33歲結婚唔係計劃內 陳柏宇 :但我覺得我夠成熟去結婚

33歲結婚唔係計劃內 陳柏宇 :但我覺得我夠成熟去結婚

陳柏宇 (Jason)前日同太太Leanne結婚,正式成為人夫,當日一對新人甜到漏,隔住個Mon都Feel到佢哋幸福甜蜜。早前Jason接受我哋訪問,大談同太太相識經過!

 

編輯:Sunday Kiss

結婚相想表達關係同性格

陳柏宇 喺拍《喜愛夜蒲》嘅時候認識太太,「起初第一眼見佢其實唔係Love at first sight、唔起眼㗎!係因為之後我哋一齊玩啤牌,透過玩啤牌嘅過程,認識佢個人,先至開始有好感,慢慢開始發展…33歲結婚並唔係咪計劃之內,我心目中結婚嘅時機唔係用歲數去限制,而係心態,係我覺得我夠成熟去結婚。」

陳柏宇係英國影個輯結婚相,佢話;「自己好想啲相係可以表達到嗰兩個人之間嘅關係、性格係點,傳統嘅結婚相,我覺得表達唔到呢樣嘢,我鍾意影動態嘅相,我哋有張相係打緊機,有啲相係一路玩緊一路影,係生活化嘅嘢,而唔係擺一個pose。」

陳柏宇 謂最喜歡太太的率真個性。

陳柏宇 話冇特定一刻認定符曉薇係太太,而係一路相處累積番嚟,「我喜歡佢嘅性格,率直、個人真,有可愛嘅時候,有嬲嘅時候,好簡單嘅形容,但兩個人相處之間嘅火花係最重要,再加上我哋嘅磨合係好。」

婚後都希望太太繼續工作

Jason笑住話結婚使咗好多錢,「依家銀行冇錢咁滯呀!我都愁呀,但係開心事嚟嘅。」至於生育大計,Jason話:「儘快㗎!好得意,佢好想個BB係某一啲星座,所以要夾下啲月份去嘗試造人。」不過佢就坦言話婚後都希望太太繼續工作,「我都唔希望一個人去承擔住經濟壓力,我希望我可以多啲時間同小朋友同埋屋企人相處,我唔想因為要養頭家,所以成日都工作、工作⋯⋯」

唔係好進取 唔當事業嘅成績係一個準則

最近陳柏宇忙宣傳新歌、宣傳個人,注重宣傳個人為主。新歌第一次同Wyman合作,Wyman半年前嚟睇陳柏宇演唱會,完場陳柏宇 乘機拎咗Wyman 電話,問佢可唔可以幫手寫詞。被問到有網民覺得陳柏宇事業上經歷過好幾次低潮,陳柏宇 就話:「我從來都唔當事業嘅成績係一個準則,我從來都冇覺得外界畀我嘅評分係低就叫做低潮,又或者曝光率冇咁高嘅時候又叫做低潮,外界對我嘅睇法、畀我嘅成績,我一向唔係擺喺重點,我覺得自己喺工作嘅過程嘅得着、做得開唔開心行先。」

對拍電影有興趣 Enjoy唱歌

舊年年尾,唔少人睇好陳柏宇攞叱咤男歌手,結果吳業坤得獎,陳柏宇 就話冇乜特別感受。「我對呢件事嘅睇法反而多過感受,本身我係咪向獎看嘅人呢?又唔係嘅,民意好、唔民意又好,我覺得支持自己嘅人係咪真心支持自己最重要!好似開騷咁,好多人會以紅館為目標,但如果要揀,我寧願揀喺一個細嘅地方開一個我好滿意嘅騷,好過臨急臨忙、未ready嘅時候,去紅館開個騷,而係完全享受唔到、亦都做到一坨屎咁。」

陳柏宇 話對拍電影有興趣,但始終好似一路都冇機會去做,踏足唔到嗰個圈,呢一刻又唔係鍾意電影多過唱歌,所以如果有戲拍咪拍,冇咪繼續唱歌。 陳柏宇 話都好enjoy唱歌,又快、靚、正!陳柏宇 話自己好多興趣,又飛鏢、又啤牌!仲有打高爾夫球、做gym。佢話人生好多嘢都係為興趣而做,例如唱歌都係會嘅興趣。

關鍵詞
陳柏宇

更多精選內容