DJ 朱薰 推崇「羅家英」教學法

DJ 朱薰 推崇「羅家英」教學法

商台DJ 朱薰 的囝囝「譚嬰兒」(譚永之、之仔)轉眼不再是嬰兒,四歲大的他去年與父母一同迎接新「譚嬰兒」譚在之(乳名妹之)出世,合組「冧之之兄妹 」。 朱薰 與老公譚健榮(Mr. 成員Dash的孿生弟弟)樂見湊成一個「好」字,生活好開心、好窩心,亦好忙碌, 朱薰 形容忙碌程度可謂分秒必爭,幸好兩夫婦的工作時間彈性,可以一人湊一個。「朝早一見到妹之醒喇,即刻去座奶同換片,跟住之仔又醒喇,要刷牙、準備早餐、陪佢上興趣班,返嚟又趕住食晏換衫返學下晝班,我成世都未試過咁分秒必爭,以前工作都忙,但依家先體會到真正嘅忙。」

「阿之媽」除了忙於照顧仔女的起居飲食,最重要莫過於教導,她笑稱師承《西遊記》飾演唐僧的羅家英教學法,透過不斷講道理去說服孩子,她了解之仔不受硬,寧願費盡唇舌與之仔溝通,她強調此教法需要極大耐心,但一定有效!「以前講100次先聽,依家10次就聽,其實係好大進步!」

撰文:Ling
攝影:Jacy Yip(部分相片由受訪者提供)
化妝:King [email protected] MAKEUP
髮型:[email protected] MAKEUP
場地:迪士尼探索家度假酒店 (tel: 3510 2000)

朱薰仔女性格大不同 之仔較硬頸 妹之好相與

為了解一對仔女,朱薰曾帶仔女做皮紋測試,得出結果是之仔有主見、有自己想法,是一個比較硬頸的小朋友,的確需要透過耐心溝通去教導;妹之的性格截然不同,可承受嚴厲訓話。「有講法話如果生兩個,大仔大女有ABC特質,細嗰個就係DEF特質,我唔知係咪真係有關,但妹妹係相對易搞,性格似老公好相與。」

朱薰與老公阿榮覺得兩個夠晒數,未打算生多個,因為湊一個太花心力,生得就要盡力教,落手落腳湊才能真正了解孩子,包括一切起居飲食、沖涼、 刷牙等等,朱薰說:「一定要同仔女相處過,先知道佢哋個心諗咩,再決定用咩方法教。」

朱薰湊之仔要花很多唇舌,有時忽略了細女,所以她覺得第二個小朋友比較蝕底,從未完全擁有父母。「基本上佢乜嘢優惠都冇,例如胎教佢都冇機會,因為我要陪之仔傾偈、玩同瞓覺;有時又會帶之仔出去睇戲,留低妹之畀婆婆幫手照顧。」

「女兒是爸爸的前世情人」沒有講錯,朱薰笑老公望着女兒的眼神是迷戀,女兒亦的確較黐爸爸,好彩之仔比較黐媽媽。

生兩個的父母可能有偏心,或者把時間偏重了其中一個,朱薰也曾擔心自己不夠愛錫妹之,後來與阿榮想出一個好方法,阿榮說:「我哋搵咗之仔幫手錫妹之,佢都做得好稱職,令妹之有多一份愛。」朱薰告訴之仔,媽咪錫你,誰人錫妹妹?「所以自妹妹出世後,之仔對妹妹好受落,錫到佢塊面扁!」

之仔十分喜歡妹妹,經常錫到妹妹塊面扁了!

唐僧上身講道理

能夠湊到一對「好」字,朱薰心滿意足,至於湊仔湊女有否不同,她指妹之尚小,暫時對她仍沿用「羅家英」教學法,但她知道囡囡的性格不同,而且較聽話,之後應該會針對囡囡發掘另一套方法。「可能對住妹之我要好惡,對之仔就要羅家英咁,我應該會精神分裂。」但朱薰深信良好的親子關係建基於愛與溝通之上,無論幾忙都要親力親為湊小孩,從中多與仔女溝通,了解他們的想法。「我同佢哋傾好多偈去建立關係,如果我哋建立唔到關係,仔女對我冇信心,我想叫佢哋做乜都唔得,佢哋唔會信服我。依家我對住之仔要不斷傾偈,比我返工講更多嘢,佢先聽我話。」

朱薰為湊之仔花很多時間溝通,有時忽略了細女,所以她覺得第二個小朋友比較蝕底,從未完全擁有父母,連胎教都好少。
之仔性格有主見,比較硬頸;妹之剛相反,似爸爸好相與,可以接受嚴厲訓話。
朱薰一家是迪士尼的鐵粉,迪士尼一開新酒店「迪士尼探索家度假酒店 」立即去試玩,開心到在床上跳跳紮。

囝囝有拍子感

身為DJ的 朱薰 ,對中文咬字發音有份執着,更出過相關書籍講正音及潮語,她對仔女的中文表達能力自有一定要求,她透露最佳的教學方法同樣來自溝通。「我同之仔傾偈都係用番平時用語,而佢嘅耳朵都幾好,聽到我嘅讀音亦跟得到,所以家長同佢講乜,小朋友就會吸收到啲乜。」阿榮補充,透過溝通去提升小朋友語文水平,家長毋須思考太多,或刻意灌輸 一些艱深詞彙,最重要是小朋友說話make sense,與人舒服溝通便足夠。

朱薰和阿榮與小朋友相處不會惡形惡相,會以朋友式相處,並少用物質,多用溝通教導。

父母的工作與音樂息息相關,之仔也遺傳了音樂天份,拍子感不錯,正學習打鼓和彈結他,阿榮說:「拍子感除咗數得準同記性之外,協調都會好啲,最緊要佢學得開心,就自然會學得好。」正就讀幼稚園K1的之仔亦表示好鍾意返學,每天最期待食茶點和玩耍,「聽日帶膠樽返去玩水!」

朱薰一家是迪士尼的鐵粉,迪士尼一開新酒店「迪士尼探索家度假酒店 」立即去試玩,開心到在床上跳跳紮。

過多兩年之仔升小一,朱薰仍未想面對,但身邊的朋友不斷催促她準備,「今年唔睇下年你就知味道!」嚇得朱薰也為此思考一下,但會盡力保持輕鬆心態,對抗洪流,「我有朋友安排小朋友上面試班,去唔同學校要買唔同嘅衫,因為要襯番校風,我唔想咁呀!」 朱薰 希望為之仔找到一間較輕鬆、主張提升學習興趣的學校。

謝安琪接收全部BB物品

催促她準備小一的朋友,未知有否包括老友謝安琪(Kay)了!已育有10歲大仔張瞻的Kay,相隔10年再誕細女張靖(Karina),最近Karina舉行百日宴,朱薰一家都有出席,她最開心可以將妹之的物品全轉贈Kay!「佢一話畀我聽有咗,我就好希望佢生女,可以畀晒啲嘢佢,唔使浪費!好彩佢真係生女,妹之嘅嘢差唔多過晒畀Kay,依家就可以執啲六個月大嘅衫畀佢。」阿榮笑說妹之的衣服穿在另一小妹妹身上,會勾起對妹之舊時的回憶呢!

張繼聰謝安琪早前為細女Karina舉行百日宴,廣邀一班好友出席。

之仔也透露最近去過瞻瞻哥哥的家玩耍,「我哋玩到成地都係玩具,瞻瞻哥哥仲畀咗架車我。」朱薰讚10歲的瞻瞻有大哥哥風範,每次都拿大堆玩具招呼他們,「瞻瞻哥哥次次都送車畀之仔,好識照顧小朋友,依家佢多咗個妹妹一定好愛錫。」

堅持餵母乳 每日追奶像追債

妹之剛度過一歲生日,亦意味着朱薰今次的母乳之路行了一年,她揚言已完成一年目標,但她坦言不捨得放下這份親密關係。「依家都餵得OK,可以再餵多一陣。餵母乳好值得堅持,除咗對佢健康好啲之外,親子關係更加親密,呢種親密感係無可取替,對妹之嚟講除咗我之外,亦冇第二個可以為佢咁做。」

妹之渾身肉肉,經常笑容滿面萌到爆!
朱薰知道母乳對小朋友的健康最好,一直堅持餵哺母乳,雖然過程並不順利,但見到小朋友健康成長,幾辛苦都值得。

上次朱薰餵之仔母乳有八個月,她解釋第一 次餵得不順暢,奶量亦不夠多,她形容每日追奶像追債。今次有了經驗,餵哺上比較順利,但依然受到塞乳困擾,甚至患上乳腺炎,她曾於facebook大吐苦水,形容乳腺炎的痛「是揩到都痛、風吹都痛」,自己不懂解決方法只好「死推爛推」,結果推到發燒,全身都痛。「就算乜都唔做,都好似成身發熱咁,就算唔掂佢有嘢揩到,都會周身唔自在!我知道塞乳腺就係唔通,唔通又點整呢?我就不斷推、按摩,或者泵多啲啜多啲,但係幾痛都好,你忍一忍,死都要通番佢,推到佢通,如果唔係你只會繼續痛。」

之仔好鍾意進食,最愛朱古力、糖果和飯,在家中媽媽會控制其食量,出外開party才放寬。

食卵磷脂助通乳

最近她發現一個通乳新方法,想分享予其他媽咪參考,「我有食卵磷脂,真係幫到手,食咗之後通得快咗。」卵磷脂能增加母乳中多元不飽和脂肪酸的比例,減低乳汁的黏稠性,進食前宜先諮詢醫生的意見。

一年目標已經達成,朱薰將逐步減少餵母乳次數,她解釋始終要上班難以配合泵奶時間,加上小朋友慢慢長大,她希望增加陪伴小朋友的時間。「返工泵奶好花時間,亦好難配合到。同埋我想再陪伴小朋友多啲,多過花時間坐埋一邊泵奶。」朱薰在訪問中經常強調,沒有溝通就建立不到良好關係,對一歲前的妹之,朱薰以母乳連繫母女感情,一歲過後,是時候「羅家英」上身,展開另一層次的身教了。

之仔現在有學打鼓、彈結他及其他興趣班,全部都是之仔的選擇,朱薰和阿榮強調仔女學習是為自己,並非為父母而學,所以一定要由他們自己選擇。

更多精選內容