愈老愈恩愛 靚靚Chilam 拍拖去杭州拜佛

愈老愈恩愛 靚靚Chilam 拍拖去杭州拜佛

好多人成日問夫妻相處之道,結婚多年到底如何維繫?這方面應該請教靚靚袁詠儀同張智霖!得閒靚靚一句寸老公廢,一時Chilam回敬叫老婆送樓,呢啲打情罵俏每日不時上演。就係咁,佢哋拍拖10年,再由情侶變夫婦,一眨眼結咗婚16年,歲月喺佢兩個臉上不留痕跡,連感情都廿年如一日。最近二人撇甩囝囝張慕童,拍住拖去杭州普陀山拜佛,每天在演繹「一路上有你」真人版!

撰文:Sunday Kiss

圖片來源:新傳媒圖片庫、袁詠儀微博

靚靚 Chilam愈老愈恩愛

放工對住仲唔夠皮,兩年前兩公婆孖住拍內地真人騷《一路上有你》,大騷恩愛,之後成日孖住接廣告、出event,就算Chilam出埠開工,阿靚都做跟得夫人,去到邊都黐到實,鬼咁冤氣!

 

二人喺《一路上有你》扮老,其實佢哋現實咁恩愛,一定會白頭到老啦!

 

拍拖去杭州

靚靚Chilam除咗啱key啱嘴型,最夾就係大家都有顆向善的心,最近就拍住拖去杭州普陀山拜佛,仲組團約埋老友蔡一智夫婦等人,一行人走訪各大寺廟朝聖之餘,又玩足幾日,大家都撇低仔女,享受吓拍拖日子!靚靚大讚淨慈寺非常漂亮,更有幸認識到親切嘅主持戒清大師,並於微博留言:「完成了普陀山之旅後,大家再有緣份到了杭州參拜了淨慈寺。」

兩公婆拉大隊上杭州普陀山拜佛,形影不離。

 

 

老友蔡一智夫婦亦有隨團出發,同Chilam、靚靚到處品嘗齋菜及參觀寺廟。

 

 

Chilam 癡纏管接送

又早兩日,靚靚同朋友現身銅鑼灣街頭,以為佢今次賣甩老公同個仔,原來佢只係行過幾條街去會合揸車接佢嘅老公Chilam,行個街都管接管送,認真癡纏,見少一陣都唔得!

 

靚靚喺轉角位撞到朋友嗲兩句,點知有位大叔差啲撞到靚靚,好在靚靚夠敏捷一個閃身避過咋!

 

Chilam樂做柴可夫接靚靚返歸,友人舉機玩自拍,Chilam更主動揸機,好gentleman!

 

更多精選內容