母乳媽媽「其實你地唔好理我地就夠架啦!」

母乳媽媽「其實你地唔好理我地就夠架啦!」

前幾日有家人講起「上星期呀,有個同事開會泵奶,真係唔係咁好囉!」,然後,其他家人應聲附和,坦白講,有時都不太想出聲,因為知自己有時說起某些敏感話題都會幾激動就免得弄得氣氛尷尬罷,但直到我聽到「你自己覺得無野,唔等於人地覺得無野架嘛!咁d同事都唔知望你好定唔望你好……」
那刻,我就真的忍不住了…

現在香港社會好喜歡「反插」,例如以前不讓座會被人鬧,現在調轉是大肚婆如果出聲話人不讓座就會被人話「你老奉架?大肚大晒呀?」所以,有時想討論一些話題都費事了,因為怎樣都會被人鬧。

其實我真的從來無覺到母乳媽媽要有什麼特權,我們要的不是別人讚我們偉大或是對我們有額外的遷就,反而我作為母乳媽媽,我只是想要「你唔使理我得架啦,ignore 我就可以架啦」這樣就已經好夠。

我家人提出「你泵都算啦,係咪應該問聲大家介唔介意,我地d同事有d好保守,真係唔知點囉!」我又會想,「好保守」?其實餵母乳、泵母乳真係一件零意淫無任何色情成份的事,媽媽幫BB預備食物,整件事好單純好正面。調轉我會諗「咁你平日家庭聚會都會著件貼心小背心或者短褲仔,咁係咪又要問下d家庭男成員先呢?」同樣問題係「佢地比較保守,都唔知望你好定唔望你好?」

坦白講,餵母乳泵母乳從來無媽媽是特登露個胸出黎比人望,反而只是想著寶寶啜唔啜到,飲左幾多又者有時擔心自己點解胸硬會唔會塞奶驚有乳腹炎。反而,衰少少講,平日少女們著件貼心小背心小熱褲都是為了靚騷身材還是什麼再偉大的原因呢?咁著衫又會唔會要問下街上d男人會唔會有弄得別人好尷尬唔知隻眼望你好定唔望你好呢?

不是要攻擊其他人,因為每個人都有權穿自己喜愛的衣服,坦白講著得性感是我喜歡的事又無影響人,你要意淫望我,我都無法子。所以同樣套落母乳媽媽身上,我餵奶我泵奶有影響到你什麼呢?其實外人要做的就只是ignore 我地唔好理我地就ok架啦,唔使好刻意話望定唔望,點解咁卑微的要求都要常常受到白眼或是別人的閒言閒語….

我作為全埋身的媽媽已經好幸運,免卻了好多職場上因為泵奶所受到的冤屈,但好多時都會因為在街上餵奶看到好多醜惡的臉孔,這是最教我難受的。

所以,如果你從來無餵過人奶的話,我只是希望你們給母乳媽媽一個小小的空間,「你唔好理我地,唔使特登望我地,當無咩野咁已經好好架啦⋯⋯」

其實,餵母乳真的好不容易,不用尊敬我們不用讚賞我們,其實「唔好理我地啦!」已經是最好的支持和尊重。

更多精選內容