美心妹

新美心妹Keicy:我好貪靚!

熱話

廣告

自美心妹妹Celine(楊鎧凝)之後,廣告界、傳媒界湧現多位新童星小model,個個精靈可愛,近日有位小妹妹特別搶手,經常在大小商場活動曝光,她名叫胡梓盈Keicy,去年為美心拍攝裹蒸廣告彈出,被稱為新美心妹妹!Keicy活潑可愛得人歡心,最叻唱歌跳舞多才多藝,但最鍾意都是扮靚, 喜歡做小model都因為自己好貪靚:「有得化妝同着靚衫。」幕後有做開服裝設計的媽媽幫手扮靚,每次出席活動及拍攝工作,都會扮到最靚上鏡咁識做Keicy梗係搶手啦!

胡梓盈小檔案
英文名:Keicy
年齡:4歲(2010年11月18日)
家庭成員:父母、一妹一弟
嗜好:唱歌、跳舞、扮靚、食
曾拍攝廣告: 美心、ODM watch , SDM Jazz & ballet Academies、Somewear Sunglasses等
部分獎項:中華未來之星廣東總決賽幼兒組金獎、最佳才藝獎
第七屆全港學生公開朗誦比賽英語金獎、粵語銀獎
中華未來之星廣東總決賽幼兒組金獎、最佳才藝獎
2014全港幼兒英文歌唱比賽冠軍

三姊弟的性格中,Keicy 和弟弟屬活躍派, 妹妹較文靜,但她好喜歡跟姐姐玩, 姐姐一做曳事,她就會一齊曳曳。

想生夠四個
現年四歲的Keicy來自大家庭,爸爸Gary及媽媽Fiona喜歡熱鬧,四年抱三,妹妹叫Kassy,弟弟Gasper,父母仍想再添丁,覺得四小孩才夠圓滿,第四個最好是男仔。「兩個家姐係sister好開心,生咗個仔後湊夠『好』字,但又覺得佢寂寞,連Keicy都叫我生多個細佬,佢話自己有妹妹陪,但細佬冇好悶。」Fiona滿心歡喜道。如果第四個都是女,豈不是一直追下去?「唔會,頂盡四個好喇,但依家未刻意追多個住。」

訪問當日Fiona帶齊三子女前來,依嘩鬼叫無時停,弟弟應該很喜歡兩個家姐,不斷被拍打都笑笑口,好搞笑。三姊弟都好為食,尤其是Keicy,媽媽經常放她的為食相facebook,好多朋友俾Like,想不到竟吸引了美心星探發掘,Fiona說:「有人inbox叫佢去casting,去到淨係扮個好開心同覺得啲食物好好味嘅樣,第二日就通知我哋揀中佢!」就此拍了人生第一個廣告。

美心廣告出街後好多人讚Keicy可愛,封她為新美心妹妹。

美心廣告出道
上一代Celine的美心廣告大受歡迎,Fiona起初都戥女兒擔心,「好驚佢做得唔好有比較,因為Keicy好活躍,去到會跳跳紮影響進度,好彩大家都覺得佢好開心好搞笑,我都放心咗。」

拍攝當日正值午飯時間,有大廚即場烹煮裹蒸,香噴噴的現場環境,令第一次拍廣告的她放鬆心情,與小男生邊食邊玩邊拍,互相餵大家食,成功捕捉了兩人為食可愛的一面。問Keicy為甚麼喜歡美心廣告?「因為有鐘食!」媽媽即時糾正:「係糭!」

廣告出街後反應甚好,外界封Keicy為新美心妹妹,正式踏上小model之路,廣告、報章雜誌及活動接踵而來,不過,兩代美心妹妹未合作過,Keicy都希望將來有機會跟Celine姐姐學習一番。

潮牌主腦媽媽愛玩童裝
貪靚的Keicy喜歡做小model,做訪問也開心至極,因為有得化妝和穿靚衫,常研究化妝師姐姐的用具,想自己落手扮靚靚。當她見到特意為她準備的波波裙及彩虹紗紗裙,嚷着要換靚衫!其實兩條裙子都是Fiona的建議,她身兼時裝設計師及某本地潮流品牌服裝創辦人,另替多位藝人擔任形象指導,包括張智霖、譚詠麟、Mr.、周秀娜、胡杏兒、陳柏宇、鍾舒漫及HotCha等,參與過很多演唱會、fashion show及MV的服裝設計工作,來頭甚猛。

自三隻小魔怪出世後,她暫停工作專心湊仔女,開始接觸童裝,改為仔女DIY服飾,特別鍾情公主類,「我好鍾意公主衫、紗紗裙,佢又着得開心,就不停俾呢類衫佢着。」Fiona較少購買大牌子衣服,喜歡上網搜尋靚靚童裝,參考後再改良DIY,製作最稱心的衣服給三個小孩。「喺街見好多童裝都係大牌子嘅店,佢哋大量生產,令產品有時欠缺特別,我覺得童裝需要舒適,能夠散發小朋友天真可愛嘅美,唔需要over styling,有時頭髮同飾物都可以令佢哋好出眾,最重要係小朋友着得開心。」

Keicy喜歡彩色,所以她的衣着好繽紛,隨着她慢慢成長,Fiona對她的打扮簡單化,「因為大個想着都唔cute啦,服飾一定要迎合唔同場合同年齡需要,所以近期開始我想佢哋着得簡單耐看,最鍾意連身裙,方便唔使諗點襯。我好享受為小朋友打扮,但唔會盲目跟隨潮流,最緊要着出小朋友嘅真性情。」

童裝配襯貼士
童裝沒有潮流之說,一些長青款如寬身上衣、Roll-up長褲、連身裙及leggings 等,都是舒適時尚之選,特別推薦歐美的tutu dress(紗裙),服飾可愛有親切感。舊衫穿厭了或者衣服太平淡,可到深水埗欽州街及佐敦寶靈街,購買一些布藝素材及飾物再mix and match!媽媽幫子女襯衫都是一種溝通,好好享受扮靚家庭樂吧。
想睇更多Keicy生活照及Fiona的扮靚心得,即上http://vipblog.sundaykiss.com/fiona/

德望生勤學寫靚字
Keicy雖開始多拍攝工作,但Fiona認為做小model只為興趣及留念,一切以學業為先,假日才出動拍攝,平日不接job。Keicy是德望小學暨幼稚園K2生,校風並非守舊古板,從沒詐型她做小model,老師更讚她sweet,令人感到窩心,唯一要她寫字加把勁,因她是細B,執筆寫字稍遜,Fiona指下學期她有明顯進步,「K1開始畫線同圓圈,K2就學寫A至Z、數字1至30,佢下學期進步咗好多,初初唔識用力,坐姿亦唔係幾好,德望好注重寫字同坐姿,有本筆順簿,要跟番筆順一點一劃,有教坐姿、執筆姿勢要點樣。」

德望出名德育,Fiona是德望校友,希望女兒入讀後乖巧有禮,「每日返學要經過好多老師先入到班房,佢要先上一條樓梯,有兩個老師企喺門前迎接,學生見到老師要鞠躬講good morning、good afternoon,之後有老師幫佢哋唧消毒液洗手,轉位又有老師同校長,再上樓梯又有一兩個老師,每層都有。德望唔同其他學校,學生要自己入學校上班房,唔係家長直接送到入班房,訓練到小朋友獨立啲、有禮貌。」

 

中港屢奪才藝獎
在學校協助培育下,Keicy多才多藝,最喜歡唱歌、跳舞、畫畫、朗誦及英文,參加過多項比賽奪得佳績,校內比賽有國畫優異獎;校外有全港學生公開朗誦比賽,英粵語一金一銀、全港經典故事、小品、詩歌表演比賽銀獎、傑師盃兒童才藝表演大賽冠軍等等,年僅四歲已摘下十多個獎項!

早前她更北上神州參賽,一月剛到廣州參加由中央電視台主辦之中華未來之星廣東總決賽,Keicy勇奪最佳才藝獎及幼兒組金獎,雙喜臨門。最新動向是參加香港迷你版RunningMan《Running Junior》,8位4至10歲小朋友將分成兩隊挑戰關卡,競逐Running Star寶座,Keicy被選中做小隊長,帶領一眾小隊員挑戰對手,節目四月會在YouTube有得睇,Keicy粉絲要睇實喇!

撰文:Ling 攝影:Clay Lam(部分相片由受訪者提供)
化妝:Wasabi@KINGS MAKE UP 髮型:Wilson Wong@KINGS MAKE UP
形象設計:Fiona Kei 場地:comma party(tel: 97356464)