多部劇叫「糊」 王浩信 ：唔諗攞視帝
撰文：東方新地
攝影：歐家俊
仲未買到樓
《樓奴》（2015年）開始，愈做愈好，覺得發展點？
王：好順利、好幸運，好開心可以做到好多挑戰性嘅角色，同埋觀眾係接受呢啲角色，呢樣我係好開心，所以我覺得自己好幸運，因為演員係冇得揀角色，依家我希望做到每個角色嘅深度開始推進。
經濟幾時捱出頭？
王：仲未㗎，我都未買到樓，呢個最基本嘅嘢都未達到，距離目標仲有好長嘅一段距離，但的確依家比以前嘅狀態係安心好多，亦都令到屋企人安心好多，所以繼續努力啦，同我夢想嘅嘢係接近嘅，但我嘅夢想唔係用錢去衡量，譬如我依家多咗一啲同時裝有關嘅嘢（指服裝投資）、可能嚟緊又會有飲食有關嘅嘢，都係實踐緊一啲自己好鍾意嘅嘢，作為一個八十後，我都要繼續畀心機。
一劇接一劇，handle到？但你都仍然好fit、好精神，你夠唔夠瞓？
王：成日都唔夠㗎，所以我拍咗呢三套《不懂撒嬌的女人》、《踩過界》同《溏心風暴3》之後，我同公司講真係要抖一抖，其實我係一年冇停過，呢一年加埋嘅假期得三日，但嗰三日都要準備第二日嘅劇本，所以都唔算真係放假。最辛苦係上年啱啱撞完車，拍《不懂撒嬌》，夜晚三點鐘，本身個人可能有六十幾％嘅電，突然變到得番十幾個％，drop得好緊要。《踩過界》又係好甘，係我拍咁耐戲以嚟，戲份最多嘅一套，一集起碼有廿幾場、咩都關我事，要好識得去handle點去避重就輕，因為體能真係有限，嗰時每日差唔多工作二十個鐘，拍到後段有啲情緒好崩壞嘅戲，我做完一下，已經冇力再做第二下，有一、兩場我同監製講：「我真係太攰，你畀我抖一日，我再嚟啦！再嚟多take會好啲。」去到《溏心3》已經唧都唧唔出、個人係平靜，所以我同公司講要抖番個零、兩個月，充實下自己又好，但我其實幾難停，好似我知道呢幾日有假期，我又會想pick up番跳舞、上下唱歌堂，又想報下啲演戲班，外國有啲清除你唔好演戲習慣嘅班，我都想去上。
收到《踩過界》個劇本，你係咪好興奮？同埋你做咗咩功夫去演盲俠？
王：興奮！因為so far拍過最有挑戰性，又係林志華監製，佢同我都好多部合作，佢不斷挑戰緊我條界，我覺得難在佢將兩個幾難處理嘅身份擺埋一齊，一個係殘障人士，另外係大律師，一個正常人要考到大律師執照其實係好難，仲要係盲嘅人，點睇案例？點獲得法律知識？其實係好難，最開頭安排去盲人中心練習，練習點去用白杖、用耳朵去感受生活要面對嘅事情，譬如煮飯、切餸、睇書、點用iPhone 、過馬路點聽行人過路燈⋯⋯呢個角色有趣嘅地方就係一個盲人點判辯是非同幫弱勢社群爭取公義，我覺得呢個題材係非常之有趣，除咗盲，仲有法律方面，睇關於法律嘅戲、睇律師點上court打官司嘅知識去做準備。
出到嚟反應好好！
王：係，好正面。由《不懂》開始網上有好多討論，draw咗好多觀眾去睇，係我哋演員好大嘅得着，今次係第一次同愛奇藝合作，內地嘅點擊率都令我哋好鼓舞。
唔介意北上
《踩》內地點擊率咁高，你有冇諗過北上發展？
王：我絕對唔介意有咁樣嘅機會。我本身屋企人同我都係講國語，所以我起碼同大家溝通到，我都希望有更加多觀眾可以睇到我嘅作品，如果呢個係一個渠道，我會想去做。
《不懂撒嬌》你拎結他自彈自唱〈陪著你走〉，歌手出身，唱歌係咪另一個你未完成嘅心願？
王：可以話係，可以話唔係。其實喺工作層面上，我係應該畀觀眾認定我一個身份先，我覺得我主導自己喺演藝事業，的確以演員身份去行先，但唱歌我的確係好鍾意，當然好開心不斷有主題曲唱，而且旋律都好正，所以係咪要將音樂變成其中一部分事業，我又覺得未必一定要，但有又好開心，所以我唔識好肯定咁答。
好多套劇都有騷肌，你做咩運動操？
王：其實去到依家我唔係花好多時間去健身，反而喺飲食上，我係食得比較清啲，脂肪含量低就令大家覺得我仲係幾fit，依家一個禮拜操兩、三日，多番啲cardio（帶氧運動），其實拍劇係好好嘅cardio，拍《踩過界》嗰排，個人好乾身。
你咁多部劇叫好叫座，對今年視帝有冇信心？
王：真係唔諗咁多，我覺得我依家已經攞咗好多嘢，觀眾畀咗好多鼓勵我，譬如我出街，聽到大家話有支持我嘅劇集，我已經好感恩。
你最睇重係邊部？
王：一定係《踩過界》，始終自己做主角，個責任又大啲，所以自己都希望做多啲宣傳上嘅嘢，等多啲觀眾去睇。
嚟緊你仲有《溏心3》！
王：《溏心3》我好享受，唔係一個難嘅角色，係一個好溫情嘅劇集，拍呢套劇嘅時候，同呢家人建立咗好多愛，甚至乎我自己屋企都冇咁多溫馨場面發生，一家人唱歌、跳舞，聽到（李）思棋姐、菊姐（關菊英）、夏雨哥把聲，已經係好溫暖嘅事。有佢哋帶住，我已經好放心。
《溏心3》去葡萄牙拍外景，有冇掛住屋企？
王：點都有，facetime嗰啲都梗，時間都長嘅，喺葡萄牙最難係要不斷講好多葡文，要練好多英文嘅dialogue（對話），要不斷喺酒店房練，所以冇乜時間放鬆，嗰邊嘅節奏慢過香港好多，同埋氣候好正，風景好靚，我好鍾意呢個地方，覺得係會再去，甚至畀我過去住都制，我生日都喺嗰度過，好多葡萄牙嘅同事唱葡萄牙文嘅生日歌。
首次做生意，投資六位數喺銅鑼灣開時裝店，so far做成點？
王：其實數字上係好positive，講真我唔係一個好叻去計算嘅人，但係我好開心入面有好多好正嘅衫，可以同大家分享，同埋我partner create得好好，入到去，成個格調都好正，希望帶多啲有潛力同藝術成份嘅品牌同大家分享。嚟緊都會有比較優閒嘅item，例如計劃緊開café 。
你讀設計，有參與設計做一條line？
王：我覺得自己未夠班做呢樣嘢，始終fashion真係要學同浸淫，你去fashion week多過我，我要睇多啲嘢先。
