清甜又排毒 心內美南瓜牛蒡湯

清甜又排毒 心內美南瓜牛蒡湯

早幾日行過街市茶檔,店員姐姐推介我買心內美嚟煲湯,佢仲即場教我買埋其他材料,咁就可以煲一個既可以抗氧化又可以排毒嘅靚湯。其實我當時正在考慮緊今晚煲乜好,見佢如此落力推介,咁我就聽佢話,煲依個 心內美南瓜牛蒡湯 啦~

撰文:小小豬的成長日誌

圖片:小小豬的成長日誌

“心內美” 其實就即係紫蘿蔔,含花青素,係一種天然抗氧化劑,而且含熱量較少纖維素較多,吃後易產生飽足感,有助減肥,常吃可降血脂,軟化血管,穩定血壓,預防冠心病,動脈硬化,膽石等疾病。

牛蒡可刺激大腸蠕動,有助排出體內的毒素,同時亦有助降血糖、降尿酸、降血壓、降膽固醇、保肝、消炎、抗菌與抗腫瘤。

南瓜就營養成份很高,係維他命A嘅優質來源,有防止糖尿病、高血壓以及肝臟和腎臟的病變。(網上資料)

材料就有心內美、南瓜1/4個、紅蘿蔔2條、粟米1條、牛蒡1條、蜜棗3粒及瘦肉約$30~


“心內美”就好似一個肥啫啫白蘿蔔

切開就有好靚嘅紫色,唔怪之得叫心內美啦~

將心內美去皮切塊~

牛蒡去皮切片,其實店員姐姐話可以唔去皮煲,不過我就唔太接受那一種外層充滿泥感覺,覺得好似洗極都唔乾淨,所以我都係去皮嚟煲啦~

南瓜去皮切塊

粟米及紅蘿蔔去皮切塊~

瘦肉汆水備用;蜜棗洗乾淨~

煲內放約3L水,待煲滾後加入所有材料~

先用大火加蓋煲約10分鐘~

然後轉慢火加蓋煲多2小時~

最後加鹽調味就可以飲得~

始終都係第一次煲心內美,所以初時都真係有點擔心,不過好在味道都唔錯,入口清清甜甜,就好似飲緊蘿蔔湯,所以我家兩位老細都鐘意飲呀!

溫馨提示:
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!

BY小小豬的成長日誌

更多精選內容