【親子好去處】海洋公園 夏水禮 2017 Summer MAX

專欄

廣告

夏天無玩過水點算是過了夏天呀! 第一次到海洋公園夏水禮,原來玩水都可以咁好玩。仲有巨型沙雕同6,500隻經典黃色小鴨任你打咭呃Like!

今日瞓到自然醒抖足精神先出發,今日係我哋第一年到海洋公園的夏水禮,兩個知道有得去玩水就已經超開心。
第一次搭港鐵到海洋公園站,唔是幫港鐵賣廣告,但真係超方便同快,相比起以前等巴士仲要行老遠入去真係好好多

B出口一過條天橋就到! 未入場前就當然嚟個指定動作先啦

今日實在太熱,平時企喺度幫遊客影相的職員全部都匿埋哂休息,間唔時先出嚟影! 不過好在有個有心人幫我哋影番張全家幅,果然係有料之人影得好好,構圖平衡、識得避人同埋影埋招牌!

準備入場lu…兩個急住想入去夏水禮玩水

夏水禮位置喺裡面的怡慶坊,未入去先見到外面有個搖控船玩! $10玩一次就俾佢哋兩個Share一齊玩

不過一開始都唔知自己玩緊邊架,雖然船身上有操作器的號碼,但係眼力唔好都真係唔會見到! 好在同時間冇咩人玩先加上轉下左轉下右就知道原來自己架船係黑色的

準備好哂…..GOGOGOGO!

熱下身先!

「超級巨沖」果然利害! 個個小朋友就企喺度等個大桶水裝滿水,一裝滿就倒落嚟淋到個個都濕哂

場內另一吸睛就係呢個成六米高的巨型沙雕塑

國際級大師Ray Villafane仲喺現場開工

後面呢隻變色龍真係好巨型同埋做得好仔細

呢隻海豚D牙仔點樣整架?! 對眼點解可以做得咁有神?! 真係好Amazing囉

場內Foto職員都影得幾好喎!

大師繼續在變身龍身上施工!!! 層皮真係逐粒逐粒咁雕…

睇完大師沙雕自己梗係要落手玩吓啦! 場內有兩邊區域可以玩沙,一邊係工作坊有導師同場教小朋友砌小沙雕(不過實在太多人要後補到1-2個鐘後)

我哋就選擇咗另一邊每節6分鐘的自由玩沙時間,包保大家實有份玩!

見佢哋兩個玩得咁開心又唔夠喉! 等我安排下次去沙灘慢慢玩先

跟住我哋去排隊玩「泡泡狂熱」,大會諗得特別周到,因為安排了唔同年齡層分開玩,所以爸媽們都可以放心自己較細的小朋友入場玩唔怕俾大件小朋友撞倒

好多爸媽都擔心問過我,究竟D泡泡入口會點算,首先每個小朋友都會獲派一副眼罩,所以一定唔會眼睛入泡,另外泡泡全部係人造泡,冇番皂成份冇香味! 所以就算泡泡沾到口都唔驚,泡泡場內仲有個花灑區,小朋友覺得唔舒服可以行過去沖一沖

本來仲擔心呀妹冇哥哥陪會唔肯入場玩,點知佢仲玩得超開心

一腳都係泡! 仲要拎上嚟俾我哋睇

玩玩下頭頂支泡泡大炮仲會噴出大量泡泡….

到哥哥入去玩啦,見到佢哋咁開心今日入嚟幾辛苦都值番哂

玩咗咁耐水兩個話有D凍(可能因為加上場內有冷氣),所以兩個話要出嚟曬一曬

我哋仲撞到朋友仔「莫莉」,可以同楊小寶一齊影相呀

場外設有更衣室,更貼心的是更衣室有分家庭式的,可以全家一齊入去一房間換衫

之後我哋到海濱樂園廣場去玩「勁爆夏日障礙賽」,因為身高問題呀芊只可以望住哥哥玩

然後本打算到威威天地,不過經過雀鳥劇場的劇目「天上王者」,就順便入埋去睇

貓頭鷹呀!!!! 乜唔係日頭瞓覺架咩? 仲有佢個頭先係可以兩邊180度轉架

佢哋兩個睇到平時只會喺圖書先見到的鳥類,即刻興奮到頂點

劇場完咗仲可以同幾隻鸚鵡影相 ^>^

行到入嚟黃色小鴨專區,見到有遙控鴨仔玩

一見軚盤又走埋去扭吓轉吓扮開車,原來已經好開心! 咁總之頭先我連$10都慳番啦

仲有期間限定紀念品買

6,500隻黃色鴨仔場面真係震撼! 有大有細…如果可以跳埋落水玩會唔會仲開心呢? if 唔諗污唔污糟的問題

玩咗咁耐諗住去食D嘢! 經過見到支付寶的 Icon 機器人蟻可哥

同蟻可哥搓包剪揼,贏咗佢仲有個掘沙耙耙送俾佢哋兩個! (其實蟻可哥連續三舖出包俾佢哋贏)

今日我好豪咁帶咗媽咪細路去咗海龍王餐廳食嘢! 本身諗住食Tea,點知原來過咗4:30就進入晚餐時段

可以邊欣賞大魚缸邊食嘢,真係好治癒! 當然價錢都唔平啦 (兒童餐 $198; 推介套餐 $368)

雖然價錢唔平,但係真堅好食!

兒童餐造型係一架海洋列車! 裡面有好多件炸雞、粟米跟西蘭花、仲有吞拿魚長通粉,份量都好夠,兩個都食唔哂。(仲有杯鮮榨橙汁同鴨仔造型芒果雪糕布甸)

鴨仔造型芒果雪糕布甸,感覺好得意! 好重芒果香味,咬落去後似雪糕但係又唔會溶,但跟住又似布甸好得意

最後到套餐的甜品! 呢係個造型已經夠呃Like 仲好好食tim!

食飽飽後本來我提議番屋企! 點知媽咪忠於「去旅行去到盡」的理念,同埋佢哋兩隻嘢完全唔攰好似啱啱先開始咁,就繼續纜車過去行勻海洋、海獅、鯊魚、水母、企鵝、雪狐館,不過小朋友真係超開心,所以最多辛苦D都冇問題
Photo byCANON 5D Mark IV,Len|EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

呀劍評分:10分

呀劍評語:第一次到夏水禮真係玩得好開心,玩完水仲可以到其他館參觀,一次過睇哂所有海洋生物,玩到閂門先走….謝哂皮!

《海洋公園 夏水禮 2017 Summer MAX》

今個夏天,海洋公園陪你潮開沙灘玩水派對﹗健力士世界紀錄雕塑大師Ray Villafane及團隊即場打造六米高巨型沙雕塑,讓你近距離觀賞及盡情自拍,而小朋友更可在玩沙專區堆出沙雕傑作﹗你還可挑戰連串玩水設施,暢玩夏日限定節目,盡情玩沙嬉水消消暑﹗威威天地更有大群LT Duck黃鴨仔出沒,勢必捲起萌爆熱浪﹗加上鴨仔主題美食及精品,大人細路都玩DUCK開心﹗

日期及時間

2017年7月1日 ‑ 8月27日 (逢星期日,六) 上午10時 ‑ 下午9時

2017年7月3日 ‑ 8月25日 (平日) 上午10時 ‑ 下午7時 (9小時)

日期

1/7-27/8;14/7-25/8、27/8期間每個星期五、六及日設有夜場(5pm-9pm)

入場費

(日場)成人$438、小童$219

(夜場正價)成人$288、小童$144

(夜場門票於7-11便利店購買)成人$248、小童$114


備註

持日間門票可遊玩至公園關閉

查詢

3923 2323

網址

www.oceanpark.com.hk

(以上資料更新至文章當日)