太太預產期為十月 暖男張達倫陪行街 全程護駕

太太預產期為十月 暖男張達倫陪行街 全程護駕

近日娛樂圈喜事特別多,36歲楊洛婷誕6磅半B女Tanya,BB似足媽咪咁靚女。另一對準父母係張達倫同太太Kimmy,而張太佗B仔,預產期預計在十月中。太太臨盆在即,出名係愛妻號嘅張達倫不用工作的日子全天候陪住太太,日前夫婦二人到IFC購物,張達倫全程扶實及拖實愛妻,認真貼心!

撰文:Sunday Kiss

圖片來源:新傳媒資料庫

張達倫 愛屋及烏

張達倫與Kimmy早於大專時期認識,Kimmy是達倫哥哥讀酒店課程的同學,當時兩人都各自有男女朋友,沒有走在一起。縱使相識多年,一直有聯繫,但各自有生活,Kimmy曾與一名外國人結婚,育有一個囡囡,現已13歲。離婚後與達倫在一個聚會中重遇,方發覺雙方就是Mr. and Mrs. Right,拍拖兩年決定舊年11月拉埋天窗,影婚紗相都帶同繼女一齊去,愛屋及烏。雖然達倫與繼女並非一齊住,但仍時刻關心對方:「我哋關係十分之好,我同佢好似朋友,我都大唔透。喺呢個時代唔可以再用長輩同後輩之分,小朋友唔會想同你溝通,佢哋已經成日對住部電話,你再敦起個款佢哋睬你都傻啦,所以我同佢會保持朋友關係。」Kimmy指囡囡也很喜歡繼父,出街食飯都會叫繼父一齊,又留意他所演的劇集。

 

舊年11月至結婚,婚後兩個月就一索得男,今年一周年紀念前就已經要迎來第一個BB,好幸福。

 

大婚當日徐榮(左一)、朱滙林(中排左)及黎諾懿(右)等有份做兄弟團。

太太預產期 比張達倫的生日僅早一天

今年10月兩人將迎接B仔出世,預產期比達倫的生日僅早一天,張達倫認為生日、父母親節等節慶,應該與父母慶祝,「我生日每年都希望同媽咪食飯慶祝,嗰日最辛苦其實係媽咪,唔係我㗎!」張達倫最希望囝囝有個快樂的童年,並將自己最好的教給兒子,幫助囝囝發掘長處,一齊踢波,長大後為興趣而工作,而非單純為搵錢去做工。

張達倫嘅好兄弟黎諾懿快過諾懿造人半年,他的囝囝叫「小春雞」,張達倫夫婦都有去探BB!

 

生仔生女隨緣

下月B仔即將出世,張達倫和Kimmy的心情既開心又緊張,達倫看見太太懷孕咁辛苦,對佢自然寵愛有加,每日也陪伴老婆左右,寧願自己睡少一點。達倫笑言生仔生女都好開心,但他坦言生仔會令兩邊家族感覺圓滿一點。「我阿哥啱啱生咗個女,老婆幾個家姐全部都係生女,加埋我繼女,所以今次係仔就覺得成件事好圓滿,唔使再生都得啦。」真的一個夠晒數?「唔知呀,睇吓生咗呢個點先啦,生多個對阿仔嚟講有個照應,好多人都叫我生多個嘅,隨緣啦。」

 

行街細心拖實

早前張達倫和太太去中環IFC行街街,二人去超市買了飲品和食物,埋單畀錢同拎戰利品全由張達倫包辦,臨走攞車,張達倫又一個箭步行去畀泊車費,然後再光速飛番去傍住大肚老婆,見佢全程好似保鑣一樣咁貼身,其實張達倫不嬲都有風度出名係好男人,加上老婆臨盆在即,緊張啲都好正常!

 

雖然入貨唔多,不過一樣全部由張達倫負責拎,唔使老婆操勞。

 

埋單、買嘢、做司機、做跑腿一概都係廿四孝老公張達倫包辦,十足貼身保鑣。

 

 

關鍵詞
張達倫

更多精選內容