王浩信 :好想好想好想再生多個!

王浩信 :好想好想好想再生多個!

近日無綫電視劇《踩過界》熱播中,飾演盲俠的 王浩信 (Vincent)近年一劇接一劇,受訪時分享自己是何類型的丈夫及父親,直認今年因工作花少咗時間喺屋企,講到想唔想追多個,佢就興奮咁話⋯⋯

 

原文:東方新地
攝影:歐家俊

有報道話你同太太分居將軍澳,你返維景灣畔,但家住日出康城,兩頭住家?

王:梗係唔係啦,維景灣畔係我阿媽嘅,但亦都啱啱賣咗嘞,所以有啲嘢我要幫佢處理,因為佢住南區,我住將軍澳,梗係我搞啦!

你咁靚仔,啲人都唔理你有冇結婚,都應該有女埋身,你點防?

王:我冇喎,真係冇!講真,我幾自閉,收工我就返屋企,平時出去嚟嚟去去去得一個地方、永遠都同嗰一個朋友,我嘅生活就係咁,我除咗工作,係唔會遇到一啲異性,譬如我去做騷,台下有觀眾,但唔會同佢哋建立啲咩㗎嘛,所以我身邊唔會有呢啲機會。

你同太太點保持婚姻甜蜜?

王:呢一年我的確少咗時間花喺屋企,所以我未係好qualify去答呢條問題。因為呢一年,我返屋企嘅時間係相當之少,呢樣嘢我係做得唔夠好,希望我屋企人體諒。我諗嚟緊可能花啲時間去旅行,又趁住暑假,阿女依家大個、懂性、享受到假期,希望可以同佢哋一齊去旅行。

會唔會再追?

王:我好想!我好想!我好想!講完。哈哈!

你係一個咩類型嘅爹哋?

王:我開始慢慢發覺我係咩類型嘅爹哋,就係縱囉,哈!我覺得我依家個心靈都仲有好大個小朋友喺入面,我同阿女好多溝通係好level、唔大距離嘅,所以有好多佢需要嘅嘢,我亦都好明白佢點解需要,設身處地,如果我係一個小朋友問父母要一樣嘢,我都好想佢畀我,我希望盡量令到佢開心,我明白好多父母一冇時間陪,就買嘢,我知道呢個係唔好,我亦唔算成日咁做,我可以做嘅係唔使開工就陪多啲佢。

佢有冇演藝天份?

王:我覺得好有!

佢要入行、要選港姐,你支唔支持?

王:哈哈哈哈!唔係話支持,但又唔係一件壞事,當然作為父母嘅角度,一定係覺得捱更抵夜、辛苦,一定唔想佢咁辛苦㗎啦,但你自己又做緊,咁講咩啫,哈哈哈!又見到佢真係有呢方面天份,譬如佢有上drama 堂,又好鍾意唱歌,今朝無啦啦喺度唱:「我們是快樂的好兒童⋯⋯」見佢好享受,尤其是去佢學校表演,佢好享受喺台上面,我入行嗰陣,一上台,嘩,驚到瀨尿,真係㗎,第一次唱〈訊號〉幾鬼驚!我覺得父母對小朋友,唔係一定反對或者支持,溝通多啲啦!

你keep得咁fit,太太有冇喺飲食上幫到你?

王:我自己好有discipline,盡量食清啲囉!

出年你就七年之癢(2011年結婚),你婚姻有冇試過高、低潮,你又係咩類型嘅老公?係咪暖男?

王:我諗我對屋企唔係表面嘅暖,我係不斷默默地做,去支持、畀溫暖呢個家庭,但我唔會講:「我畀咗溫暖嘞!」我係咁。

有冇驚喜畀老婆?

王:盡量,過時過節都會喺屋企,希望create唔同嘅scene,或者送唔同類型嘅禮物,可能係自己煮餸或者真係買一啲嘢,因為我依家喺屋企要氹嘅女人唔止一個,我阿媽、我個女、太太,仲有我姐姐(外傭)同隻狗都係女嚟。

 

關鍵詞
王浩信

更多精選內容