萬聖節主題生日會@文娜雅拔幼稚園

萬聖節主題生日會@文娜雅拔幼稚園

某啲學校因為宗教或者其他原因而冇慶祝萬聖節,好高興文娜雅拔幼稚園喺十月份生日上,加入萬聖節主題,令細佬 Par Par 同一班小朋友,有得著特別啲嘅服裝行 catwalk,玩吓 trick or treat 同其他遊戲,以開心正面嘅方式,一齊慶祝吓!

呢日,小朋友返到學校之後,首先喺課室同小朋友一齊玩吓玩具,互相欣賞對方嘅打扮同服裝,班主任都好鍾意 Par Par 呢身小丑造型呀,仲瘋狂合照㖭!^^

 

Par Par 件衫好立體,中間突起咗,好似有個大肚腩咁樣,好多人見到都即刻笑咗出嚟,嘻嘻!

跟住就去玩遊戲,再返課室開大食會,一齊唱生日歌畀一班十月壽星囝囡聽,生日快樂呀 🙂

喺咁開心嘅時刻,當然要互相分享大家帶返嚟嘅茶點啦!

分甘同味呢個道理,小朋友細細個就應該要學識呀!

跟住落嚟係今日好重要嘅環節:行 catwalk!

每位小朋友逐個喺紅地氈上面行,然後擺 pose。

Par Par 係咪好型,好似超模呢?XD

 

當日好多小朋友都打扮得超可愛,而且喺學校鼓勵之下,唔少家長都同小朋友一齊親子 DIY 服裝,好有心思!

 

最後由校監及校董選出 Best Costume 同 Best Make-up。

好開心細佬呢個搞笑小丑打扮,得到最佳服裝奬!

萬聖節點可以冇 trick or treat 呢?

成班小朋友由一個班房過另一個班房攞糖食好開心,Par Par 返到屋企都有問我同兩位姊姊玩 trick or treat 攞糖食呀,不過我哋畀佢嘅,係佢喺學校攞返嚟嘅糖,哈哈!開心咪得囉,啲糖係邊個嘅,唔重要 😛

我個人係贊成以正面嘅方式慶祝萬聖節,因為應該開始要俾小朋友知道,任何時候做任何事,都要保持正面,唔可以因一時高興,打扮成唔健康嘅形象嚟嚇人,從而影響其他人。

 

所以好鼓勵小朋友喺呢個日子扮吓卡通人物,大家一齊玩吓,除咗唔會高舉緊一啲負面嘅嘢之餘,仲可以增加小朋友嘅同理心,日後知道自己想開心同好玩,係唔可以靠嚇人嚟得到,更唔會令佢哋聚焦呢個節日原來係源自一啲唔好嘅嘢,從而唔會令佢哋日後嘅視野比較負面,而忽視一啲光明正面嘅事物。

 

而且學校呢個萬聖節生日會+ catwalk,小朋友唔止可以打扮成唔同嘅 character,更見到有唔同職業嘅服裝,令 Par Par 可以認識唔同職業係着乜嘢衫,真正做到寓教於樂!

喺度再一次祝十月生日嘅小朋友

生日快樂!身體健康!學業進步!

 

亦都祝所有月份生日嘅大朋友小朋友

萬聖節快樂!^^

 

 

FB: KeicyKK

 

 

更多精選內容