謝安琪 做全職奶媽 張繼聰為女減產

謝安琪 做全職奶媽 張繼聰為女減產

謝安琪 為老公張繼聰成功追女,加埋大仔張瞻湊成「好」字。日前,二人為囡囡張靖 (Karina)喺迪士尼豪搞百日宴,Kay揚言要做全職奶媽,實行無了期停工湊女:「希望可以餵足一年人奶!真係擺低工作,以家庭為先,囡囡都係得幾個月,雖然囝囝10歲,但都係要傾偈嘅階段,只要睇住小朋友開心就乜都值得!」

 

撰文:Sunday Kiss
圖片:謝安琪、張繼聰Instagram、新傳媒資料庫

Kay推job有錢都唔賺,而張繼聰就緊張到要玩人釘人政策,又話要減產畀多啲時間睇實個女,仲癲到已開始盤算個女讀書時點安排,張繼聰瞪大眼話:「佢將來嘅男友一定好大鑊,因為有我守住,我已經picture緊個女讀中學、大學,哥哥第一日接放學,第二日就係我!」睇嚟Karina都幾難逃出呢個黐身爹哋嘅魔掌!

Kay表示有做運動收身,包括舉重及舉啞鈴等,Kay坦言全因老公影響:「身邊有人鞭策,自己唔可以太遲起步!(想操馬甲線?)呢條線離我頗遠,哈哈!」

問到囝囝張瞻有冇呷妹妹醋?Kay擰頭話冇:「反而佢成日都錫妹妹,可能同妹妹年紀差好遠啦!我同妹妹換尿片時佢會主動幫手,餵人奶時又幫手冚住。」

張靖嘅父系基因太強,同爸爸阿聰以及哥哥張瞻十足餅印!

當日有唔少藝人朋友都有到場賀B女百日,大家紛紛送上祝福。

郭晉安及歐倩怡夫婦撇甩仔女,拍拖赴會。
方力申透露已用「張靖」名義喺內地捐錢建水窖作為禮物,非常有心思!

鄭欣宜與許廷鏗話有同Karina合照,大讚對方又乖又淡定,欣宜透露已送咗衫仔俾BB:「我見到小朋友啲衫褲就忍唔住買,唔捨得買畀自己,都捨得買畀小朋友!」

更多精選內容