巨肚 胡杏兒 澳洲返港 老公Sweet爆接機

巨肚 胡杏兒 澳洲返港 老公Sweet爆接機

胡杏兒 陀巨B仲同胡說八道會遠赴澳洲拍攝,尋日終於返港!落機後,杏兒喺社交網站上傳咗同老公仔嘅合照放閃,老公阿Phil仲帶咗一束粉紅色花去機場接杏兒。見杏兒小鳥依人咁依偎老公身邊,隔住個Mon都感受到佢嘅幸福啊!

撰文:Sunday Kiss

圖片:胡杏兒IG

Sweet爆接機 素顏放閃

杏兒上月底不怕懷有六個多月身孕,同胡說八道姊妹團飛去澳洲拍攝旅遊特輯,期間老公阿Phil實心掛掛。兩個幾星期後,Phil終於等到愛妻返港。杏兒昨午上傳Phil窩心接機相,秒速獲得四萬幾人激讚同留言祝福!胡說八道會嘅好姊妹亦湊熱鬧留言,讚佢哋兩公婆Sweet爆啊!

杏兒喺Instagram發文,留言話「Hubby came to surprise me with flowers at the airport @hakkaphil」,擺到明要公開表揚老公仔!雖然杏兒素顏又戴住太陽眼鏡,但從佢嘅笑容都Feel到成個幸福樣出晒嚟!
胡杏兒
陀著巨B,杏兒堅持做靚媽,著住依條粉紅色長裙,貴氣十足!

 

雖然返番老公身邊,但杏兒返港後都不忘一班好姐妹!佢話好似發咗場夢咁,仲開始關心佢班好姐妹過成點㖭!

 

胡說八道會首度合作

胡說八道會由(左起)姚子羚、黃智雯、胡杏兒、李施嬅、胡定欣同豹嫂胡蓓蔚組成。
胡杏兒陀B足三個月,第一時間通知胡說八道會成員,姊妹情深。

懷孕快將6個半月嘅 胡杏兒 大住肚去澳洲拍攝相信都十分吃力,唔只要離開老公身邊,仲要趕拍攝進度。不過,一向係工作狂嘅杏兒一於少理,難得有機會同一班好姐妹去到澳洲寓工作於娛樂,當然唔可以放過!

老公想陪飛

胡杏兒 同老公李乘德一直恨做父母,儘管杏兒陀B初期反胃又冇胃口,體重不重反輕,不過未有嚇怕杏兒,更望為夫家生多幾個,建立一個大家庭。5月母親節時陀B四個月的杏兒,終於對外公布喜訊,經歷孕吐後身體狀態回勇後,杏兒再度活躍起來,不但中港兩地開工,更跟老公出埠旅遊。近日陀住六個半月的杏兒更與胡說八道班姊妹齊齊飛澳洲,上月29號出發前,杏兒接受訪問口話老公唔擔心:「有班姊妹照顧我,老公都放心﹗」

杏兒喺澳洲期間經常上載同好姐妹嘅合照,有好天氣又有好姐妹喺身邊,夫復何求?

實情係老公同身邊人比她憂心,好友透露:「杏兒接呢個job前係陀B前,當5月宣布有B之後,導演好緊張同佢講BB最緊要,隨時話去唔到都冇問題,阿Phil(李乘德)最初仲想陪飛㖭,反而杏兒最老定,因為佢問過醫生意見,keep住檢查,知自己同BB狀況非常好,而且去澳洲大約八個鐘唔算長,又坐頭等,瞓個覺睇套戲都到,如果美國、歐洲就可能要再諗諗喇﹗加上好多航空公司規定,懷胎28周上機就要出示醫生紙,有啲甚至禁飛,杏兒想趁唔飛得前玩番夠本,而且成班姊妹齊人出埠係千載難逢機會,第時BB出咗世,未必有呢個機會﹗」

陽光與海灘 胡杏兒 瘋狂晒孕照

今次雖然是工作,但由於拍攝以飲飲食食為主,大家當玩多過開工心態,不時網上直播拍攝情況。胡定欣龍友上身,拿住專業相機為大家留倩影,杏兒如表演時裝騷,靚衫每日一look,更一起入廚兼夾玩姊妹爆大鑊,又安排蒲吧。杏兒講笑話:「呢次拍攝冇任何危險動作,最危險就係去酒吧結識異性,最期待定欣有冇艷遇。」幸福少奶奶杏兒,最想姊妹們都得到幸福。

更多精選內容