暑期 親子樂 千嬅、子丹、茵媺外遊歎世界

撰文：Sunday Kiss
圖片：FB及IG

楊千嬅就同老公丁子高帶囝囝Torres飛咗去日本沖繩玩，千嬅更順道為月尾生日嘅老公慶祝，一家人同陽光玩遊戲，爽爆！

而甄子丹同汪詩詩就帶一對仔女去咗歐洲，遊走意大利、西班牙等地，參觀酒莊又揚帆出海，認真寫意。

過要數最堅揪嘅，非陳茵媺莫屬，老公陳豪忙拍劇，佢一個女人仔湊三個細路坐長途機返老家多倫多，連Aimee自己都話過程好刺激，之前仲花咗10個月去plan今次行程㖭！為人父母真偉大啊！

留港一族 – 運動型

陳奕迅咁忙，囡囡陳康堤當然要交畀老婆徐濠縈照顧，阿徐一向好sporty，囡囡亦被佢感染，兩母女趁暑假去咗camping又玩風帆。

12歲嘅康堤眨吓眼高過阿媽仲有一雙長腿，佢玩起風帆來，絕對有板有眼。

留港一族 – 深閨型

謝安琪囡囡Karina剛滿四個月，Kay已決定做全職媽媽專心湊女，雖然囡囡太細唔可以成日周圍去，但Karina已擁有自己嘅房間，分分鐘大過你同我間房，好羨慕囉！

梁詠琪話依家流感肆虐，將囡囡Sofia留喺屋企比較安全，佢話同Sofia喺屋企焗吓麵包都好過癮。