嘅德望筆。

丨Funfair 終極食買玩指南 – 食丨

家政科老師會教煮甜品同鹹點，亦都大受歡迎，好快就爆滿。

Sister Catherine 仲會親自下廚，分享美味小食。

而當日亦都會有爆谷、棉花糖機等嘉年華式小食。

丨勿忘初衷 飲水思源丨

見到 Keicy 喺母校中學部穿梭，覺得佢好有自己嘅影子。

而 Keicy 亦都好興奮咁同我講：「我要食多啲飯，讀書叻叻，快啲大個囡讀中學……」

學校質素好，先能夠培育出質素好嘅學生，

先能夠培育出各行各業嘅菁英，

先能夠製作出用平易迎人又高質嘅食買玩 Funfair 嚟畀舊生、家長、老師、同學聚首一堂，

開開心心咁為學校嘅新大樓建設出一分力，

係專業，亦係對母校悉心栽培嘅一份心意，

喺度預祝呢次「另類眾籌」完滿成功！

Hopers，7月9日 Funfair 見！

FB: KeicyKK