岑麗香

岑麗香甜講老公:有佢我好幸運

育兒

廣告

岑麗香2009年溫哥華華裔小姐的冠軍及2010年國際中華小姐的她,她接受訪問大談7年前初來港入行如何適應,對演藝事業的期望等,又分享榮升強嫂、新婚一年的甜蜜人妻心情。

撰文:劉倬延
攝影:Issac
攝影協力:Sandie
場地提供:天穴

岑麗香參加選美因怕後悔 冇諗過會贏

當初點解參加選美?

因為我驚後悔,我係一個好鍾意試新嘢同埋覺得人生好豐富嘅人,嗰時我讀緊最後一年大學,開始去一啲公司實習,做人力資源嘅嘢,嗰時我諗如果我一世做朝九晚五嘅工,我諗我會悶死。同埋我好驚我成世人都係咁樣,做三、四十年,之後退休,我會想要多啲interesting嘅嘢發生,點解選美,只不過係好唔同嘅嘢,我未試過,突然間有咁大嘅挑戰,仲要係我未見過嘅世界,都幾得意吖!

你喺加拿大長大,鬼妹仔性格,選美要著泳衣對你嚟講係咪唔係問題?

我覺得呢樣嘢睇環境,未選美前我對著泳衣冇咁怕醜,同啲friend去玩,著bikini完全冇問題,但譬如拍嘢,有記者影相,有咁多鏡頭喺面前,我會驚咗,會諗:「死啦,我同隔籬嗰個比,我夠唔夠靚呢?」同埋會擺咗喺一個平台,畀人話,仲要係任話,就會有少少驚驚哋。我本身著衫保守少少,但喺外國,夏天著吊帶、tube top係好正常,但去到香港,突然放大到好大嘅事,我就會著番多啲,費事咁多話題。

選美贏就話啫,但有冇諗過唔贏又點?

我冇諗過贏,我參選係諗住攞人生經驗,學啲新嘅嘢。我希望可以做到友誼小姐,先係我目標,哈哈!最終贏咗,最初嚟香港發展,非常之唔慣,選美(2010年國際中華小姐)我先第一次嚟香港,唔熟悉呢個地方,日日坐公司車來回酒店同公司綵排,覺得周圍街燈好靚、呢個地方好好。到真係嚟發展,住嘅地方都唔知喺邊、想搭車都唔識講,我自覺唔係好蠢嘅人,但每日起身,樣樣想做嘅嘢都唔識,嗌嘢食都嗌錯、都處理唔到,突然間個自信心受影響,日日問自己,點解我咁蠢?點解乜嘢都處理唔到?最大問題係自己適應能力差,加上冇認識嘅人,不過依家好咗好多嘞。

有冇曾經覺得好唔開心,想返加拿大?

拍每一套劇我都會問自己,點解入呢行?哈哈哈!因為公司拍嘢真係可以好辛苦,尤其我劇本要翻譯,做嘅功課比正常識中文嘅人多,當06至28通告,就會問自己:「點解?點解我選擇呢行?」但當套劇出街,睇到個成果,就會覺得好滿足、辛苦係值得,我會覺得係有甜有苦。第一年年尾就開始有得拍劇,我都覺得好開心,同時間我都覺得如果冇我會癲。因為我嚟嘅時候,唔係19、20歲,我入行已經26歲,對一個女仔嚟講算好遲,我哋嘅青春有限,我會諗如果我喺加拿大,我會每日返工8個鐘,所以我放低所有嘢嚟香港,就算冇嘢做,每日都要用8個鐘去學我將來希望做嘅嘢,我就學點搭車、學講中文、睇中文、睇餐牌⋯⋯起碼要ready自己,等機會嚟。

老公好偉大

講起老公都感覺到你哋好sweet,你哋係點識?

我讀大學嗰陣,喺一間餐廳做兼職,我依家老公係我當時同事嘅男朋友嘅朋友,佢成日會去餐廳,佢成日都話我嗰時冇留意到佢,話我落完單、拎啲嘢畀佢哋食就走,但我就話我係一個專業嘅侍應,如果我咁留意你,你唔會驚我留意所有男仔咩?哈哈!嚟到香港,我想專心做嘢,五年幾以嚟冇約會過,兩年幾前,我覺得將近三十歲,都差唔多,我就問身邊朋友有冇男仔介紹,因為起碼佢哋覺得OK先會介紹畀我,幫我約咗同佢約會,事前冇睇過相,直至佢嚟接我,先至見到係呢個人。咁好彩佢靚仔嘅,哈哈哈!

佢係圈外人,點睇你啲緋聞?

佢更加鬼仔過我,佢係完全唔知我做演員,但呢樣嘢我都開心,因為佢認識我嘅時候,唔會有人同佢講我係點,可以好pure咁開始,我都舒服啲。

你哋異地戀,相處有冇問題?

開頭約會咗一個星期,就分開兩地,分開前大家坦白講有咩期望,佢話佢約會係希望搵到另一半,畀到我安心,我話我都同意,分開之後,大家見到大家嘅付出,因為有時差,佢每朝早7點打畀我,就係香港嘅11點,安排每日都有個溝通時間,一個咁鍾意瞓覺嘅人,感動到我。慢慢佢變咗我best friend,我一百分信任佢,佢又一百分信任我,就可以到今時今日變成屋企人。

佢依家喺香港,為咗你,搬嚟搵嘢做?

係!我覺得好偉大,我哋拍拖嗰陣,我哋長期分開兩個地方,都要有超過一個星期了解對方,所以佢有一段時間辭咗工,為咗可以有一個月日日見面、見埋朋友、屋企人,因為佢咁偉大,我可以做到想做嘅嘢,所以好難得,佢真係好好,佢啲朋友有時會同佢講:「你執到啦,香香好多fans!」但我心入面知道,我先係lucky嗰個。

三十二歲結婚,係早定遲?

我以為我會好早結婚,我係好女仔嘅女仔,好想錫人同被錫,但搵唔到都冇辦法。我哋最珍惜係簡單,同可以relax,佢最鍾意嘅我係返到屋企落埋妝、換埋睡衣,喺佢隔籬陪佢睇電視,呢啲moment係我哋最享受嘅,我同佢比,佢thoughtful啲,咁講我好似愈嚟愈差,哈哈!

結婚一年,婚姻生活愉快?佢多唔多驚喜畀你?

可以呀!我唔係好要求好多驚喜,佢本人每日付出嘅嘢已經好足夠。反而我希望拍完呢套劇,時間多啲,我可以做一個好啲嘅太太。

你劇接劇,最初已經有演戲天份?定慢慢吸收?

初頭睇劇本睇到想喊,一個劇本咁多字,一集七十版紙,乘以二十集,我一版紙要睇幾粒鐘,係好驚嘅,我個心態係既然機會已經喺面前,我盡力去做,同埋係我責任,要向監製、觀眾交代,我希望就算做得唔好,都可以唔嬲自己,因為我畀得出嚟嘅都畀晒,唔得嘅,即係冇緣份啦。係辛苦㗎,我記得拍劇一係喺公司瞓,一係返屋企二十分鐘,沖一沖涼定係食嘢,自己選擇,呢行就係咁,都要捱㗎啦!

網民話你廣東話唔標準,當然你比我第一次見你進步咗好多,你有冇擺喺心?介意網民睇法?

對於開頭一個啱啱入行嘅人,係唔舒服㗎,我諗每一個人畀人不停咁話一啲唔好嘅嘢,好多負能量,係好難接受嘅,但好彩身邊有好多前輩同我講:「其實係娛樂嘅啫!做得呢行娛樂人都係工作一部分。」當我開始接受,其實係舒服好多。

入行近7年,覺得發展點?

我會覺得可以好啲,作為一個藝人永遠都可以有進步。我指拍攝上,我每次睇番自己拍嘅嘢,我覺得可以好啲,希望可以繼續進步。好彩,我入行已經26歲,所以我之前喺加拿大都做過嘢、有儲錢,我嚟嘅時候,我係肯定我頭一、兩年喺呢行試嘅時候,起碼有錢食嘢,呢個底我有打,嘻嘻,我唔想好盲咁跳入一樣嘢,仲係廿一、二歲就可以啫,隨時可以返轉頭,不過初初嚟嘅時候,真係要限制用錢,每次去超級市場、睇場戲、每次去買支唇膏都要寫低,用咗三十蚊,超級市場二百一十蚊,搭的士六十蚊,地鐵七蚊,真係寫低,因為我要做一個負責任嘅人,我放低我所有嘅嘢嚟試,睇下夢想可唔可以成真,但我唔可以乜準備都唔做。我要同屋企人交代,如果我餓,邊個心痛?唔係我,係我阿媽、我阿爸,呢個世界唔係淨係諗自己,係要諗身邊嘅人。我係好黐屋企嘅人,所以make sure我一年起碼要返屋企一次,如果唔係,我會唔開心。

未來有咩角色想做?喺呢行想行到幾遠?

我想試下奸角,但係好多人都話我做唔到,所以我更加想試。哈哈!但喺我立場,奸唔一定要黑口黑面,笑住嚟奸都可以好奸。哈哈哈哈!我作為演員,唔想定咗下下都要笑、都要sweet、好女仔。獎項方面,我唔諗咁多㗎嘞,如果我淨係諗我嘅成就係攞獎,咁我永遠都會靠住人哋覺得乜嘢係成功,而我要達到佢覺得嘅成功,好似好多時我同我老公相處,我曾經會同自己講:「我呢套劇做得好差,點解我想做嘅嘢做唔到?」我淨係諗我忽略啲乜嘢,我老公就會提番我:「你唔可以淨係focus咁細嘅嘢,一場戲或者一套戲做得好抑或唔好,你要睇番成個big picture,人生唔係一套戲、一份工,你要睇你做緊呢份工嘅時候經歷過啲咩、有冇成長,或者有冇令件年事變好、幫到人,唔係淨係攞獎或者搵幾錢。」當我focus太細嘅嘢,我老公可以幫我打番開,提我目標同過程係更加重要。