幼稚園面試三大要點

幼稚園面試三大要點

大家有無報 N班 呀?開始面試未?我哋星期六第一次去 幼稚園面試,雖然未知收唔收,但整個失控過程加上面試老師嘅表情話我知,今次衰硬喇。茄蛋媽痛定思痛,知錯地寫下自己衰乜,大家盡量避得就避喇。

 

撰文、圖片︰茄蛋媽

痛定思痛失敗原因

面試當日著靚靚,不過我地無影相。
面試當日著靚靚,不過我地無影相。

今次係我哋第一次面試,地點係九龍塘迦X幼稚園,面試時間係早上8點幾,呢日茄蛋仔只有14.5個月大。點解茄蛋媽會覺得衰硬呢,因為果日茄蛋仔全程喊打喊殺大叫大喊、老師比嘢佢狂掃狂丟落地、無做過老師要求做嘅指令、唔肯坐定定。當日茄蛋媽同佢去面試,到依家都仲好想搵窿瓹,但返到屋企,痛定思痛,回憶返當日失敗嘅原因……

1/ 無食早餐

我地平時5點幾起身食奶,食完又瞓返到7點幾起身,以往會餵多次奶先梳洗,但今次太趕時間,茄蛋媽居然掛住出門口而無餵奶,去面試途中亦無準備食物比蛋仔。

餓住個肚大人都無心機啦

面試時老師一拎條假蕉出嚟要求擺放相仲應圖卡上,蛋仔不特止唔做,仲好似發咗狂咁猛咁要我開,佢食唔到就狂叫狂喊。

真心地建議各位家長,面試前最重要嘅事,一定係要餵飽小朋友呀!

2/ 好眼瞓呀

雖然蛋仔已經歲幾人仔,但到依家都會半夜喊醒一兩次,面試前一晚都唔例外,平時我哋半夜瞓得唔好都可以日頭補眠,但面試當日唔可以遲到,蛋媽7點左右就嘈醒蛋仔梳洗,最後以超級眼瞓嘅狀態下面試,唔好要求佢笑喇,單係要求佢唔好喊已經無乜可能。

茄蛋仔完成面試後超級眼瞓

蛋媽認為,無論面試時間係日頭定晏晝,都要注意小朋友嘅作息時間。前一晚瞓得夠,第二日面試前唔好玩得太癲太攰,夠休息,大人小朋友心情都會靚好多。

3/ 面試前無練習

茄蛋媽不才,完全將面試可能發生嘅事諗得太簡單了,事前完全無同蛋仔做過任何練習,到面試時,老師要求蛋仔做嘅野,我哋大部分都未試過做。

蛋媽成日恃任蛋仔係細細B,認為好多嘢都輸蝕過年頭B,所以抱住放任不理、煮到埋嚟就食嘅態度,覺得總會有幼稚園收細B嘅心態,而無認真了解過幼稚園面試係咩一回事,只係顧住自己睇學校背景資料,到最後,我哋反枱捵地咁離開,呢個絕對係蛋媽嘅錯。

如果可以,建議大家平時多點陪小朋友玩,鼓勵小朋友多拍掌、唱歌跳舞同埋開心笑。茄蛋媽認為,老師好著重小朋友會唔會聽媽媽爸爸講嘢,其次係會唔會笑同拍手。個人認為自己最失敗嘅係太少同蛋仔笑,所以令佢都唔會成日笑,唔知關唔關事呢?

面試時要細指住自己隻眼,但我地識而不做。

不用太勉強細B

至於識唔識水果/ 顏色/ 數字/ 指定動作,如推凳、擺好指定嘅玩具、手指指去老師要求嘅五觀、分辨唔同動作係乜嘢,茄蛋媽對於一個只有14個月大嘅小朋友嚟講都仍然有少少保留,識嘅當然好,唔識嘅都唔使太勉強馬上學識同埋在陌生人面前做到出嚟。

平時可以自己玩,已經係一個好好嘅獨立訓練。

另外,平時要多啲同小朋友傾偈,小朋友真係好似吸水力特強嘅棉花,今日同佢講一次,佢第二日就會識,蛋媽印象最深刻嘅教蛋仔學習表達自己,想要嘅野就要舉手,講一次就識咗。

下一頁︰幼稚園面試準備

更多精選內容