【muji ma食譜】派對食物 自家製 簡易版瑞士雞翼

【muji ma食譜】派對食物 自家製 簡易版瑞士雞翼

今次整唔駛汆水….唔駛煎….唔使醃….用浸焗方法,整出肉滑而皮彈瑞士雞翼,簡單到不得了!平時做餸,仲可以當派對食物 ,大人細路都鍾意食!

 

 

 

材料:

雞翼 13隻
鉅記高級醬油 100ml
雞湯 250ml
冰糖 65g
玫瑰露酒 1茶匙
薑 2片

做法:

將醬油,雞湯,薑,玫瑰露酒 及冰糖大火煮滾。
冰糖煮溶後放入雞翼。
見到汁料再次煮滾立即放蓋。
大火煮3分鐘。
3分鐘後熄火,請不要開蓋,焗佢15分鐘。(用焗浸方法,令雞翼必滑. )
15分鐘後,用刀篤一篤佢冇血水就完成。(如果有血水就浸多幾分鐘)

 

 

Tips:

1.用完的汁我會留起再用,方法是汁料凍了會浮白色的油係面,我會用小匙刮走,然後放入保鮮袋或食物盒放入冰格。(其實當作滷水一樣保存期冇限,最重要放冰格沒有變壞就可以,我就用到1年左右就唔要。)
2.除了瑞士汁做雞翼,可以做瑞士汁炒河,烏東,意粉,滷日式蛋等等都好好味!(所以汁可以留起再用,越留得耐越好味。)

3.如果買不到鉅記醬油,可以係超市買的瑞士汁或自己調好瑞士汁味到,用我的方法大火3分鐘,浸焗15分鐘都做到滑的感覺。

4.浸焗時瑞士汁沒蓋過晒雞翼,記得浸焗10分鐘左右,開蓋快手反一反雞翼,令雞翼上色均勻及入味。
5.浸焗雞翼15分鐘後,用刀篤一篤如冇血水就完成。(如果有血水就浸多幾分鐘,因視乎雞翼多少,煲的溫度有所不同。)

極力推介:

呢間經營超過半世紀的醬園,專門釀造調味醬油、豉油等等,豆香味濃,所以醬油用來做瑞士雞翼一流,夠濃夠色夠味,連蘇絲黃都曾經推介過。 平時要灣仔鵝頸橋鉅利醬園店先買到,點知係我樓下家雜貨店有得買,真係開心到發瘋!用咗佢唔會買其他產品。

更多精選內容