麥雅緻堅持做母乳媽媽 張頴康以行動撐老婆

麥雅緻堅持做母乳媽媽 張頴康以行動撐老婆

熱話

廣告

麥雅緻同張頴康嘅心肝寶貝「小花生」兩星期前終於出世,啱啱開始坐月嘅Angie近日喺網上表示自己會堅持餵哺母乳,就算半夜好攰都唔會放棄。見老婆為左囝囝咁辛苦,張頴康一於以行動支持,親自幫手餵小花生,事實又再一次證明阿康係個廿四孝老公!

撰文:Sunday Kiss
圖片:張頴康 麥雅緻Facebook

麥雅緻樂做母乳媽媽

對於好多新手媽媽嚟講,餵哺母乳都係一項重大挑戰。第二次為人母嘅Angie知道母乳對BB百利而無一害,所以陀住「小花生」時已經決定會餵母乳。早前佢喺Facebook張貼小花生「開餐」嘅相,仲留言話:「去到邊食到邊,密密埋身餵,好快追上小花生食量,泵出黎爸爸仲可以幫手餵!」

眼利嘅網民就發現到呢張相嘅玄機:細佬嘅奶樽後面就係家姐「小豆」嘅水樽!

張頴康以行動撐老婆

一向顧家嘅張頴康為左幫手照顧BB,特登請咗一個月假留喺屋企陪家人。講到湊B,阿康事事都親力親為,仲會幫Angie手餵小花生,減輕老婆嘅負擔。有個好男人做老公,難怪Angie再辛苦都笑得咁甜。

張頴康兩星期前公布細仔出世,又向老婆公開示愛:「小花生出咗世喇!辛苦哂老婆喇!老婆,我愛你!」

麥雅緻:第二胎陀得辛苦

做媽媽的確好偉大!麥雅緻於臨盆前曾接受本刊訪問,直言陀小花生仲辛苦過陀第一胎。Angie坦言,始終比以前年長,而且個肚感覺好墜,呢胎係陀得比較辛苦。不過曾表明「兩個就夠晒數」嘅張頴康喺老婆懷孕期間照顧得佢無微不至,仲話想代Angie懷孕幫佢減輕痛楚,就連年紀輕輕嘅小豆都對媽媽呵護有加,唔比佢危險動作。相信照顧小花生期間,張頴康同小豆都一樣咁幫得手!

張頴康上星期公開一家四口全家福,並表示:「我一直希望擁有一個屬於自己嘅一家四口,我今日有喇!無論以後嘅日子點樣,我都會盡我能力保護我嘅家庭!」一句愛家宣言盡顯阿康嘅男子氣概!

小豆小花生 餅印姊弟

小豆同細佬小花生除左個名都係「一粒粒」,連個樣都似到餅印咁,一樣面圓圓,好精靈。Angie一貼BB嘅正面相,就引嚟大批網民留言話「好似小豆!」最近Angie仲請左攝影師幫佢地一家影相,從「幕後花絮」見到小豆攬實細佬唔肯放手,畫面超有愛啊!

母乳媽媽的確唔易做,不過正如麥雅緻所講「信念就是堅持」,各位新手媽媽就一齊為BB撐下去吧!