補而不燥 雙參海竹頭無花果湯

補而不燥 雙參海竹頭無花果湯

話說早前參加活動時收到一樽花旗參,原來打算留嚟冬天時煲湯用,點知係網上見到原來花旗參仲啱夏天飲,所以就即刻買齊材料,跟住試下煲依個雙參海竹頭無花果湯!

 

 

撰文、圖片:小小豬KINSEY

雙參海竹頭無花果湯

其實依一樽仔花旗參我都收左好耐,一直都覺得依啲參類依啲係補嘅食材,係要冬天先啱用嚟煲湯,但原來花旗參就係除外,因為佢嘅功效就可以滋陰補氣、寧神益智及清熱生津,而且仲係補而不燥,所以都好啱一家大細飲用呀。

我係網上見到依個食譜,將花旗參、沙參、海竹頭、枸杞子加埋一齊煲,可以養陰清熱,潤肺化痰,生津止渴同埋增強免疫力。小小豬都就嚟開學,加上又開始轉天氣,係依個情況下增強 免疫力 係好重要,所以就跟住煲嚟飲下啦!

材料包括花旗參、沙參、海竹頭、枸杞子各1兩(一兩相等於37.5g),無花果5粒,及瘦肉約$40。

瘦肉洗淨汆水;其他材料就浸洗備用。

煲內放約3L水,待滾起時,加入所有材料。

然後用大火加蓋煲約15分鐘

再轉慢火加蓋煲多1.5小時

加入鹽調味後就可以飲得啦!

其實初頭都好擔心嗰一種花旗參味小小豬係會唔鐘意,唔肯飲個湯(咁就浪費左我一番心血)。好在依隻豬仔都算乖乖,唔算太抗拒依個花旗參味,都肯半合作地飲左一大碗湯啦!

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!
BY 小小豬的成長日誌

更多精選內容