為太太戒煙： 梁漢文 互相遷就好緊要
原文：東方新地
攝影：Jacy
太太患病學懂珍惜
你同太太林文慧（2008年結婚）點相識？
梁：92年喺朋友聚會識，之後幾年冇聯絡，98年喺Disco飲嘢撞番，開始拍拖，所以接近一齊咗二十年。
點樣維繫感情同婚姻？
梁：我哋兩個都冇乜特別去研究點keep，尤其是喺佢病咗之後（林文慧在2011年末發現患中期乳癌，2013年4月康復。）大家都明白對方多咗，之前可能有啲嘢冇諗咁細緻，譬如以前有時做完嘢，返到去唔出聲自己睇電視，活喺自己嘅世界、做自己嘅嘢，可能佢嗰時想同我傾吓偈，但我成日都唔出聲，但依家明白咗其實係需要多啲溝通，喺溝通入面就會慢慢了解對方多咗，同埋互相遷就係好緊要，依家我哋生活簡單咗，大家都享受生活。
佢唔舒服有冇改變你人生觀？
梁：梗係有啦，即刻健康晒，首先即刻戒咗煙，以前周圍亂咁食嘢，會食好多肉，唔食菜，依家會注意飲食，成個生活習慣改變晒，依家我哋兩個都好fit、非常之健康。
蘇永康都搞百日宴，你有冇諗過生個B？
梁：我諗我同太太冇好似阿Ta（蘇永康妻子）咁恨有小朋友，我知道阿Ta結婚嗰陣都好想有小朋友，但我哋兩個都唔係嗰隻，我哋都好享受兩個人，我太太唔係特別想有下一代，所以隨遇而安囉。
演唱會後，有咩計劃？仲有咩想做？
梁：今年年頭開始內地嘅巡迴演唱會，2月做完佛山，年尾做廣州，唔同地方都會繼續走巡迴。
閒時會做咩？
梁：我係運動人嚟，都係做運動，我打網球，都有跑步同踢波。
演唱會籌備成點？有咩驚喜畀大家？
梁：Rundown都排得八八九九，今次點解喺Star Hall開？個騷叫《我的另一半音樂會》，原意係我前年喺紅館開完個騷，歌迷叫我快啲搞Part 2，之後我做「男人幫」同其他工作，隔咗成兩年，我就話不如開另一種形式，以往開騷多數唱主打歌，一啲以往比較少機會唱嘅歌，今次一次過送畀歌迷同自己，因為我都恨唱嗰啲比較少唱嘅歌。
心態上有咩改變？
梁：非常期待同享受，喺唔同地方做音樂會，亦可以同歌迷近距離接觸，對我嚟講係好新鮮嘅事。心態上，進入咗我人生同音樂路嘅下半場，呢個階段、呢個場地做騷，對我意義都好大，我喺呢個場地睇過三個人嘅音樂會，第一個係(林)憶蓮，第二個(楊)千嬅，第三個阿公(蘇永康)，佢哋都係唱比較少唱、side track嘅歌，畀我嘅感覺好特別，所以我今次個騷都朝住呢個方向做。
依家做歌手相對少出唱片，淨係推單曲，你覺得係易咗定難咗？
梁：如果你計唱片，當然唔會好似以往咁密，我哋九十年代開始喺樂壇嘅人，經歷過九十年代唱片業嘅興盛，試過一年出三隻唱片，不停做，當然依家唔係特別期待買唱片嘅年代，形式唔同咗，但大家都有各自嘅方法去做廣東歌。作為飲「廣東歌奶」大，做咗咁多年廣東歌嘅人，依然有濃厚興趣繼續做廣東歌畀大家聽。
你九十年代可以去台灣、大陸發展，但你又好似冇去！
梁：我上網睇番我出過嘅唱片，原來我出咗四十隻唱片，當中包埋精選同演唱會，但做過嘅國語唱片係好少，99年做過一隻唱片叫《蝴蝶來過這世界》，中間同阿臣(陳奕迅)唱咗隻〈拔河〉，前年做咗一隻唱片《聽后感》，係咁多，因為我主要基地係香港，分唔到身去第度。
你一路都冇分身拍戲！
梁：電視劇我拍過三部，《隱形怪傑》同(林)家棟、千嬅，同(李)克勤嘅《廟街•媽•兄弟》，再拍已經係同Dicky(張衛健)拍嘅《齊天大聖孫悟空》，電影其實拍過好多部，最近就係前年嘅《全力扣殺》。
新秀好友交換衫着
入行以嚟，覺得發展點？
梁：其實喺呢行都好長時間，我91年開始出第一隻唱片，到依家都廿六年，好開心、慶幸遇到咁多好歌。為自己嘅音樂事業同廣東樂壇都付出咗好多時間，我亦都好享受，唔享受冇可能繼續做，算係做同樂壇共同進退。
出道冇耐，推〈火熱動感LaLaLa〉(92年)，當時你都受力捧，有冇期望？
梁：當然係一個機會，我唱過好多次，一個人唱晒都試過，悲慘版又試過，嗰時〈火〉對於我哋四個都係好大嘅project，我係剛剛出過一隻唱片嘅新人，更加之興奮，當時有贊助，宣傳覆蓋攻勢極強，差唔多所有節目都有我哋蹤影，當年budget係多到我哋好多嘅提議都做到晒，例如人形紙板、喺維港空中拉一隻飛船、出立體唱片，所以係好深刻。
網民成日都講「紅歌唔紅人」，你覺得喺呢個圈，運氣係咪好緊要？
梁：都好好彩吖，遇到咁多好歌，我都仲喺度唱緊歌畀大家聽，睇下你同咩人比啦，我憑住咁多年經驗同依家咁好嘅狀態，我音樂路嘅下半場，我相信我可以做得更加精彩。
有冇經歷過高、低潮？
梁：點會冇呀！個個都有㗎啦！最早期咪華星結業，嗰時我去咗橫店拍《齊天大聖孫悟空》(02年)，拍咗冇幾耐，收到消息，嗰時我都幾驚訝，一間做咗咁耐嘅唱片公司。最後當然開心後尾老闆林生(林建岳)買番華星返嚟，重建番個樂壇。
經濟上，有冇捱過？
梁：梗係有啦，新秀出嚟其實冇乜搵錢嘅機會，〈火〉之後都唔係特別多搵錢嘅工作，都係做好多宣傳嘅嘢，算係播種期，去到比較後期啲先至有有賺錢嘅工作。
有冇試過捱麵包？經濟拮据？
梁：咁又唔算好慘，因為當時唱片市道都唔錯，淨係試過一班新秀交換衫着，登台，打個電話：「喂，借件啡色嘢嚟襯吖！」我哋大家都係咁樣大，所以大家都好明白大家嘅情況。
有成績梗係好
你身邊咁多朋友，怕唔怕其他人將你哋事業作比較？你自己又有冇同人比？
梁：呢行一路都係咁㗎啦，就算你唔比，傳媒都會將你同其他人比，但我覺得最緊要都係享受我做嘅音樂，好希望我嘅音樂可以得到大家嘅認同，從中又攞到滿足感，當然攞到成績更加好。
獎項對你嚟講緊唔緊要？
梁：依家梗係冇以前咁恨攞到，以前會期待頒獎禮，我記得我第一次攞總選歌曲獎係〈呼吸〉(96年)，之前我揸住〈纏綿遊戲〉、 〈傷了三個心〉、〈衣櫃裡的男人〉都係攞唔到，到〈呼吸〉嗰年，頒到第七、八首歌，嗰時四大天王每人兩隻，去咗八隻，我計計吓，隔籬左右好多人未攞，睇個勢似乎真係冇，之後廣告時間，無啦啦司儀Dicky望住我，我好緊張，最尾真係攞到，之後當然有好多，〈好朋友〉、〈艦隊〉、〈七友〉等等，嗰時參加頒獎禮嘅心情係唔一樣，嗰種「有冇呢？」嘅期待、興奮同依家好唔同。有年參加商台頒獎禮，我覺得〈七友〉會有獎，頒到第二首都唔係，又覺得唔會冇，知道有機會攞「至尊金曲」，到真係嗰刻，我開心到成個彈到好高，好想有啲鼓勵，畀同事又好，自己又好，當然依家做音樂嘅心態就唔係為咗呢種嘅鼓勵，係希望大家享受我做嘅音樂。
每個人都有負面新聞、花邊新聞，你今時今日睇番有冇拖慢咗你嘅進步或者發展呢？
梁：我諗冇乜關係嘅，每一個artist都有自己嘅新聞出現，佢哋成日都話我太clean，冇乜負面嘅嘢，我諗我依家個人又大咗，以前有啲飲醉酒嘅新聞，依家都已經冇晒，呢啲都係階段性嘅問題，依家我會好好享受我嘅工作、享受我嘅家庭生活。
事業上最感激嘅人？
梁：有唔同範疇，填詞界當然係林夕，由〈纏綿遊戲〉引申到之後〈七友〉、〈半邊生命〉等等，佢賦予咗我嘅音樂好多色彩，係我一個好多謝嘅人。仲有一個係曾志偉，我好多謝佢，由明星足球隊，到一齊主持《娛樂北斗星》(93年)，到我拍完《齊天大聖》返嚟，我短暫地簽咗個agreement畀佢，但當時Paco(黃柏高)好想簽我，我開門見山同志偉講，佢非常之大方話：「唔緊要，你去啦！」好多謝佢嘅大方。
