秘簽杜琪峰 劉華欽點 龔慈恩女拍戲

秘簽杜琪峰 劉華欽點 龔慈恩女拍戲

於近年的星二代中,有才華、有仙氣又稱得上女神級,龔慈恩17歲囡囡林愷鈴 (Ashley)肯定係其中之一!由13歲開始跟住媽媽出席首映、行騷,早已經被各大經理人公司吼到實。雖然當年兩母女一直口徑一致,話冇興趣入行、讀完大學至算,但近日Ashley頻頻曝光獨立出席品牌活動終於改口風。原來近水樓台先得月,Ashley已秘簽大導杜琪峰旗下經理人公司,更獲劉德華欽點拍青春電影《熱血合唱團》,真係前途無限!

撰文:Sunday Kiss

圖片來源:新傳媒圖片庫、龔慈恩微博

龔慈恩女林愷鈴 有台型有仙氣

近年一眾明星的後裔備受關注,好似邱淑貞女兒沈月、任達華女兒任晴佳等,其中龔慈恩女兒林愷鈴 (Ashley) 今年只係17歲,身高1.73米,五官標緻身材均勻更有一對修長美腿,雖然未正式出道,影相拍照已經有台型而且有仙氣!

身高1.73米,五官標緻身材均勻更有一對長腿,林愷鈴雖然未正式出道,影相拍照已經有台型更有仙氣。

 

青出於藍

得媽媽指點後識打扮識影相,更對自己外型愈來愈有信心,Ashley社交網終有大量高質仙氣靚相,比起當年在電視圈以氣質取勝的龔慈恩餅印得嚟更加青出於藍。

 

星級媽媽做攝影師

早前假期期間,Ashley與13歲弟弟林卓毅乖乖陪着媽媽返教會、齊齊Family Day。龔慈恩與一對仔女有講有笑,感情和睦。不過一眼睇得出,17歲大女Ashley比起弟弟得到媽媽更多關注,行到巷仔見到灰牆鐵網夠晒特色,龔慈恩嗱嗱聲叫住囡囡停步,指指點點教女企位擺pose,又較定相機filter,低炒完再高炒,折騰足足幾分鐘,才終於肯收貨,最後仙氣成品由Ashley親自鋪上個人IG。

 

乖乖囡Ashley陪媽媽返教會,而龔慈恩亦不放過機會,親自揸機幫囡囡影靚相擺上網。

 

 

聽媽媽話開埋公開IG和微博帳號,呢頭影完靚相,嗰頭擺上個人社交網絡,果然仙氣十足好多like。

秘簽杜琪峰

Ashley現時在名校聖保羅男女就讀中六、明年就會升大學,本來對娛樂圈興趣不大的她近年跟在媽媽身邊見識不少,又常陪媽媽出席老闆杜琪峰家宴,漸漸開始轉軚,不抗拒唱歌拍廣告,還在今年暑假報讀中史戲劇學院暑期課程學習表演。

 

結婚生女後退隱十年,12年龔慈恩回流香港以杜Sir旗下藝人身份復出,亦順理成章希望杜Sir簽埋囡囡起個好頭。早前杜Sir在家設宴為旗下藝人洪天明慶生,龔慈恩帶埋囡囡Ashley出席。

 

 

今年中秋銀河海潤搵齊旗下藝人影宣傳相在官方微博發布,龔慈恩與女兒林愷鈴亦是其中一分子。

劉華 欽點拍戲

有樣有才有仙氣,17歲林愷玲未出道已經係大牌至愛,近年獲邀參與不少品牌活動,今年更靜靜雞接拍杜Sir愛將劉德華監制兼主演的電影《熱血合唱團》,大把前途。《熱血合唱團》由劉華監製,亦由劉華親自上陣飾演熱血指揮家,八級聲樂造詣的Ashley就扮33人合唱團其中成員。有媽媽鋪靚條路,又有神級杜Sir劉華關照,Ashley前途無可限量!

 

 

 

 

周身刀張張利

龔慈恩實情自細親自教鋼琴,從小送Ashley參加香港兒童合唱團、學聲樂及中、小提琴,一早練就囡囡一身武藝鋪路入行。從Ashley13歲初曝光已經被多間公司和金牌經理人接洽,龔慈恩始終認為樹大好遮蔭,等老闆杜Sir出聲。今年終算等到時機成熟、杜Sir亦首肯,終於幫囡囡落實「好人家」,明年入大學後正式出道。

 

 

早前龔慈恩還上載囡囡及好友合唱英文歌晒Ashley才藝,原來唔只自彈自唱自己用電腦編曲,首歌曲詞都係Ashley自己創作。

 

 

更多精選內容