夫妻檔搞童裝生意 姚嘉妮 佩服林祖輝:佢係實幹型!

夫妻檔搞童裝生意 姚嘉妮 佩服林祖輝:佢係實幹型!

無綫熱播中的穿越劇《超時空男臣》唔止蕭正楠、曹永廉同何廣沛人氣急升,連飾演天朝飲食集團主席夫人的 姚嘉妮 都被力讚演技好,有實力,但近年嘉嘉不時被誤會已淡出螢幕,喜愛演戲的她沒有氣餒反而把握每個演出機會,今次終於成功入屋。 其實 姚嘉妮 同前亞視藝員林祖輝結婚十一年,育有一仔一女,談到和丈夫一齊搞童裝生意,嘉嘉直言佩服丈夫:「佢係實幹型,唔會吹噓自己有幾叻,只會埋頭苦幹工作。」

 

 

 

撰文:Sunday Kiss
圖片:《超時空男臣》截圖、姚嘉妮 Facebook、Sunday Kiss

姚嘉妮被誤會已「收山」

今年39歲 姚嘉妮 於2006年11月11日與前亞視藝員林祖輝結束七年愛情長跑拉埋天窗,並分別於2009年和2012年誕下女兒林煦錡(Kyra)和兒子林璟豪(Kyros)。自結婚生子後,嘉嘉指很多時被誤會已經「收山」唔再拍戲,因此大家很多時只會看到她主持節目。

 

 

 

 

 

嘉嘉懷第二胎 放棄舉家北上

姚嘉妮丈夫、前亞視藝員林祖輝早年棄影從商,曾受聘於體操王子李寧旗下的「非凡中國上市公司」任高級副總裁,長駐北京管理一班國寶級運動員,高薪厚職,成功由藝人轉型做生意人。不過正當事業如日方中,林祖輝打算接嘉嘉和女兒Kyra北上長住,連北京哈羅也取錄了Kyra,當時嘉嘉發現懷有第二胎,經商量後放棄舉家北上念頭,決定留港養育孩子,祖輝說:「對於小朋友成長,香港嘅環境始終較理想,所以決定我返來。」

 

 

姚嘉妮和林祖輝婚後誕下大女Kyra和細仔Kyros,湊夠一個「好」字,一家四口並經常以幸福家庭示人。

 

 

夫唱婦隨 童裝界大展拳腳

放棄高薪厚職,一切重新開始,細仔Kyros出世後,祖輝要思量新發展,他說:「嘉嘉話如果可以做同小朋友相關嘅嘢就好喇!」太太一言驚醒,加上林祖輝與友人傾談下,得悉有幾個知名品牌的童裝生意,覺得有利可圖。「我同拍檔投資咗七、八位數字,未來會不斷擴張,做零售如果得一間舖,好難賺到錢,當做到一定規模,成本攤分咗,賺錢機會先大啲,甚至賺多啲。」2015年,祖輝取得Levi’s 、Nike、Jordan、 Nike SB等多個大牌的童裝衫代理,短短三年間,已開了五間的童裝店。

 

 

老公是實幹型

而嘉嘉坦承在生意上,99%由老公一手包辦,嘉嘉會幫手揀貨,一對寶貝仔女更會做model,一家人齊心協力。嘉嘉認為丈夫自返港做生意後,更佩服他的工作態度:「佢係實幹型,唔會吹噓自己有幾叻,只會埋頭苦幹工作。我知佢有困難,睇到佢做得辛苦,有時凌晨三、四點佢仲喺書房,但從冇講過一句怨言。當我知道有問題,我會好嬲,有冇搞錯呀?點解咁㗎?但佢會淡然話『做嘢係咁㗎啦,我唔覺得係咩一回事。』喺佢煩惱入面,我為佢擔心,佢反而勸我唔好,冇人做嘢係一帆風順。」


著重親子時間

由於林祖輝有段時間長駐北京工作,甚少時間和爸爸相處的Kyra,從前給予祖輝零分,但隨著父女相處時間增加,分數亦隨之增加,Kyra點頭示意最喜歡現在的爸爸。以前林祖輝一個月只返港一兩次,每次逗留一個周末,現在再忙都好,每晚都能一家團聚,嘉嘉說:「依家佢自己生意,可以控制到時間,佢比其他人早起身,送完囡囡返學就返工,夜晚六點幾返嚟食飯,八點幾氹仔女瞓覺,讀bedtime story,之後佢就入書房繼續工作。假日要陪仔女出去玩,佢寧願朝早四五點起身工作,做完就可以全日陪仔女。」

做個好老婆

嘉嘉覺得做好老婆和母親的分內事,已經是對丈夫最大的幫忙。之前,她更為了湊一對仔女,暫停拍劇。「好彩仔女唔係太難湊,喺體能上唔算吃力,佢哋跌落地喊一陣就冇嘢,但我一直都擔心,係做媽咪嗰種擔心,仔女好似電視遙控,我係部電視,佢哋咳一咳好似撳掣咁,部電視即刻有反應,我個心會乸一乸。」

 

 

 

全文完

更多精選內容