為控制妊娠糖尿捱足980針 Bob嫂 :對得住個小朋友就OK

為控制妊娠糖尿捱足980針 Bob嫂 :對得住個小朋友就OK

藝人林盛斌(Bob)嘅太太Pearl而家懷緊第4胎, Bob嫂 為咗控制懷孕期間嘅血糖指數,足足打咗900幾針!喺Pearl身上完全感受到母愛嘅偉大!好多網友都大讚 Bob 嫂 好偉大!

撰文:Sunday Kiss

圖片:Bob Lam 林盛斌Facebook、Pearl Wong-L (黃乙頤)

每餐打胰島素 打足980針

Bob 嫂 懷上第四胎,一直有妊娠糖尿問題嘅佢為咗控制懷孕期間嘅血糖指數,係懷孕五週就要開始每餐打胰島素控制血糖。 Bob 嫂 喺自己Facebook 話:「我由第二個懷孕時第23週開始打胰島素針;第三個由第九週開始打胰島素;第四個時第四至五週就已經開始要打啦!其實咁樣每日打四針,整個懷孕嘅過程係40週,第五週開始打即係我打咗35×7×4=980針,仲未計餐前餐後要篤手指驗血」哇!打足980針真係唔嘢少!辛苦晒 Bob 嫂 啦!

對得住個小朋友就OK!

Bob 嫂仲話:「雖然我依家好習慣點樣處理糖尿病,但係其實我都經過一個掙扎嘅過程。講起當時嘅心情真係一匹布咁長,應該可以另開一篇來寫。但係我最終學習到嘅就係既然已成事實,就順其自然!可以做嘅就做晒佢,總之對得住自己;對得住個小朋友就OK啦!」母愛真係非常偉大!

 

習慣到可以一邊打針一邊幫個女搽麵包

Bob 亦都係Facebook 度話:「為咗控制懷孕期間嘅血糖指數,佢真係打咗九百幾支針,行運一條龍嗰隻,仲要係喺任何地方任何場合都要定時打針,佢已經pro到可以一邊打針一邊幫個女搽麵包,而個女幫手嘅手勢又pro到好似一個註冊護士咁,兼見到媽咪打緊針識得唔會走埋去騷擾媽咪。所以話,呢個媽媽真偉大,呢個女女真乖乖!」好多網民仲話Bob真要好好愛惜太太,太太真係好偉大添!

首先,感謝東網嘅報導,收到好多朋友留言祝福。無錯,為咗控制懷孕期間嘅血糖指數,佢真係打咗九百幾支針,行運一條龍嗰隻,仲要係喺任何地方任何場合都要定時打針,佢已經pro到可以一邊打針一邊幫個女搽麵包,而個女幫手嘅手勢又pro到好似一個註冊護士咁,兼見到媽咪打緊針識得唔會走埋去騷擾媽咪。所以話,呢個媽媽真偉大,呢個女女真乖乖!

Posted by Bob Lam 林盛斌 on Sunday, 30 July 2017

 

更多精選內容