張頴康再發愛妻宣言!溫馨全家福「小花生」初入鏡

張頴康再發愛妻宣言!溫馨全家福「小花生」初入鏡

張頴康同麥雅緻嘅第二愛情結晶「小花生」話咁快就一星期大啦!一眾粉絲一直好期待家姐「小豆」同細佬合照,而早前張頴康終於順應民意,大曬一家四口嘅第一張全家福。張頴康直言,呢一個星期所影嘅相當中,佢最愛呢兩張簡單又自然嘅合照。老婆啱啱出院,阿康當然一貫平時高調作風,再次發愛的宣言冧爆Angie。

撰文:Sunday Kiss

圖片:張頴康 麥雅緻 專頁、新傳媒圖片庫

愛妻宣言冧爆麥雅緻

麥雅緻分娩至今一星期,啱啱正式開始坐月嘅佢,絕對需要家人支持及貼身照顧。而一向鍾意公開向老婆示愛嘅張頴康,就適逢「小花生」出世一星期,於Facebook再度發表愛的宣言,感謝含辛茹苦嘅Angie。阿康剖白:「睇返呢一個星期裡面影過嘅相,好鍾意呢兩張簡單嘅全家福!雖然唔係由攝影大師操刀,但係記錄咗我人生最重要嘅時刻!我一直希望擁有一個屬於自己嘅一家四口,我今日有喇!」張頴康再發愛妻宣言1

一直嚮往組織4人家庭嘅張頴康多年嚟深得老婆不離不棄,阿康深情地表示:「 無論以後嘅日子點樣,我都會盡我能力保護我嘅家庭!多謝老婆用自己嘅身體完成咗我呢個願望!我老婆為我嘅付出,坦白講,我都唔知點還,點報答!希望下一世我可以做女人幫返你生BB啦!」做媽媽嘅犧牲的確好大,不過有個咁錫自己嘅老公,Angie咩都抵返晒!

張頴康再發愛妻宣言2

張頴康最愛放閃

阿康每隔幾日就放一次閃光彈,連網民都大讚佢「好識呃like」、「KO曬D雌性動物」,係個絕世好男人!

張頴康再發愛妻宣言3

兩個就夠晒數

麥雅緻曾表示今次會係最後一次懷孕,因為生兩個已足夠。雖然陀「小花生」呢胎非常辛苦,長期冇得好好休息,但佢亦陀得快樂,更稱「感恩孩子帶給我的種種感覺,老公打趣地說叫我要好好記住了。」

愛妻嘅阿康已請假一個月陪家人,除了幫手湊B之外,更希望穩定老婆情緒,係名副其實嘅廿四孝老公。希望今次Angie有老公全天候照顧,坐月會過得舒服啲!

榮升做家姐 小豆呷細佬醋

小豆一星期前正式榮升做家姐,雖然張頴康同麥雅緻曾經透露有努力培養愛女嘅責任感,教育小豆做家姐嘅意義,但細佬啱啱出世,年紀尚輕嘅小豆難免會有小小呷醋!早前趙碩之到醫院探望生產完嘅Angie,佢大爆升呢做家姐嘅小豆因呷醋,唔肯入鏡影相。所以之前嘅相,一直只有爸爸媽媽同B仔,未見有小豆。

餅印姊弟 小豆小花生

姊弟呢份關係,就算小豆唔捨得面對,都終需要接受。事關小豆同初生細佬小花生完全撞樣,話唔係姊弟都冇人信!

麥雅緻接B仔返屋企1
小花生初生照

小花生同家姐一樣面圓圓,好精靈,大家都期待更多小豆小花生嘅合照。

小豆一歲生日照

重溫當年小豆出世無耐嘅相,的確同依家嘅小花生似足餅印,相信細佬大個之後都會好似家姐咁多粉絲。

999

12

希望Angie坐月順利,一家四口繼續甜甜蜜蜜!

更多精選內容