張瞻拍片做Youtuber!一口流利英語獲網民大讚

張瞻拍片做Youtuber!一口流利英語獲網民大讚

近日張繼聰於社交媒體與粉絲們爆料,原來囝囝張瞻(James)年紀輕輕已經做左Youtuber,仲會以一口流利英語拍攝影片。睇完張瞻嘅片,連阿聰都鬼馬回應:「為咗唔會落後於時代嘅巨輪,我係緊貼住啲年輕YouTuber嘅節目! 喺網上真係學到好多嘢。」究竟阿聰喺囝囝嘅頻道上學到咩呢?
撰文:Sunday Kiss

圖片:謝安琪 Facebook 、張繼聰 Facebook、張瞻 Youtube

張瞻拍片 偷食屋企零食

近日張繼聰與謝安琪在Facebook公開囝囝張瞻嘅Youtube頻道,原來James一直有拍打機片放上個人頻道,最近佢仲邀請埋朋友仔上鏡,一齊試食零食玩Guess the food challenge!

張瞻同朋友仔輪住蒙眼試食,不過似乎啲嘢食太易估啦,食少少就已經估得出係咩啦!張瞻成條片都係講英文,又表情多多,最尾仲識叫人Subscribe,成個Youtuber上身一樣,好專業啊!

https://www.youtube.com/watch?v=UjY3BsKviGI&feature=youtu.be

爸媽齊開帖支持

爸爸張繼聰睇完個仔嘅作品,就同大家分享閱後感:「為咗唔會落後於時代嘅巨輪,我係緊貼住d年輕YouTuber 嘅節目!係網上真係學到好多嘢。今趟,我就學到要將屋企嘅零食鎖好!」原來張瞻喺片中試食嘅零食係屋企嘅「私伙嘢」,難怪連媽媽阿Kay都話:「屋企啲零食點解會無故失蹤?
謎底已經被解開……」

拍片自爆5個小秘密

原來張瞻幾多月前曾經上載過一條片,大爆5個關於自己嘅小秘密。片入面無提及過爸爸媽媽嘅身份,但就令一眾粉絲對佢嘅認識更加深!張瞻於片中暢談自己嗜好,原來佢鍾意睇書同玩lego。James更同大家公開佢最鍾意嘅歌,大騷音樂品味,一定係受到做歌手嘅父母熏陶。

張瞻繼續講,自己係恐龍迷,鍾意用黏土砌各種恐龍,但係唔想曬媽媽錢買材料,所以作品唔太多!踢開足球嘅張瞻仲公開自己最鍾意嘅球員,原來係尼恩高蘭,認真對足球好有研究!

10歲張瞻被封暖男哥哥

謝安琪7個月前誕下細女張靖(Karina),10歲的張瞻自此榮升做哥哥。阿Kay曾透露,大仔鍾意行搞笑路線,但對住妹妹係個稱職嘅暖男哥哥。張繼聰亦曾大讚張瞻:「我個仔抱我個女抱得好溫柔,初初都擔心個仔點樣對妹妹,但睇到他又幾柔情,當妹妹喊時,他好溫柔叫妹妹不要喊,哥哥喺度。」

張瞻年紀輕輕,已經咁識氹人開心,又愛錫妹妹,大個一定會被封為荀盤!

更多精選內容