【超邪惡小食】黃金脆魚皮

【超邪惡小食】黃金脆魚皮

上幾個月見到好姊妹整左依個邪惡小食,初時都唔知有咩咁特別之處(師奶仔見識少),直到前幾日聽一位剛外遊新加坡朋友講,佢晨咁早去店鋪想買特產咸蛋魚皮都買唔到,所以就令我”的”起條根,好想研究一下兩位好友口中超邪惡但又好好食嘅黃金脆魚皮係乜東東,所以就買齊材料自己試下整啦!

 

 

魚皮一包(我買依包大約有25g)、咸蛋黃四隻、牛油適量~

咸蛋黃用水沖一沖之後,隔水蒸10分鐘至熟透~

咸蛋整碎,再加入少少牛油拌勻~

開小火,然後用牛油開鑊,再加入咸蛋蓉,之後不停炒~

繼續用小火不停炒炒炒,待炒至起泡泡~

然後就可以加入魚皮,再努力炒…炒….炒~

直至每一塊魚皮都被咸蛋蓉包圍住~

放涼後就食得啦~

我自己就冇食過來自新加坡嘅特產,所以就真係唔識比較,不過我依個自家制嘅黃金脆魚皮都真係唔錯,脆口得嚟又帶點咸蛋香,個味道同口感都唔錯呀~

我自己就當正薯片咁一邊睇電視一邊密密食,唔覺唔覺食左大半碟,今次實行又肥多好幾磅了!

佢整法又唔難,而且又好食,不過咸蛋始終係邪惡之物,所以間唔中食一次就好,如果唔係一陣膽固醇增加就影響健康。另外….記得食完香口熱氣食物,記得要飲返杯涼茶清清底呀!

BY 小小豬Kinsey

更多精選內容