直擊!! 多啦A夢「STAND BY ME 期間限定店」

[邊樣最矜貴?]

全場最矜貴同最貴，就一定係呢隻限量版1：10木製3D多啦A夢Figure喇!呢隻figure用櫸木製，配上3D版多啦A夢獨有嘅金色啷啷，而包裝木盒及多啦A夢腳下都刻咗編號，極具收藏價值！首批公開發售之限定數量為100隻。而且只會喺2月7日上午11時正發售；每人每次只限買一隻，所有號碼按隨機形式派發，不設更換。

[最抵賣之選]

全場最平最抵玩，就係呢部扭蛋機喇! 20蚊(4×5蚊)扭一次，每隻蛋裡面都有一個角色造型襟章，仲有一款係隱藏版tim!!記者驟眼睇裡面好似特別多胖虎，如果要集齊一套，可能要準備多啲彈藥，或者要預多啲時間，同其他多啦A夢迷交換喇!

[每日必搶item!]

呢個多啦A夢造型紅豆包，喺Pop-up store營業期間，為確保新鮮，每日都會限量製作60個，每個25蚊，每人最多買兩個，真係多啦A夢個樣喎! 搶到都唔捨得食啦!!

[邊樣最多人搶?]

呢把以3D多啦A夢造型製作嘅長柄雨傘，今日就最受傳媒朋友歡迎，雖然一把要成$300蚊，但係設計嘅特別之處，就係落雨嗰陣，雨水會沿兩邊落下，睇落就好似多啦A夢喺度喊緊咁！

其他紀念品包括:

點買心頭好?

主辦單位已經準備咗一張”點心紙”，多啦A夢迷去到現場，可以趁排隊嘅時候畫定自己想要嘅產品，點心紙上面有圖有價錢，仲註明哂某啲產品嘅特定發售日期，大部分產品每人只限購買兩件，所以買嘅時間只要畫清楚數量就可以。櫃台接受現金同EPS付款，如果over$350以上，仲可以用信用卡埋單! 不過為咗支持環保，記得自備購物袋(或者喺現場以$20換購)!

[多啦A夢日式小貨車任你影]

上次呢架小貨車出動嘅時候，大部分時間都係喺架拖車上面，今次唔止可以落地，仲可以俾市民行近啲影多幾張靚相tim! 到時記得留意吓，車頂個竹蜻蜓係識得轉，同埋架車個內壠都好精緻架!

【STAND BY ME 期間限定店】

時期 ：2015年2月3日(星期二)至22日(星期日)

地點 ：銅鑼灣Hysan Place地面（啟超道入口）

營業時間 ： 星期一至五：上午11時至晚上9時

星期六、日及公眾假期：上午11時至晚上10時

** 2月3日(星期二)首日的營業時間為下午1時至晚上9時**