大談事業與感情 孫耀威冧講 Macy :佢係我Best Buddy!

大談事業與感情 孫耀威冧講 Macy :佢係我Best Buddy!

現年44歲的孫耀威 (Eric),早前宣布跟拍拖多年的女友陳美詩( Macy )結婚,婚訊曝光後,二人在街上得到很多人的祝福,那刻老孫覺得世界充滿愛。回想92年,孫耀威在完全唔識普通話情況下,代表學校去台灣參加音樂節,誤打誤撞入咗娛樂圈,但其實他的事業並非一帆風順。孫耀威接受《東方新地》訪問 ,大談面對人生高、低潮時的心態,又分享求婚趣事及跟太太的相處點滴,更直言 Macy係佢Best Buddy!

內容節錄至1020期《東方新地》

 

孫耀威 大談感情及Macy

孫耀威 90年代出道,誤打誤撞入娛樂圈,更加喺台灣爆紅,他說:「搭每程飛機去台灣,就好似超人變身做明星,台北飛香港就變番學生,大概九個月我喺香港仲未出道,我喺香港繼續搭火車返學,但台灣一落機就好多fans接機,一個人可以有兩個咁唔相同嘅身份,諗番都好得意。」當時 孫耀威 的唱片確賣得好好,真係閒閒地賣幾十萬甚至一百萬隻。「不過嗰時我仲係新人,新人嘅版稅好低,所以其實當年唔係賺好多錢,啲版稅買部車已經用晒。反而我真正賺錢係我開始去內地拍電視劇嗰個年代,99年我拍第一部台灣劇《懷玉公主》,好幸運破咗當年台灣電視劇嘅收視,於是我一路就喺台灣、大陸拍劇,片酬一部部升,香港嗰時好多雜誌話我銷聲匿跡或者被放逐大陸,但其實嗰段時間係我人生賺最多錢嘅時候。」

談到〈愛的故事〉上、下集都非常之紅,問 孫耀威 會不會有飄飄然嘅感覺?「我唔會承認我有飄飄然,但我睇番我當初對一啲事嘅處理方式,其實我諗我係有,甚至有少少一朝得志就語無倫次,我哋做娛樂圈,當你得嘅時候,真係好多人會圍住你,尤其是我去台灣嘅時候,真係萬千寵愛在一身,唔會知個世界真正係點,慣咗全部人都對你好好、搵錢好容易,於是好揮霍,到我大個睇番,有啲位我可以做得再好啲。」

孫耀威透露出道爆紅卻賺得少,真正最搵錢是北上拍劇的時間,但卻被指銷聲匿跡。

 

孫耀威 說當年憑〈愛的故事〉紅遍港、台,但作為新人,真正落袋的歌酬有限。
孫耀威說他已過了爭名逐利的階段,「去到依家我做音樂,係想做好嘅音樂,冇任何嘅盤算,用我feel like嘅形象,大家鍾唔鍾意首歌我已經控制唔到,但過程入面我係enjoy、對得住樂迷,已經好滿足。」

事業好多低潮位 失敗中汲取教訓

談到人生真正的低潮位, 孫耀威 直言並非出道時,而是幾年前做生意的時候。「做藝人係畀大家捧喺手掌心、全部人包圍住,做生意真係一個人面對所有人,我試過好多行李,百幾公斤,一個人、冇助手、冇人set頭,走去propose我嘅生意,呢啲生活令我覺得原來做藝人係咁正、咁幸福,但亦都因為呢幾年做生意,經歷一啲難處、失敗,可能係合夥人喺蝕錢嘅時候走佬,或者畀好朋友離棄,經歷呢啲反而令我更加珍惜有嘅嘢,亦令我個人變得更加貼地。以前覺得冇助手、冇司機點掂?依家覺得自己揸車鍾意去邊就去邊、冇人聽住我講嘢仲好。」

現在經營西裝生意的 孫耀威 認為,以前嘅失敗或者點點滴滴都係一個教訓、學習嘅機會,唔好因為以前嘅失敗而冇咗信心,如果因為以前嘅失敗而唔去試,可能嘥咗之前嘅失敗。他堅持幕前一定係佢嘅主業,無論今日做幾多生意,幾成功、幾失敗都好,藝人一定係孫耀威嘅老本行,「唱歌、演戲我諗我呢世都冇辦法離開,而做生意我主要參與係設計,呢樣對我唔算係工作,正如做音樂、寫歌我唔會覺得係工作,對於我嚟講係創作,而創作對我嚟講係消遣,唔係工作,所以依家雖然好忙,但一啲壓力都冇,唔蝕錢就冇壓力㗎嘞。」

孫耀威 熱愛創作,經歷更化成靈感泉源,「過去呢幾年,人生經歷特別多嘢,特別多靈感,可能瞓到半夜,諗到好正嘅衫或者好啜核嘅歌詞。」

太太價值觀相近 認定是終生partner

一講到陳美詩, 孫耀威 表現好冧,「07年我第一次返嚟香港出唱片,去TVB拍MV,咁啱嗰日佢(陳美詩)簽約TVB,我哋喺canteen第一次相遇,我哋其實係大學嘅師兄、妹,當然唔同屆,認識咗之後,冇交換電話、冇任何交集,後尾喺藝人嘅團契小組相認番,開始傾偈,覺得大家好似價值觀幾相同,我同呢個女仔拍拖,喺佢面前,我可以繼續𥄫第二個女仔,我發覺喺佢面前我唔需要隱瞞或者扮一個點樣嘅男仔,我可以好真實地做番我,我哋乜都可以傾,當去到呢個位,我發現呢個人除咗係我嘅愛侶,佢亦都係我嘅Best buddy,我乜都同佢講,我就覺得呢個可以係我終生嘅partner。」

做訪問時,太太 陳美詩 全程在打點,但以沒化妝為由,婉拒出鏡。

 

陳美詩和 孫耀威 媽媽相處融洽,不時三人行旅行!

 

求婚過程好大懵 唔識講「嫁畀我好嗎?」

講到求婚過程, 孫耀威 就話自己好大懵:「我妹妹住喺瑞士,我每年都會去探佢,嗰度有間甜品店係我老婆好鍾意食嘅,到我想求婚又唔知喺邊度求,就包咗呢間甜品店,買通埋個老闆,當佢叫甜品,送嚟嘅係戒指、花同香檳,當我一跪低想講:「嫁畀我好嗎?」都講唔出,太多感觸,自己喺度喊,我太太見到都知發生咩事,亦都好感觸、好感動,兩個人就跪喺度喊,喊咗好耐,先識笑,完全唔識得影相、冇任何鋪排,但呢個就係我哋兩個真實嘅相處。」 孫耀威 話依家搵緊教堂,希望做番個儀式。

4月,與拍拖8年的女友陳美詩在美國洛杉磯註冊結婚。孫耀威說:「求婚時,冇講過『你嫁畀我』或者『我願意』,但嗰刻喊同擁抱,已經代表一切。」

被問到44歲結婚係唔係計劃之內, 孫耀威 就話細個嘅心願係25歲結婚、30歲生仔,「我係好典型嘅family man嚟,我係要有下一代,好重家庭觀念嘅一個人,但係一過25歲之後,年年都話出年,一路話生仔,講到今時今日,暗瘡就有得生,哈!都想嘅,但人大咗就會諗多咗,生小朋友有冇能力去教育佢呢?養大佢呢?令佢成為好嘅人呢?依家社會咁動盪,呢個世界仲適唔適合人住呢?我係好想可以生一隊足球隊,但一諗到呢啲就好turn off。所以我會選擇唔特別諗,有就自然會有。」

孫耀威 駐顏有術,他的保養心得是,「我一生人百分之九十嘅時間都係處於開心嘅狀態,我好識得令自己開心,我會運動、喪唱八個鐘卡拉OK或者自隊三支紅酒,令唔開心時唔好鑽牛角尖,仲有當然我遺傳我媽咪,我媽咪就嚟七十歲,白雪雪、無皺紋,大家睇我好瘦,其實我有肚腩,不停減緊肥。」

更多精選內容