台中 親子遊 麗寶樂園4日行程分享

台中 親子遊 麗寶樂園4日行程分享

正值放暑假,旅行Mood咁強烈 連續寫幾篇親子旅行好去處應下節,帶野人去最多旅行嘅地方,第一係新加坡 第二係台灣。兩個都係十分受港爸港媽歡迎嘅親子遊好去處。早前5月趁野人學校無啦啦有兩日假期快閃咗一次台灣,今次去嘅唔係熟悉嘅台北,而係我同野人都未去過嘅 台中 。

 

 

 

去台中,完全因為年頭見到有個台灣blogger介紹「麗寶樂園」,多得佢介紹,先知原來台中有個咁好玩嘅樂園!

(之前我一直覺得台中只有民宿民宿民宿同埋農田農田農田 XD)

「麗寶樂園」係一個綜合渡假區,當中包括一間酒店(福容大飯店)、兩個樂園(一個乾身、一個濕身)、一個OUTLET(有得買、有得食,仲有個5月新開嘅摩天輪)

逐一介紹下啦~~~

1)福容大飯店(Fullon Hotel LihPao Land)

如果去過台灣,應該對「福容」集團唔會陌生,集團總共有十幾間酒店遍佈全台灣。我地快閃台中4日,全程都住喺麗寶樂園入面嘅福容大飯店。飯店服務員,一貫台灣人作風,超友善!非常詳細解釋酒店嘅設施、餐飲服務。就連水陸兩個樂園嘅門票都幫我搞掂埋!飯店嘅左右兩邊,分別就係兩個樂園嘅位置,所以由飯店到樂園玩大約只需步行5分鐘,非常方便! 福容嘅酒店房好適合我哋呢類一家4口嘅家庭入住,因為房內有兩張大雙人床之外,近窗位置仲有個好闊落嘅地檯,可以鋪「塔塔米」,所以瞓嘅位置真係好足夠!地檯仲有張和風4方枱,啱哂夜晚食個當地杯麵做夜宵(去旅行食杯麵係我情意結XD)

親子遊揀得嘅酒店一定要有玩嘅元素! 先講免費:兩個「乾身」Playarea 其中一個,如冇記錯係開朝10-晚10 :p 牆上有塊大大嘅版可砌LEGO,啱哂野人!

另外一個,24小時都可以玩,係咪好正呢?任何時候都可以帶小朋友放電!

兩個乾身外,仲有一個濕身Playarea,就係酒店泳池,有少少滑梯,幾支水槍,雖然細細地,但都夠野人玩到唔想走!(提提你:如落水需要戴泳帽)

除咗兩乾一濕全免費Playarea外,酒店地下樓層仲有好似「冒險樂園」嘅電子遊戲玩。雖然地方唔大款式唔多,但野人每晚飯後返房前,都去玩轉先返房完成一日嘅行程。

玩嘅嘢仲未寫完!電玩附近位置,有得租車揸租假動物騎!愛車野人當然又係揸車啦,有超大笪地亂揸XD呢度嘅車全部都附有搖控,所以野人索性有段時間當大型搖控車咁玩:P

呢度比較特別係有機械人「騎」,野人當然要試試啦~~個機械人無論大小同聲效都好搶視線呀!聽到有台灣人講「好帥呀~~」XD

話明係適合親子遊嘅酒店,就連自助早餐都有小孩元素。(備註:小孩未夠115cm,自助早餐係免費呀!)

另外,酒店仲有Workshop俾小朋友參加,但我地玩樂園都冇哂時間Lu……..

2)兩個樂園

先講乾身,基本上諗得出諗唔出嘅小朋友機動遊戲都有!

室外遊戲外,仲有室內Playhouse (玩到熱可入去避暑 😛 )

如果大膽少少嘅港爸港媽,呢個樂園都不乏較刺激嘅機動遊戲,所以唔止得小朋友有玩樂性,大人都好啱玩! 特別推介呢個垂直向下直衝到地底嘅過山車,啱哂特別鍾意刺激快感嘅爸媽!我冇玩,因為我怕心臟頂唔住 😛

濕身樂園就係野人好期待嘅WaterPark (馬拉灣)!

入面有適合細少少嘅小朋友玩嘅BB池+BB滑梯

又有超過十條大大少少長長短短嘅刺激滑梯,野人梗係唔蝕底盡情瀡啦!

有個好刺激嘅「U」型梯,好可惜野人仲未夠高玩,所以得個睇字。不過我地約好咗,等佢地夠高嚟多次麗寶樂園再玩 🙂

雖然滑梯刺激,但我覺得最激都係「Big Wave」人造浪灣。第一次見到個浪嗰刻,講真我係有D驚(個浪超高!!!!),因為野仔喺我隔離,我驚個浪大到我捉佢地唔住!咁強勁嘅浪,真係好好玩!呢個人造浪係暫時同野人去過咁多個WaterPark之中,見到最「澎湃」嘅一個!所以大家玩嗰時記住捉緊自己嘅小朋友呀!

悠閒D嘅,就有啱一家大細Hea下嘅Lazy River~

本來仲有撐船仔玩,但可惜遇上例行維修日。。。

WaterPark入面都有幾間餐廳,玩到餓附近就有嘢食,好方便!! 又到溫馨提示:要玩WaterPark嘅設施,大人小孩都需要戴泳帽。唔記得帶泳帽唔緊要,即係好似我哋咁,即場喺WaterPark入面售賣各類玩水用具嘅舖頭買。

3)麗寶Outlet Outlet

當然係買嘢嘅地方,但我特別想介紹食嘢嘅地方。入面以日式餐廳為主。

重點想介紹個大型Food Court,因為好窩心咁設有「小童用餐區」,有適合小朋友嘅座位,小朋友食得開心 🙂

Outlet有得買、有得食之外,仲有個2017年5月先開幕嘅「幸福摩天輪」,我哋當然都「新屎坑」上去試試 😛

其實除咗以上設施外,麗寶樂園仲有個GoKart賽車場,但當我知野人未夠大個玩,我就冇再研究個賽車場係咩一回事喇 😛

香港去台中機程仲短過台北,而且麗寶樂園就近台中機場(大約只需30分鐘車程),所以特別適合只得3、4天假期,又想近近地帶小朋友出國玩玩嘅家庭。就算整個假期都只留喺麗寶樂園,而唔去台中其他地方,都可以有個充實而悠閒嘅假期 🙂 絕對係短假期推介之選!

想睇更多「親子旅遊真。樂趣」,歡迎去到3B MaMa Facebook Page

https://www.facebook.com/3bmama/

更多精選內容