葵芳食品嘉年華 15大必試小食推介

葵芳食品嘉年華 15大必試小食推介

今個星期又有平民美食展可以掃啦!事關葵芳最近有個香港食品嘉年華,場內有掃街熟食專區,接近50個攤檔,大賣各款街頭小食,絕對可以掃街食到飽!記者就入去行過一圈,即刻帶你睇吓有咩食。

 

 

 

原文:新假期
撰文:ning 攝影:Woody

50檔掃街小食列陣

這個位於葵芳葵涌運動場的食品嘉年華,正正就在掃街勝地葵廣旁邊,展期由即日去到11月5日,入場費只是$5 ,最啱Weekend去行吓。

場內分成多個專區,包括乾貨、廚具、零食等,而掃街迷最關心的,就是可以即買即食的熟食區,接近50檔攤位,各式街頭小食列陣,難怪閒日去都人頭湧湧,好像年宵般熱鬧!

熟食區非常熱鬧,閒日去都人山人海。
熟食區設有小量座位,可以買完坐低慢慢嘆。

15大場內掃街必食推介

熟食區有咁多款美食,看得人花多眼亂。而且始終眼闊肚窄,所以要重點出擊,即睇以下15大必食推介。

1.流心彩虹玉子燒

這檔玉子燒以往都在其他美食展出現過,所有玉子燒都是即叫即煎,大份又足料。今次這款彩虹玉子燒就加了蟹柳和店主獨創的蜜瓜味芝士。聽落奇怪,記者都怕有藥水味,食落竟然無,反而帶點甜味,玉子燒亦有鹹甜的鰹魚清香,算有驚喜。

彩虹流心玉子燒 $40
即叫即煎,內裡包著蟹柳及蜜瓜味的芝士。

2.榴槤小丸子

和玉子燒同一攤檔,吉列外層的糯米皮,包著馬來西亞榴槤蓉,一咬爆漿,而且口感軟滑,榴槤味很濃郁,齒頰留香

榴槤小丸子 $40/份
榴槤味很香甜,質感幼滑。

3.梳乎厘班戟

掃街新寵梳乎厘班戟,場內都有,件件鬆軟震騰騰。梳乎厘班戟一客兩件,可以選擇朱古力和榴槤口味,前者會淋上朱古力醬,後者則是榴槤蓉;亦可以乜都唔加,只吃原味,甚至雙拼亦得,好貼心。不過因為即叫即煎,所以都需要時間等候。

即叫即煎,每塊都鬆軟富空氣感。

 

朱古力味梳乎厘班戟 $30/份
榴槤梳乎厘班戟 $30

4.蒲燒鰻魚

即叫即燒,並且會塗上鰻魚汁,想留肚亦可以只叫半條,不過識食就當然原條食。鰻魚肉唔算厚肉,勝在肉嫩、無泥味,配鰻魚汁就剛好。

剪開一件件,夠細心。
蒲燒鰻魚 $15/半條、$25/原條

5.冰鎮醉鮑魚

與蒲燒鰻魚同一檔,一樽樽醉鮑魚用冰桶冰鎮。酒香撲鼻,而且鮑魚煮得夠腍,食落軟滑唔覺韌。

酒量夠多,浸過每一粒鮑魚,所有酒味滲晒入鮑魚肉內。
冰鎮醉鮑魚 $30

6.新鮮出爐太鼓燒餅

主打鮮果汁、茶飲的Color ChaCha今次都有在場擺檔,兼賣新鮮出爐的太鼓燒餅。流沙奶黃餡最好食,內裡有自家製的奶皇醬,再放入鹹蛋黃,食落有流心和沙沙的鹹蛋黃粒,甜中帶點甘香。

流沙北海道奶黃太鼓燒 $12
自家調配的奶黃餡。
再放入原粒秘製鹹蛋黃餡。
出爐!撲鼻聞到濃濃的蛋糕香。

另外也有香蕉朱古力餡,裡面夾有一粒三角朱古力,很香甜,啱晒朱古力控。

香蕉朱古力太鼓燒 $12

7.彩虹果汁特飲、鮮果牛奶

掃街食到一半覺得口渴,可以買這款會場限定的彩虹鮮果汁特飲來喝。用上新鮮果汁,配搭底層的果凍、菠蘿粒和蘋果粒,清甜解渴又有口感;而且頗大枝,算抵飲。

用新鮮果汁製成,雖然五顏六色,但飲落天然微甜,好解渴。
(左)黑天使(藍莓、黑提子、彩色果凍、菠蘿、蘋果)$28 (右)吸血鬼(西瓜、彩色果凍、菠蘿、蘋果)$28

有少女心兼喜歡Pastel色的,可以飲鮮果牛奶,用士多啤梨、芒果等混成淡粉紅色及黃色的牛奶,撞上淺藍色的蝶豆花牛奶,夢幻之餘又呃到Like。

(左)夢幻天の城(芒果鮮奶、蝶豆花鮮奶)$30 (右)夢幻雙子星(士多啤梨鮮奶、蝶豆花鮮奶)$30

8.即包北京片皮鴨

另一檔就有人手即包的北京片皮鴨,在鴨餅塗上甜麵醬,包入鴨肉、青瓜而成。略嫌欠缺熱度,勝在鴨肉肥瘦適中,一客4件頗飽肚。

北京片皮鴨 $30/份

9.蟹粉小籠包

在北京片皮鴨旁邊,就有蟹粉小籠包,用蒸爐烘著夠晒熱辣辣,細細粒可以一啖一隻,湯汁都頗豐富。

蟹黃小籠包 $30/5粒

10.蜜糖炒豬手

原隻豬手起肉切粒,再在鐵板上加蜜糖炒香,每件都食到豬手甘香的油脂,以及帶黑椒煙燻味的豬手肉,很惹味。

蜜糖炒豬手 $30/份

 

11.煎餅果子

北京、天津等地的傳統街頭小食,用綠豆製成的麵漿,加上雞蛋、甜麵醬、蔥花,再夾上一塊薄脆而成,口感富層次,外面的綠豆蛋餅煙韌,內裡就脆卜卜,加點辣醬,食落香口過癮。

先煎綠豆、雞蛋餅皮
內裡再加了塊薄脆
煎餅果子 $25/份

12.芋圓豆花

場內也有多間賣芋圓的攤檔,這間配料最多,底層有滑嘟嘟的豆花,再加三色芋圓、粉圓、珍珠、紅豆和一球紫薯蓉,很豐富。芋圓彈牙有嚼勁,啱煙韌控。

芋圓豆花 $30

13.糯米釀雞翼、大腸包小腸

主打賣台灣小食,$40一個套餐有齊糯米釀雞翼和大腸包小腸。雞翼釀得飽滿脹卜卜,味道甜甜辣辣,內裡的糯米飯微微濕潤;大腸包小腸入面有青瓜、醃菜,烤香腸也很大條,不過就包得比較雜亂粗糙。

每隻雞翼都釀得脹卜卜
糯米飯雞翼 $40(套餐價)
釀到爆餡!
大腸包小腸 $40(套餐價)
糯米腸粗身而且飽滿
台式香腸脆皮有肉香

14.蚵仔煎

即叫即煎的台灣蚵仔煎,大份之餘夠晒熱辣辣,蚵仔份量落得算慷慨,每粒都很肥美。

蚵仔尚算肥美

15.小鮮肉奶茶

早前台灣大熱的小鮮肉奶茶,場內都有得飲,除了肌肉男的樽身,還有身材玲瓏浮凸的索女版,夠晒玩味。奶茶夠絲滑,茶味濃而不澀,甚有茶記Feel。

小鮮肉奶茶 $18/枝

16.烤鴨髀+雞翼

熟食區最大的攤檔,由點心、炒麵到串燒類都有供應,鴨髀大隻又厚肉,用光波爐及烤盤慢烤,食落香口不油膩。

鴨髀 $20/隻、烤雞翼 $15/串、$20/兩串

17.會場限定!番茄味脆魚皮

食飽飽,發現場內還有「休閒食品區」,專賣零食和小量健康食品。最人氣就是這間港產的祖味脆魚皮,之前推出過蒜香鹹蛋脆魚皮而紅起,今次再帶來原味、紫菜、黑椒口味,以及最新兼會場限定的番茄味脆魚皮,咬落香口,伴帶酸甜番茄味,食到停唔到口。

祖味番茄味脆魚皮 $50/4包

 

第6屆香港食品嘉年華

地址:葵涌興盛路93號葵涌運動場(近硬地足球場)(顯示地圖
展期:即日至11月5日
開放時間:11am-8:30pm
入場票價:$5(大小同價);身高1米或以下小童、65歲或以上長者及殘疾人士免費進場
備註:每日展會結束前30分鐘及最後一日展會結束前1小時將停止售票及進場。

更多精選內容